Бизнесым пылъхэм хэ­б­зэIахьхэр къызэрыкIоу атынхэм тегъэпсыхьэгъэ «автоматизированнэ» шIыкIэр нэбгырэ мин 22,7-мэ агъэфедэ.

Илъэсэу къихьагъэм ищылэ мазэ и 1-м къыщыублагъэу ар къалэу Байконур ыкIи УФ-м ишъолъыр 58-мэ алъыIэсыгъ. Ахэм ащыщых Адыгеир, Татарстан, къалэу Москва, Подмосковьер, Калужскэ хэкур. Илъэ­сыр къызихьагъэм ыуж предприниматель мини 5 фэдиз зыгъэфедэхэрэм къахэхъуагъ.
Къихьащт мэзаем и 1-м сис­те­мэр зылъыIэсыгъэхэм респуб­ликэхэу Карелиер, Марий Эл, Белгородскэ, Свердловскэ ыкIи Запорожскэ хэкухэр, Ненецкэ автоном округыр, гъэтхапэм и 1-м щыублагъэу Донецкэ Народнэ Республикэр къахэхъощтых.
КъызэрыкIоу хэбзэIахьхэр тыгъэнхэм тегъэпсыхьэгъэ шIыкIэр нахьыпэкIэ зыгъэфедэщтыгъэ организациехэр, унэе пред­принимательхэр, ежь-ежьырэу IофшIэн къызфэзгъотыжьыгъэхэр 2025-рэ илъэсыр къызихьагъэм къыщыублагъэу ежьхэр зыфэе мазэм «автоматизированнэ» системэм техьанхэ алъэкIыщт. НахьыпэкIэ щылэ мазэм и 1-р ары пIалъэу иIагъэр. ХэбзэIахьхэр зэратыщтыгъэ системэр зэрэзэблахъугъэм ахэм афэгъэ­зэгъэ къулыкъур щагъэгъозэнэу ары ныIэп ащ ищыкIагъэр. ГущыIэм пае, мэлылъфэгъум и 1-м щыублагъэу ащ фэдэ шIыкIэмкIэ хэбзэIахьхэр ытынхэу изыхъухьагъэм гъэтхапэм и 31-м шIомыкIэу лъэIу тхылъыр ытын фае.
Шъолъырыр мы системэм зэрэхэлажьэрэм, ащ утехьаным шапхъэу пылъхэм защызгъэгъуа­зэмэ зышIоигъохэм хэбзэIахьхэмкIэ къулыкъум иинтернет нэкIубгъо къызфагъэфедэн алъэкIыщт.