Ежь иунэе Iоф къызэIуихынымкIэ къэралыгъо программэу «Агро­стартапыр» блэкIыгъэ илъэсым Адыгеим бэмэ ща­гъэфедагъ.

Кощхьэблэ район закъор пштэмэ, сомэ миллион 41-м нахьыбэр нэбгырэ 16-мэ афа­тIупщыгъ. Ахэм ащыщ Блащэпсынэ щыпсэурэ Шэуджэн Къамболэт.
КIэлэ ныбжьыкIэм, илъэс
24-рэ ыныбжь, былымхъуным зыфигъэзэн гухэлъ гъэрекIо зешIым, ублапIэмкIэ «Агростартапыр» амалышIоу ылъытагъ ыкIи программэм хэлэжьагъ. Сомэ миллиони 2-рэ мин
600-у къыратыгъэм ежьыми хигъахъуи, былымышъхьэ 40 Къамболэт къыщэфыгъ.
— Былымышъхьэ заулэ апэ къэсщэфи, сеплъыгъ сфэIы­гъыщтхэмэ, федэ хъущтмэ. Сыгу рихьыгъ. Арыти, «Агростартапым» ишIуагъэкIэ сиунэе Iоф къызэIусхыным, нахьыбэ зэзгъэ­гъотыным сытегушIухьагъ ыкIи сыкIэгъожьырэп. Къыхэсхыгъэр лы къэзытырэ былымых. Ангусскэ лъэпкъым щыщых. Лыщэным ылъэныкъокIэ сылэжьэнэу сыфай, — къыддэгощагъ унэе хъызмэтшIапIэу «Шэуджэн» зыфиIорэм ипащэу Шэуджэн Къамболэт.
Былымхэм адакIоу, ахэм апае Iусым игъэхьазырынкIэ, изэтегъэпхъынкIэ ищыкIэгъэщт техникэри Къамболэт ыщэфыгъ. Мэкъур, хьэуарзэр икъоу егъэ­хьазыры. «Ыныбэ изэу къабзэу пIыгъмэ — джары былымым ищыкIагъэр», — еIо мэкъумэщышIэ ныбжьыкIэм. БылымIусымкIэ иIоф къэзыгъэпсынкIэщтхэм ащыщ чIыгулэжьынми зэрэпылъыр. Гектар 15-р елэ­жьы. Мыгъэ коцыр ыпхъыгъ.
Ау Къамболэт лъэныкъорыгъазэу щытэп. Мэкъумэщ хъыз­мэтэу ыIыгъым дакIоу Iоф­шIэпIэ шъхьаIэми щэлажьэ — ошIэ-дэмышIэ IофхэмкIэ рес­публикэ къулыкъум икъутамэу Кощхьэблэ районым щыIэм хэт. Мы лъэныкъомкIэ сэнэхьат языгъэгъотырэ колледжыр къыу­хыгъ. Апшъэрэ еджапIэм заочнэу щеджэ ыкIи илъэс хъугъэу Iоф дешIэ. УныбжьыкIэу чылэм удэсыщтмэ, непэ амалыбэ щыIэу ащ елъытэ.
— ШIоигъоныгъэ уиIэмэ, непэ бэ пфызэшIокIыщтыр. Адэ ушъхьа­хэу ущысымэ зэкIэри дэищт. Сэ къуаджэм сыдэсыщт, ащкIэ мурадхэри сиIэх. Былы­м­ышъхьэ пчъагъэми, техникэу си­Iэми ахэзгъэхъонэу сыфай, — къыддэгуащэ тигущыIэгъу.
ЛIэныгъэм ынэ кIэплъэгъэ кIэлэ ныбжьыкIэм игубзыгъагъэ бгъэшIэгъонэу щытэп. Хэу­шъхьа­фыкIыгъэ дзэ операциер къе­жьэгъакIэу зэуапIэм кIонэу хъу­гъагъэ. Илъэсныкъоу ащ зэрэщыIагъэм нэмыкI нэхэмкIэ бэмэ аригъэплъыгъ.
— Ары, гу зылъысымытэщтыгъабэмэ сынаIэ атесыдзэ сы­хъугъ. ЗэзэгъыныгъэкIэ къулыкъу схьы­зэ, илъэсныкъо къысфэнагъэу, хэушъхьафыкIыгъэ дзэ опера­циер къежьагъ. Мэзаем къыщыублагъэу бэдзэогъум нэс ащ сыщы­Iагъ. СипIалъэ зысэу­хым сы­къэкIожьыгъ. Арышъ, бэ­мэ уасэ афэсшIыгъ. Мы былымхэм сызэрахэтым сегъатхъэ. СыгукIэ зысэгъэпсэфы, — еIо кIалэм.
Непэ Къамболэт ыIыгъ бы­лым­хэм яIугъэкIын бжыхьэм ыублэн имурад. «Мраморнэ» зыфаIорэ лым непэ бэхэр кIэ­упчIэх, арышъ, федэкъэкIуапIэ хъунэу мэгугъэ.
Анцокъо Ирин.