Урысые студенческэ проектэу «О уикIогъу» зыцIэр президент платформэу «Урысыер — амалыбэхэм яхэгъэгу» зыфиIорэ программэм къыдыхэлъытагъ ыкIи ныбжьыкIэ IофхэмкIэ Уры­сые Федеральнэ агентствэмрэ шIэныгъэмрэ апшъэрэ гъэсэны­гъэмрэкIэ УФ-м и Министерствэрэ яIэпыIэгъухэу агъэцакIэ. Урысые студенчествэм и Мафэ тефэу проектым иятфэнэрэ едзыгъо зэрэфежьэхэрэр къаIопщыгъ.

Адыгэ Республикэм истудентхэр хабзэ хъугъэу зэнэкъокъухэм, джащ фэдэу кIэу къыхэхьагъэхэм, куп проектхэм ахэлэжьэнхэ амал яI.
«О уикIогъу» — ар Урысыем истуден­ческэ проект инхэм ащыщ, илъэс къэс хэлажьэрэр нахьыбэ мэхъу. СэшIэ студент мин пчъагъэхэм зафэмыщыIэжьэу ятфэнэрэ едзыгъом итIупщын къызэрежагъэхэр. Зэ­нэкъокъу трекитф мыгъэ тэтIупщы, ахэм язырэр проектым ишъолъыр
куп­хэм апай. Ащ фэшъхьаф IофыгъуакIэ­хэри ятфэнэрэ едзыгъом хэдгъэхьагъэх. ГущыIэм пае, «ОуикIогъу х Дебаттл» зыфиIорэр, ащ апшъэрэ еджапIэхэм ыкIи колледжхэм якIэлэегъа­джэхэр хэлэжьэнхэ алъэкIыщт. ХэушъхьафыкIыгъэ проектэу «О уикIогъу х Импро­визациер» зыфиIорэм лъэныкъуищмэ язырэр къахэпхышъущт — зэгъусэ нэбгыритIум яз, апшъэрэ еджапIэм иклуб икуратор ухъуныр е комедием уритренерыныр. Тызэгъусэхэу едзыгъуакIэхэр нахь шIагъо тэжъугъэшIых!» — къыхигъэщыгъ президент платформэу «Урысыер — амалыбэхэм яхэгъэгу» зыфиIорэм игенеральнэ пащэ иапэрэ гуадзэу Алексей Агафоновым.
Проектым иятфэнэрэ едзыгъоу «О ­уикIогъу» зыцIэм зэнэкъокъу трекитф хэхьэ, ахэм ащыщых кIэу аштагъэхэр — «Зэ­хэсэщэх» ыкIи «Гукъыдэчъ къафэсэхьы» зыфиIохэрэр.
● Трекэу «Сэ сэшIы» зыцIэм хэлэжьэрэ студентхэр зипроектхэр хэгъэгум зэхъокIыныгъэшIухэр фэшIыгъэнхэм фэзыщэхэрэр ары. Iэшъхьэтет шэнэу студентмэ ахэлъхэр къахэгъэщыгъэным трекыр дэлажьэ. ЗэкIэмкIи проекти 100 къыхахыщт, ахэм япащэмэ сомэ мини 100 зырыз аратыщт. Ахъщэр Урысыем игъэсэныгъэ учреждениехэм ащагъэфедэн алъэкIыщт, джащ фэдэу япсэупIэ амалхэр нахьышIу ашIынхэм е япроектхэм хэхъоныгъэ ягъэшIыгъэным апаIуагъэхьэ­шъущт.
● Трекэу «КъызэIусэхы» зыфиIорэм (ащ цIэу иIагъэр — «Апэрэу ПхырыкIырэр») апэрэ курсым щеджэхэрэм амал къареты студенческэ сообществэм ыкIи хэгъэгум иныбжьыкIэ политикэ иэкосистемэ нэIуасэ афэшIыгъэнхэр. Мы зэнэкъокъум щытекIощт 200-р къыхахыщт, ахэм ахъщэ шIухьафтынэу аратырэмкIэ къыкIэлъыкIорэ мэзихым еджэнхэ амал яIэщт. Трекыр апэрэу затIупщы­гъэр гъэрекIу, ащ хэлэжьэнхэу заявкэ мин 35-рэ къатыгъагъ. Гурыт профессиональнэ гъэсэныгъэ зэзыгъэгъотырэ студентхэри мыгъэрэ зэнэкъокъухэм ахэлэжьэнхэ алъэкIыщт.
● Куп трекэу «Зэхэсэщэх» зыцIэр зыфытегъэпсыхьагъэр апшъэрэ гъэсэныгъэ зы­щызэрагъэгъотырэ организациехэм аще­джэрэ студентхэр — ныбжьыкIэ организациехэм ахэтхэр ары. ЗыкI студенческэ сообществэ зэхэщэгъэным, джащ фэдэу студентхэр социальнэ Iофыгъохэм ахэщэгъэн-
хэм ар къафэджэ.
● «Гукъыдэчъ къафэсэхьы» зыцIэр шъо­лъыр командэхэу «О уикIогъу» зыфиIорэ проектым хэлажьэхэрэм апае зэхащагъ. Ар зыфэгъэхьыгъэр Iофыгъо зэфэшъхьафхэм чанэу ахэлэжьэнхэр, командэмэ яамалхэр къызэIухыгъэнхэр ыкIи студенческэ сооб­ществэм хэхъоныгъэ егъэшIыгъэнымкIэ зэрэ Урысыеу пштэмэ, ахэм яIахь халъхьаныр ары.
● «Къэсэгъэнафэ» зыфиIорэр зыфэгъэзагъэр апшъэрэ гъэсэныгъэм епхыгъэ упчIэ шъхьаIэу къэтэджыхэрэмкIэ Урысыем ушэтынхэр щашIынхэр, цIыфхэм яшIошIхэр зэрагъэшIэнхэр ары.
«О уикIогъу» — ар проект къодыеп. Ар сообществэу щыт, хэгъэгум истудентхэр зэкIэ зэрепхых. Ятфэнэрэ едзыгъор хэушъхьафыкIыгъэу ыкIи мэхьанэшхо иIэу теплъы: зэнэкъокъу трекитфэу ттIупщыгъэмэ студенческэ гукъэкIыбэмэ ыкIи амалыбэмэ алъыIэ­сыщт. Мыщ хэлэжьэнэу шIоигъоныгъэ зиIэ студентхэм зэфэдэ амалхэр яттынэу тыфай, джащ пае купхэм афэшъхьафэу, мыгъэрэ ятфэнэрэ едзыгъом нэбгырэ пэпчъи хэлэжьэшъунэу тшIыгъэ. Тэ типшъэрылъ шъхьаIэр — студентхэм гукъэкIэу яIэхэмкIэ, Урысыем щеджэнхэмкIэ ыкIи IофыгъуакIэхэр щылъагъэкIотэнхэмкIэ тадэIэпыIэныр ары. Ащ пае проектым стипендие ыгъэнэфагъ. Обществэшхом зэрэщыщхэр, яхэгъэгу инеущырэ мафэ зыфэдэщтымкIэ пшъэдэкIыжь зэрахьырэр ныбжьыкIэмэ зэхашIыкIынэу тыфай», — къыхигъэщыгъ Урысые студенческэ проектэу «О уикIогъу» зыфиIорэм ипащэу Юлия Епифановам.
Шъугу къэдгъэкIыжьын, президентскэ плат­формэу «Урысыер — амалыбэхэм яхэгъэгу» зыфиIорэр УФ-м и Президентэу Владимир Путиным иунашъо тетэу 2018-рэ илъэсым, жъоныгъуакIэм и 22-м агъэпсыгъагъ. Пшъэ­рылъ шъхьаIэу иIэр — нэбгырэ пэпчъ зэфэдэ амалхэр рагъэгъотызэ, Урысыем инеущырэ мафэ игъэпсын. Сэнэхьатэу цIыфыр зэрыла­жьэрэм, зыщыпсэурэ чIыпIэм, унагъоу къы­зэрыхъухьагъэм ямылъытыгъэу, хэти платформэр IэпыIэгъу фэхъу. Платформэм и ЛъыплъэкIо совет Владимир Путиныр ипащ.
Илъэсихэу проектыр зылажьэрэм къыщегъэжьагъэу Урысыем ишъолъыр 89-мэ, хэгъэгуи 150-мэ ащыпсэурэ цIыфхэр ащ хэлэжьагъэх. Непэрэ мафэм платформэм ипроект нэбгырэ 2000000 хэтэу къалъытэ.