Зэзэгъыныгъэм зэдыкIэтхагъэх
Пшызэ щыпсэурэ къэзэкъ ныбжьыкIэмэ я Союз и Координационнэ совет игъэкIотыгъэ зэхэсыгъо щылэ мазэм и 28-м къалэу Краснодар щызэхищагъ.
Адыгеим ыцIэкIэ Iофтхьабзэм хэлэжьагъэх лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ АР-м и Комитет итхьаматэ игуадзэу Константин Щербаковыр, АР-м илIыкIоу Краснодар краим игубернатор дэжь щыIэм игуадзэу АкIэгъу Арамбый, Мыекъопэ къэзэкъ отделым иатаманэу Сергей Захаровыр, ащ игуадзэу Александр Роговыр. Ары Адыгэ шъолъыр кIэлэцIыкIу-ныбжьыкIэ общественнэ движениеу «Адыгэ Республикэм икъэзэкъ ныбжьыкIэхэм я Союз» зыфиIорэм ипащэу хадзыгъэри.
Зэхэсыгъом къыдыхэлъытагъэу шъолъыр ныбжьыкIэ движениехэу — Пшызэ къэзэкъыдзэм икъэзэкъ ныбжьыкIэхэм я Союзрэ Адыгэ Республикэм икъэзэкъ ныбжьыкIэхэм я Союзрэ зэрэзэдэлэжьэщтхэмкIэ зэзэгъыныгъэм зэдыкIэтхагъэх.
«Тиорганизациехэм зэпхыныгъэ пытэ яIэнымкIэ мы зэзэгъыныгъэр мэхьанэ зиIэ лъэбэкъоу щыт. ТиIофшIэн зыкIыныгъэ хэлъыным, къыткIэхъухьэхэрэм яхэгъэгу шIу алъэгъоу тпIунхэм, къэзэкъ хабзэхэр къэтыухъумэнхэм, ныбжьыкIэхэр нахь чанэу шъолъырым иIофхэм ахэгъэлэжьэгъэнхэм ар афэIорышIэщт», — къыкIигъэтхъыгъ Александр Роговым.
ИIофшIэн гуетыныгъэ зэрэфыриIэм ыкIи IэпэIэсэныгъэшхо хэлъэу дзэ-патриотическэ нэшанэхэмкIэ къэзэкъ ныбжьыкIэхэр зэрипIухэрэм, къэзэкъ шэн-хабзэхэр къызэриIэтыжьхэрэм афэшI Краснодар краим и Хэбзэгъэуцу ЗэIукIэ и Рэзэныгъэ тхылъ Мыекъопэ къэзэкъ отделым иатаман игуадзэу Александр Роговым къыфагъэшъошагъ.