КIымэфэ лъэхъаным ­иаужырэ мазэу мэзаер къихьагъ. Бэмэ агъэшIагъоу щылэ мазэр фабэу ыкIи гъушъэу икIыгъ. Адэ мэзаем ом изытет сыд фэдэщта? Мы уп­чIэм иджэуап бэхэр егъэ­гумэкIых.

ЛатиныбзэкIэ «февралым» къикIырэр зыгъэкъэбзэжьыныр ары. Ижъырэ Урысыем мы мазэм илъэсыр зэфишIыжьыщтыгъ, ащ къыхэкIэу «меженькIэ» еджэщтыгъэх. Тэ тикъыблэ лъэныкъокIэ мэзаем зэре­джэ­хэрэр «ветродуй». Мафэм нэфынэу щыIэм хахъозэ джы лъыкIотэщт, сыхьатитIу фэдиз мэзаем икIыхьагъэ хэхъощт, ащ къыхэкIэу тыгъэри нахьыбэрэ къепсыщт.
ГидрометеорологиемкIэ ыкIи тыкъэзыуцухьэрэ дунаим имониторингкIэ Гупчэм ипащэу Александр Митровым тызэрэщигъэгъозагъэмкIэ, щылэ мазэм фэдэу мэзаери фэбэщт. Арэу щытми, къызщыучъыIыщт ма­фэ­хэри къыхэкIыщтых. Къе­щхыщт, нэужым ос цIынэр къы­кIэлъы­кIощт. КъызыщыучъыIырэ
уахътэм мылыр чъыгхэм ыкIи элек­тричествэм ирыкIуапIэхэм апи­шIыхьащт. Ошъуапщэу, гъогухэр цIэнлъагъоу къыхэкIыщт. Жьыбгъэр нэгъэупIэпIэгъум метрэ 15-м ехъоу къепщэщт.
— Мэзаем температурэр зыпкъ итыщтэп. Мазэм къы­кIоцI арктикэ жьы чъыIэр, джащ фэ­дэу средиземноморскэ лъэныкъом къикIырэ фабэр къыхьыщт. Мы аужырэ илъэс 80-м мэзэе мазэр нахь чъыIэу къызщыхэ­кIыгъэр 1950-рэ илъэсыр ары, градус 31,6-рэ агъэунэфыгъагъ. Анахь фабэу къызщыхэкIыгъэр 2016-рэ илъэсыр ары, ащыгъум градус 24-рэ щыIагъ.
ГурытымкIэ мазэм къыкIоцI температурэр ыкIи ощх-осэу къехыщтыр шапхъэхэу щыIэхэм афэдизыщт ыкIи нахьыбэуи къыхэкIыщт.
Апэрэ мэфипшIыр. Чэщым чъыIэр градуси 2 — 3-м фэ­дизыщт, къыхэкIыщт чъыIэр градуси 10-м зыщынэсыщтри. Мафэм фабэу градуси 8 — 13 щыIэщт.
ЯтIонэрэ мэфипшIыр. Чэщ­хэр чъыIэщтых, къыхэкIыщтых градуси 8 — 13-щыIэу, фабэр градуси 5-м зыщынэсыщт ма­фэхэри къыхэкIыщт.
Ящэнэрэ мэфипшIыр. Мэзаем икIэухым чэщым чъыIэу градуси 2 — 3 щыIэщт, къызыу­чъыIыкIэ градуси 9-м кIэхьащт. Мафэм фабэр градуси 6-м нэ­сыщт. КъыхэкIыщтых фабэр градус 12-м зыщыкIэхьащт ма­фэхэри.
Мы мазэм бжыхьасэхэм чъыIэр къягоощтэп. Псыхъохэм адэт псыр шапхъэу щыIэхэм ашIокIыщтэп. Къушъхьэхэм ателъ осыр къызщигъэжъурэ уахътэм ыкIи лъэшэу къызе­щ­хырэм, псыхъохэм адэт псыр къыдэкIоещт.
КIАРЭ Фатим.