Мыекъуапэ нэмыц-фашист техакIохэм къатырахыжьи, шъхьафит зашIыжьыгъэр илъэс 82-рэ зэрэхъурэм фэгъэхьыгъэ Iофтхьабзэ Гупчэ мемориалым тыгъуасэ щыкIуагъ.
Ащ хэлэжьагъ Адыгеим и ЛIышъхьэу КъумпIыл Мурат.

Хэгъэгу зэошхом щыфэ­хыгъэхэм яшIэжь агъэлъэпIэнэу къекIолIагъэх АР-м иминист­рэхэм я Кабинет, Къэралыгъо Совет — Хасэм, къэлэ адми­нистрацием, хэ­б­зэухъумэкIо къулыкъухэм ялIы­кIохэр, къэ­ралыгъо фондэу «Хэгъэгум иухъумакIохэр» зыфиIо­рэм ишъолъыр къутамэ ипа­щэ­хэмрэ иIофы­шIэхэмрэ, дзэ­къулы­къушIэхэр, общественнэ IофышIэхэр, къэлэдэсхэр.
Къэзэрэугъоигъэхэм «Егъэ­шIэрэ машIом» къэгъэгъэ блэр­хэр кIэралъхьагъэх, Мые­къуапэ къэзыухъумагъэхэм, фашистыдзэхэр ифыжьыгъэнхэм зыпсэ фэзытыгъэхэм зы такъикъэ афэшъыгъуагъэх.
Илъэсныкъом ехъу, 1942-рэ илъэсым шышъхьэIум и 9-м къыщегъэжьагъэу 1943-рэ илъэсым щылэ мазэм и 29-м нэс, нэмыцхэм къалэр аIыгъыгъ. Мы мазэхэр хэткIи охътэ къиныгъ. ТичIыгогъубэ­хэр хэкIодагъэх ыкIи хьа­за­бхэр зэпачыгъэх. Унэхэр, гъогубэхэр ыкIи социальнэ учреждениехэр зэхакъута­гъэх. Ау къэлэдэсхэм ягукIуа­чIэ нэмыцхэм акъутэн алъэ­кIыгъэп. Мыекъуапэ щыпсэу­хэрэм ащыщыбэхэр партизан отрядхэм ахэхьагъэх ыкIи текIоныгъэр къагъэблэгъэным яIахьышIу халъхьагъ. Ахэм зэу ащыщ зэлъашIэрэ лIы­хъужъ-пионерэу Женя По­повыр. Зэпхыныгъэм илиние зэригъэфыкъуагъэм фэшI ар фашистхэм аукIыгъагъ.

— ТилIыхъужъхэм тарэгушхо ыкIи яшIэжь тэгъэлъа­пIэ, тятэжъ пIашъэхэм зэрахьэгъэ лIыгъэм шъхьащэ фэтэшIы. Ахэм зэрахьэгъэ лIыхъужъныгъэм ыкIи лIыгъэм яшIуагъэкIэ ти Родинэ цIыкIу икъалэхэр, икъуаджэхэр, ипоселкэхэр шъхьафит ашIыжьыгъэх. Зэоуж илъэсхэм къэралыгъор зэтезгъэуцожьыгъэхэми тафэраз. Джащ фэдэу Хэгъэгу зэошхом иветеранхэу непэ псаоу къытхэтхэм рэзэныгъэ гущыIэхэр афэтэгъэхьы. Ти­пшъэрылъ шъхьаIэр ТекIоныгъэр къыт­фыдэзыхыгъэхэм ахэлъыгъэ патриотизмэм, пытагъэм ящысэкIэ къыткIэ­хъухьэрэ лIэужхэр тпIунхэр, тарихъ шъыпкъэр къызэтедгъэнэныр ары. Непэ хэушъхьафыкIыгъэ дзэ операциеу кIорэм лъэпкъ зэфэшъхьафхэр зэкъотхэу дзэ пшъэрылъхэр зэрагъэцакIэрэм Хэгъэгум шIулъэгъоу ыкIи шъыпкъагъэу фыряIэр къегъэнафэ. Тятэжъ пIашъэхэм кIэнэу къытфыщанагъэр къызэрэтыухъумэрэр тизэолIхэм ялIыгъэ зекIуакIэ ишыхьат, — хигъэунэфыкIыгъ КъумпIыл Мурат.
Адыгеим и ЛIышъхьэ къэбар жъугъэм иамалхэм адыриIэгъэ зэдэгущыIэгъум къызэрэщыхигъэщыгъэмкIэ, Хэгъэгу зэ­ошхом ТекIоныгъэр къызыщыдахыгъэр илъэс 80 зэрэхъурэм тефэу УФ-м и Президентэу Владимир Путиным хэ­гъэ­гум иухъумакIо и Илъэсэу мыгъэ зэригъэнэфагъэм мы шIэжь Iофтхьабзэр итамыгъ.
ТекIоныгъэшхом ихэгъэунэфыкIын епхыгъэ шъолъыр Iофтхьабзэхэр агъэ­нэ­фагъэх ыкIи ащыщхэм япхырыщын рагъэжьагъ. Ахэм ащыщых: «ТекIоныгъэр сурэтшIыгъэхэмкIэ», «ТекIоныгъэм и Бы­ракъ», ТекIоныгъэм ишъхьангъуп­чъэхэр», «Уи ЛIыхъужъхэр», «ШIэжьым ишэф», «Георгиевскэ кIэпсэжъыер», нэмыкIхэри. Хэгъэгу зэошхом ишIэжь фэгъэхьыгъэ тарихъ сыхьатхэр, кинохэм якъэгъэлъэгъон, нэмыкIхэри рагъэкIо­кIыщтых.
Мы уахътэ зэкIэ республикэм ирайонхэм патриотическэ Iофтхьабзэу «ШIэ­жьым и Вахтэ» ащэкIо, Адыгеир шъхьафит зашIыжьыгъэ мэзаем и 18-м ар аухыщт.
Iэшъынэ Сусан.