Къоджэ псэупIэхэм хэхъоныгъэ ягъэшIыгъэным фэгъэхьыгъэ Iофтхьабзэхэр 2025-рэ илъэсым Адыгеим щылъагъэкIуатэх. ЦIыфхэм ящыIэкIэ-псэукIэ нахьышIу шIыгъэным ыкIи социальнэ инфраструктурэм игъэкIэжьын ахэр афытегъэпсыхьагъэх.

Адыгэ Республикэм финансхэмкIэ и Министерствэ къызэритыгъэмкIэ, а Iофыгъохэм сомэ миллиард 1,5-рэ апаIуа­гъэхьащт, ащ щыщэу сомэ миллион 1344,2-р федеральнэ бюджетым къытIупщыщт.
Къуаджэхэм адэсхэм япсэупIэ амалхэр нахьышIу афэшIыгъэнхэм, къоджэ шъолъырхэм ятеплъэ непэрэ уахътэм диштэу зэтегъэпсыхьэгъэным, транспорт инфраструктурэм хэгъэхъогъэным Iофтхьабзэхэр афэIорышIэщтых.
Аужырэ илъэситфым ащ фэдэ Iофхэм язэшIохын Адыгеим сомэ миллиарди 6 щытырагъэкIодагъ, псэолъи 173-рэ агъэцэкIэжьыгъ е кIэу ашIыгъ. Мы программэм районэу республикэм итхэр зэкIэ зэлъеубыты, ахэм ащыпсэурэ цIыфхэр Iоф­шIэнхэр зэрэрекIокIыхэрэм егъэразэх.