Адыгэ Республикэм и Къэралыгъо учреждениеу «IофшIэнымкIэ ыкIи цIыфхэр социальнэу къэухъумэгъэнхэмкIэ и Гупчэрэ» ащ икъутамэхэмрэ тыгъуасэ автомобильхэр аратыгъэх. Iофтхьабзэм хэлэжьагъ АР-м иминистрэхэм я Кабинет и Тхьаматэ игуадзэу Виктор Орловыр.

АР-м IофшIэнымкIэ ыкIи социальнэ хэхъоныгъэмкIэ иминистрэу Мырзэ Джанбэч къызэриIуагъэмкIэ, Гупчэм иIофшIэн нахь дэгъоу зэхэщэгъэным фэшI автомобильхэр ятыгъэнхэм кIэ­лъэIухэу АР-м и ЛIышъхьэ зы­фагъэзагъ ыкIи ащ къадыра­гъэштагъ. Мыщ пэIухьэгъэ мылъкур республикэ бюджетым къыхахыгъ.
Республикэм ипащэу КъумпIыл Мурат пшъэрылъэу къыфишIыгъэм тетэу Виктор Орловым автомобильхэм яIункIы­бзэхэр аритыжьыгъэх.
— Сомэ миллион 13-м ехъу зыпэIухьэгъэ автомобиль 11 Гупчэм ыкIи ащ икъутамэхэу районхэм ащыIэхэм яттыжьыгъ. КъэIогъэн фае, 2025-рэ илъэсым щылэ мазэм и 1-м къыщыублагъэу IэпыIэгъу зищыкIагъэхэм алъыплъэгъэнымкIэ ыкIи ахэр къэгъэгъунэгъэнхэмкIэ фитыныгъэхэр IофшIэнымкIэ ыкIи социальнэ хэхъоныгъэмкIэ Министерствэм ратыжьыгъ. Ар тэрэз ыкIи игъо шъыпкъ. Хэбзэгъэуцугъэм къызэрэдилъытэу, Iэпы­Iэгъу зищыкIагъэу зылъыплъэ­хэрэм адэжь социальнэ Iофы­шIэхэр илъэсым къыкIоцI пчъа­гъэрэ кIонхэ фае. Ау районхэм ащыIэ къоджэ псэупIэхэр зэ­бгы­рыдзыгъэу зэрэщысхэм къы­хэкIэу зэкIэми икъоу алъы­Iэсышъухэрэп. Тэхъутэмыкъое ыкIи Мыекъопэ районхэу цIыфыбэ зыщыпсэухэрэм автомобиль тIурытIу афэтщэфыгъ. Мы лъэбэкъум ишIуагъэкIэ гъэлъэшыгъэ шIыкIэм тетэу IэпыIэгъу зищыкIагъэхэм анаIэ атыра­гъэтынымкIэ IофшIэныр нахьы­шIоу зэхэщагъэ зэрэхъу-­щтым сицыхьэ телъ, — къы­Iуагъ В. Орловым.
КъэIогъэн фае, мы мафэм ехъулIэу Адыгэ Республикэм сабый ибэ ыкIи зянэ-зятэ зышъхьащымытыжь нэбгырэ 1302-рэ, джащ фэдэу зыныбжь хэкIотагъэу лъыплъэн зищыкIэгъэ 1362-рэ щэпсэу. Ахэм адэжь Гупчэм иIофышIэхэр ренэу макIох, щы­IэкIэ-псэукIэу яIэр зэрагъэлъэгъу, яхэбзэ фитыныгъэхэр ыкIи япсэупIэхэр къэухъумэгъэн­хэмкIэ яшIуагъэ арагъэкIы. Та­пэкIи ящыкIэгъэ IэпыIэгъур арагъэгъотынымкIэ автомобильхэр амалышIу хъущтых.
КIАРЭ Фатим.