Адыгеим и ЛIышъхьэу КъумпIыл Мурат промышленнэ паркэу «Инэм» зыфиIоу атIупщынэу агъэхьазырырэм щыIагъ.

Ащ игъусагъэх АР-м ими­нистрэхэм я Кабинет и Тхьаматэу КIэрэщэ Анзаур, Тэхъу­тэмыкъое районым ипащэу Шъэо Аскэр, Iахьзэхэлъ обществэу «Адыгэ Республикэм хэхъоныгъэ егъэшIыгъэнымкIэ корпорацием» ипащэу Дыдыхъу Алый.
Шъугу къэтэгъэкIыжьы промышленнэ шъолъырым пае псэупIэу Инэм пэмычыжьэу гектар 200 зэлъызыубытырэ чIыпIэ къызэрэхагъэкIыгъэр. Пшъэрылъыбэ зыгъэцэкIэщт паркрэ индустриальнэ паркэу «Инэмрэ» ащ щагъэпсыгъэх. Производственнэ компаниехэр, предпринимательствэ цIыкIум ыкIи гурытым япредприятиехэр къызщызэIуахынхэ алъэкIыщт промышленнэ шъолъырышхом 2025-рэ илъэсым иапэрэ квартал Iоф ышIэу ригъэжьэщт.

Ащ пае федеральнэ, респуб­ликэ мылъкоу сомэ миллиарди 3,3-рэ хъурэмкIэ ищыкIэгъэ транспорт-инженер инфраструктурэм игъэпсын аухыгъ. Промышленнэ шъолъырым электроэнергиер, газыр, псыр къыIэ­кIахьэх, псыIущыпIэр щагъэ­п­сыгъ. Джащ фэдэу промышлен­нэ паркэу «Инэмым» ад­министративнэ унэрэ квадрат мет­рэ мини 4,6-рэ зэлъызыубытырэ промышленнэ унэрэ щагъэпсыгъэх.
Адыгеим и ЛIышъхьэ джырэ шапхъэхэм адиштэрэ унэр къы­зэпиплъыхьагъ. Республикэм ихэбзэ къулыкъухэм инвестиционнэ политикэ шъхьэихыгъэу зэрахьэрэм ишIуагъэкIэ компаниябэмэ промышленнэ шъо­лъы­рым анаIэ къытырадзэ. Резидентхэм хэбзэIахь фэгъэкIо­тэнхэр афашIыщтых, фэгъэкIотэныгъэ хэлъэу бэджэндыпкIэр ара­гъэтыщт, административнэ Iофыгъохэм язэшIохынкIэ IэпыIэгъу афэхъущтых. Паркым игъэIорышIэпIэ компаниеу Iахьзэхэлъ обществэу «Адыгэ Республикэм хэхъоныгъэ егъэшIыгъэнымкIэ корпорацием» резидент хъун зылъэкIыщтхэм Iоф адешIэ. Инвесторхэм ащыщыбэмэ проектым къыхэла­жьэ­мэ ашIоигъу, компание заулэмэ промышленнэ шъолъырым ире­зидент хъунхэм зэрэфэхьа­зырхэр къаIуагъ. ЗэкIэми апэ игъэ­шъыгъэн фаер маркетплейсэу «Озон» зыфиIорэр ары. БэшIагъэ мы компанием Адыге­им Iоф зыщишIэрэр, джыдэдэм зичэзыу инвестиционнэ про­ектыр ащ пхырещы — пшъэ­рылъыбэ зыгъэцэкIэщт паркым логистическэ гупчэшхоу «Озон» зыфиIоу гектар 20 зэлъызыубытырэм игъэпсын щэкIо. Джащ фэдэу промышленнэ паркэу «Инэмым» якомпаниехэр къыщызэIуахынэу резидентитIу ыуж ит. Мыщ вентиляционнэ обо­рудование къыщыдагъэкIынэу рахъухьэ. ПшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «ПЭТ-эксперт» зыфиIорэм шъонхэр зэрагъэ­хъощт пластикэр мэлылъфэгъум къыщегъэжьагъэу къыдигъэкIын имурад. Производствэр автоматизацие зэрашIыщт оборудованиякIэм игъэуцун джыдэдэм ыуж итых.

Компанием ипащэхэм АР-м и ЛIышъхьэ зэрэфэразэхэр къаIуагъ япроект къызэрэдыригъэштагъэм ыкIи ащ ипхырыщынкIэ ищыкIэгъэ амалхэр зэрэзэрихьагъэхэм афэшI. Джы­дэдэм пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «ПЭТ-эксперт» зыфиIорэм хэгъэгум ишъолъыр зэфэшъхьафхэм арыт предприятии 4 хэхьэ. 2019-рэ илъэсым къыщегъэжьагъэу компанием Адыгеим Iоф щешIэ. ПроизводствакIэм ишIуагъэкIэ респуб­ликэм продукциеу къыщыда­гъэ­кIырэр нахьыбэ хъугъэ, Уры­сыем и Къыблэ ишъолъыр пстэуми, чIыпIакIэхэм, Закавказьем ихэгъэгухэм ар аIэкIагъэхьан алъэкIыщт.
Промышленнэ шъолъырым хэхъоныгъэу ышIыщтхэм къа­тегущыIэзэ, АР-м и ЛIышъхьэ Iахьзэхэлъ обществэу «Адыгэ Республикэм хэхъоныгъэ егъэшIыгъэнымкIэ корпорацием» ипащэ пшъэрылъ заулэ къыфи­шIыгъ. КъумпIыл Мурат пшъэ­рылъ афишIыгъ шIуагъэ къытэу промышленнэ паркыр къызфагъэфедэнэу, зиIоф дэгъоу кIэкIырэ компаниехэм гъусэныгъэ адашIынэу. Республикэм ипащэ къызэриIуагъэмкIэ, ащ фэдэ IофшIэным ишIуагъэкIэ Адыгеим къыщыдагъэкIырэм, хэбзэIахьэу къатырэм ахэхъощт, IофшIэпIэ чIыпIакIэхэр зэхэщагъэ хъущтых.

«Тиджырэ лъэхъан хэгъэгум ипромышленность зегъэушъомбгъугъэнымкIэ Урысыем и Пре­зидентэу Владимир Путиным къыгъэуцугъэ пшъэрылъхэр гъэцэкIэгъэнхэмкIэ индустриальнэ шъолъырхэм яшIын мэхьанэшхо иI. Промышленнэ пар­кэу «Инэмым» республикэм ипромышленность зыкъызэрэригъэIэтыщтымкIэ, бизнес цIыкIумрэ гурытымрэ япроизводственнэ чIыпIэ пэрытэу ар зэ­рэхъущтымкIэ, инвестиционнэ проектыкIэхэр зыщагъэцэкIэщт чIыпIэу тлъытэнымкIэ лъэпсэ пстэури щыI. Промышленнэ шъо­лъырыр анахь къахэзыгъэщ­хэрэм зэу ащыщ инфраструктурэ хьазыр зэриIэр, проектхэм ягъэцэкIэнкIэ ищыкIэгъэ амалхэр зэрэщыIэхэр, индустриальнэ шъолъырым чIыпIэ Iэрыфэгъу зэриубытырэр. Джыдэдэм мэхьанэшхо зиIэр резидентхэм гъусэныгъэ дэгъу адыряIэныр, производствэхэр зэхащэхэ зы­хъукIэ шIуагъэ къытэу чIыпIэр къызыфагъэфедэныр ары. Проект пэпчъ шIуагъэ къыкIэкIон фае», — къыIуагъ КъумпIыл Мурат.
ПстэумкIи промышленнэ пар­кэу «Инэмым» хъызмэтшIэпIэ 50-м нэс къыхырагъэубытэнэу рахъухьэ. Проектхэр загъэцакIэхэкIэ промышленнэ шъо­лъырым иIофшIэпIэ чIыпIэхэм мини 10-м нэс къахэхъощт, 2035-рэ илъэсым ехъулIэу сомэ миллиард 55-рэ фэдиз хъурэ инвестициехэр къыхалъхьащтых. Джыдэдэм мыбюджет инвес­тициехэу сомэ миллиарди 3,8-рэ хъурэр агъэфедагъ.