Шапсыгъэ научнэ егъэджэнхэу «Фитыны­гъэр зэхэпшIэныр: блэкIыгъэр, непэрэр, ­неущырэр» зыфиIорэр Ростов-на Дону щыкIуагъ.

ар юридическэ шIэныгъэхэмкIэ докторэу, журналэу «Темыр Кавказым июридическэ гъуаз» зыцIэм иредактор шъхьаIэу, Урысые Федерацием изаслуженнэ юристэу, народнэ хъызмэтым ыкIи къэралыгъо ­къулыкъум я Урысые академиеу УФ-м и Пре­зидент дэжь щыIэм хэхьэрэ гъэIоры­шIэ­пIэ-къутамэу Къыблэ-­Урысые институтым фитыныгъэ ушэтынхэмкIэ игупчэ ипа­щэу, къуаджэу Тхьагъапшъэ къыщыхъугъэ Шапсыгъэ Дамир Юсыф ыкъом инаучнэ творчествэ фэгъэ­хьыгъагъ.
Егъэджэнхэр зэхэзыщагъэхэр: юстициемкIэ Урысые къэралыгъо университетым икъутамэу щыт Ростовскэ институтыр, УФ-м юстициемкIэ и Министерствэ игъэ­IорышIэпIэ ШъхьаIэу Ростов хэкум щыIэр, хьыкум приставхэм я Федеральнэ къулыкъу игъэIорышIэпIэ ШъхьаIэу Ростов хэкум щыIэр, Ростова-на-Дону икъэ­лэ администрацие ныбжьыкIэ политикэмкIэ игъэIоры­шIапIэ ыкIи юристхэм яунэу Ростов дэтыр.
Апшъэрэ еджапIэу зэхахьэр зыщыкIуагъэм къызэритырэмкIэ, Урысыем икъыблэ лъэныкъо щыIэ университетхэм ястудентхэр Iофтхьабзэм хэлэжьагъэх. Ахэм шIуфэс псалъэкIэ закъыфигъэзагъ Ростовскэ институтым ипащэу, профессорэу Багавдин Магомедовым, Шапсыгъэ Дамир рэзэныгъэ гущыIэхэр пигъо­хыгъэх, къэралыгъо юридическэ гъэсэныгъэм ыкIи наукэм ащ иIахьышхо зэрахилъхьагъэр къыхигъэщыгъ.
Пленарнэ зэхэсыгъоу рагъэкIокIыгъэм юридическэ шIэныгъэхэмкIэ докторэу, профессорэу Шапсыгъэ Дамир доклад къыщишIыгъ. Джащ фэдэу ащ къыщыгущыIагъэх юриспруденцием фэгъэзэгъэ шIэныгъэлэжь­хэр. Нэужым егъэджэнхэр зэфэшъхьаф площадкэхэм ащыкIуагъэх.