ХъызмэтшIапIэу «Россети-Кубань» икъутамэу Шъачэ электрическэ сетьхэм япащэ иапэрэ гуадзэу, инженер шъхьаIэу Хьа­пыщт Заурбек щытхъуцIэу «Урысые Федерацием изаслуженнэ энергетик» зыфиIорэр къыфагъэшъошагъ. Краснодар краим игубернатор игуадзэу Евгений Пергун тын лъапIэр тичIыгогъу къыритыжьыгъ.

«Энергетикэм ылъэныкъокIэ гъэхъэгъэшхохэр зэри­шIыгъэхэм ыкIи илъэс пчъагъэхэм гуетыныгъэ иIэу зэрэлэжьагъэм афэшI Урысыем и Президент и УнашъокIэ Хьапыщт Заурбек бгъэхалъхьэр къыфагъэ­шъошагъ, — къыщыхагъэщыгъ хъызмэтшIапIэм ипресс-къулыкъу. — Заурбек Аслъанбый ыкъор Iэпэ­Iэсэныгъэшхо зиIэ IофышI, ныбжьыкIэхэмкIэ щысэтехыпI. Сэнэхьатым зырылажьэрэр илъэс 29-рэ хъугъэ, Шъачэ иэлектросетьхэм захэтыр илъэс 15-м ехъугъ».
Илъэс пчъагъэхэм тичIыгогъу фэшъхьаф бгъэхалъхьэхэри щытхъу тхылъхэри къыфагъэшъошагъэх: медалэу «Я XXII-рэ Олимпийскэ кIымэфэ джэгунхэу ыкIи я XI-рэ Паралимпийскэ кIымэфэ джэгунхэу 2014-рэ илъэсым къалэу Шъачэ щыкIуагъэхэр», Краснодар краим игъэстыныпхъэ-энергетическэ комплекс ыкIи ипсэупIэ-коммунальнэ хъызмэт и Министерствэ и Щытхъу тхылъ, ПАО-у «Россети», Урысые Федерацием энергетикэмкIэ и Министерствэ ярэзэны
гъэ тхылъхэр, нэмыкIхэр. Джащ фэдэу щытхъуцIэхэу «УФ-м иэлектросетевой комплекс изаслуженнэ IофышI» ыкIи «Пшызэ и ТЭК изаслуженнэ IофышI» зыфиIохэрэр Заурбек иIэх.