Хэгъэгум иухъумакIо и Илъэс икъызэIухын, ­Хэгъэгу зэошхом ТекIоныгъэр къызыщыдахыгъэр илъэс 80 зэрэхъурэр, тидзэхэм фашист техакIохэр зэхакъутэхи, Адыгеир ыкIи Мыекъуапэ шъхьафит зэрашIы­жьыгъэхэм афэгъэхьыгъэ игъэкIотыгъэ Iоф­тхьабзэ щылэ мазэм и 29-м Мыекъуапэ щы­кIуагъ.

Ащ хэлэжьагъэх Мыекъопэ къэлэ администрацием ипащэу Геннадий Митрофановыр, народнэ депутатхэм я Совет ­итхьаматэу Джармэкъо Азмэт, хэбзэухъумэкIо къулыкъухэм ыкIи шъолъыр фондэу «Хэгъэгум иухъумакIохэр» зыфиIорэм ялIыкIохэр, Iэшэ зэIуупIэны­гъэхэм яветеранхэр, юнармием хэтхэр, Адыгэ къэралыгъо университетым истудентхэр.
— Хэгъэгум иухъумакIо и Илъэс ыкIи Хэгъэгу зэошхом ТекIоныгъэр къызыщыдахыгъэр илъэс 80 зэрэхъурэр непэрэ патриотическэ IофтхьабзэмкIэ къызэIутэхых. Дзэ тарихъым ишIэжь мафэхэр хэдгъэунэфыкIыхэзэ, тикъалэ ыкIи Адыгеир шъхьафит зышIыжьыгъэхэм, зэоуж илъэсхэм къалэр щыIэныгъэм фытезгъэпсыхьажьы­гъэхэм шъхьащэ афэтэшIы. Хэ­гъэгу зэошхом илъэхъан зэ­рахьэгъэ лIыхъужъныгъэр хэткIи щысэтехыпI. ШIэжьыр къызэтедгъэнэныр, тиныбжьыкIэхэр патриотизмэм фэтпIунхэр типшъэрылъ шъхьаIэхэм зэу ащыщ. Урысыем ицIыф лъэпкъ зэфэшъхьафхэм ялIыкIохэр зэкъотхэу хэушъхьафыкIыгъэ дзэ операцием хэлажьэх, къэралыгъом игухэлъхэр, игъунапкъэхэр щытхъу хэлъэу къаухъу­мэх. Офицерхэр, дзэкIолIхэр, гуфакIохэр зэмыблэжьхэу цIыф­хэм яшъхьафитныгъэ, къэра­лыгъом ищынэгъончъагъэ зэ­рэ­фэбанэхэрэм я Хэгъэгу шIу­лъэгъоу фыряIэр къаушыхьаты. Урысыем и Дзэ илъэшыгъэ ыкIи ТекIоныгъэр къызэрэдихыщтым тицыхьэ зэрэтелъым щылэ ма­зэм и 29-р, Мыекъуапэ шъхьафит зашIыгъэ мафэр, ишыхьат орэхъу, — хигъэунэфыкIыгъ Геннадий Митрофановым.
Къэлэ депутатхэм ацIэкIэ Джармэкъо Азмэт къэзэрэу­гъоигъэхэм закъыфигъэзагъ.
— Мамыр щыIакIэ непэ тиIэным зыпсэ емыблэжьэу фэбэнэгъэ цIыфхэм шъхьащэ зыща­фэтшIырэ зэIукIэгъоу мыр щыт. Илъэс 82-кIэ узэкIэIэбэжьымэ, советскэ дзэм ыкIи партизанхэм зэрахьэгъэ лIыхъужъныгъэм ыкIи лIыгъэм яшIуагъэкIэ Мыекъуапэ ыкIи Адыгеир шъхьафит ашIыжьыгъэх. ТекIоныгъэшхом ия 80-рэ илъэс ихэгъэунэфыкIын изы хъугъэ-шIагъэхэу мы ма­фэхэр хэтых ыкIи 2025-р къызихьагъэм щегъэжьагъэу ахэм афэгъэхьыгъэ Iофтхьабзэхэр едгъэжьагъэх. Тарихъыр зытет шъыпкъэр, чIэукъощагъэ хэмылъэу зыфэдагъэр тиныбжьыкIэхэм ашIэным, тятэжъ пIа­шъэхэм ялIэужхэу зэрэщытхэр, ахэм япэсыгъэу зекIонхэ зэрэфаер зэхашIэным ахэр фэIорышIэщтых, — къыIуагъ ащ.
Хэгъэгу зэошхом лIыхъужъныгъэ щызезыхьэгъэ тидзэ­кIолI­хэм яшIэжь зэрагъэлъапIэрэм, мэхьанэ зиIэ тарихъ хъугъэ-шIагъэхэм афэгъэхьыгъэ гущыIэхэр пчэгум щыIугъэх.
Патриотическэ мэхьанэ зиIэ Iофтхьабзэу Мыекъопэ къэлэ администрацием зэхищагъэр мэфэкI концертэу орэдыIо ыкIи къэшъокIо купхэм къагъэхьазырыгъэм къыгъэбаигъ.
Iэшъынэ Сусан.