Театрэм ыкlи кином яактерэу, УФ-м инароднэ артистэу Алек­сандр Пятковым итворческэ зэIукIэ Пушкиным ыцIэ зыхьырэ унэм щыкIуагъ.

Адыгеим и Театральнэ зэхахьэ иартистхэр, АР-м искусствэхэмкIэ иколледжэу Тхьабысымэ Умарэ ыцIэ зыхьырэм щеджэхэрэр ащ хэлэжьагъэх.
Сэнаущыгъэ ин зыхэлъ артистыр ыцIэкIэ зэкIэми къамышIэми, ирольхэмкIэ Урысыем щызымылъэгъугъэ гъоты­гъуае хъущт. Исэнэхьат зырылажьэрэм къыщегъэжьагъэу роль миным ехъу къышIыгъ. АщкIэ рекорд ыгъэуцугъэу Гиннессым итхылъ ыцIэ дэтхагъ.
Мыекъуапэ шъхьафит зашIы­жьыгъэ мафэм зэIукIэр зэрэтефагъэм мэхьанэшхо зэрэритырэр, кинематографистхэм
я Союз игукъэкIкIэ Адыгеим къы­зэрэкIуагъэр зэригуапэр Александр Пятковым ипэублэ гущыIэ къыщиIуагъ. Бэхэм яуп­чIэхэм апэ зыригъэшъэу сэнэ­хьатым къызэрэфэкIуагъэр, егъэ­жьапIэр зыфэдагъэр къыIотагъ. Ахэм ахэгъэщагъэу патрио­тическэ орэдхэр къыIуагъэх, усэхэм къяджагъ. «Дерсу Узала» зыфиIорэ фильмэу мыгъэ илъэс 50 хъурэм щыщ пычы­гъом зэIукIэм еблэгъагъэхэр рагъэплъыгъэх. Къэзэкъыдзэ пащэм иролэу ащ къыщишIыгъэмкIэ кином идунай ипчъэхэр Акира Куросавэ къыфызэIуихыгъэу Александр Пятковым елъытэ. Ащ дэжьым ар нэбгырэ мин 15-мэ къахихыгъагъ.

— Сыд фэдэу згъэшIэгъуагъа республикэм культурэмкIэ шъуими­нистрэ сыдэгущыIэзэ,
«Дерсу Узала» зыфиIорэр зы­тхыгъэ В. Арсеньевым фэгъэ­хьыгъэ фильм Адыгеим щытырахэу къызысеIом. Ар зытыра­хыгъэр илъэс 50 зыхъурэм ащ иавтор фильм зыщыфагъэхьазы­рырэ республикэм сыкъэкIонэу хъугъэ. Ащ фэдэ зэтефэныгъэр умыгъэшIэгъон плъэкIырэп, — къыIуагъ народнэ артистым.
Урыс шIэныгъэлэжьымрэ Уссурийскэ шакIомрэ язэфыщытыкIэу, язэныбджэгъуныгъэу фильмым лъапсэ фэхъугъэм ищысэкIэ Урысыер зэрэщытэу къыщыгъэлъэгъуагъэу Александр Пятковым елъытэ.
— Ар къэралыгъошхомрэ лъэпкъ цIыкIумрэ язэфыщытыкI. Ары Урысыер лъэшы зышIырэр — лъэпкъэу щыпсэухэрэр ары. Тэры Урысыер. Арышъ, а тари­хъым, «Дерсу Узала», иIахьыкIэ Адыгеим щытепхын фаеу сэ­лъытэ. Мамырныгъэ, зэгурыIоныгъэ, зэныбджэгъуныгъэ рес­публикэм илъ, — къыIуагъ Александр Пятковым.
Мыщ фэдэ артист цIэрыIохэр Адыгеим къыригъэблэгъэнхэр АР-м и Театральнэ зэхахьэ хэ­бзэ дахэ фэхъугъ. Непэ сэнэ­хьатым щылажьэхэрэр, ащ зы­фэзыгъэхьазырырэ ныбжьыкIэхэр IофшIэным нахь фэблэнхэмкIэ, яIэпэIэсэныгъэ хагъэ­хъонымкIэ мыщ фэдэ зэIукIэхэр къэкIопIэшхо хъухэу елъытэ АР-м и Театральнэ зэхахьэ ипащэу Ацумыжъ Рустам.
— Тинепэрэ хьакIэ актер лъэшхэм ащыщ. Джы къызнэсыгъэм фильмхэм, спектаклэхэм ахэлажьэ, режиссер дэгъухэм Iоф адешIэ. Мыщ фэдэ зэIукIэхэм язэхэщэнкIэ АР-м и ЛIышъхьи къыддырегъаштэ. Артистышхо­хэм акIырыплъыхэзэ тэтыехэм хахъо ашIынымкIэ, тиныбжьыкIэхэр зыфеджэрэ сэнэхьатыр нахь къагурыIонымкIэ ар амалышху. ТапэкIи а IофшIэныр лъыдгъэкIотэщт, — къыIуагъ Ацумыжъ Рустам.
ПстэумкIи гуфэбэныгъэшхо хэлъэу зэIукIэгъур кIуагъэ. Ащ хэлэжьагъэхэм яупчIэхэр хьа­кIэм фагъэзагъэх. КIэухым зэ­хэтхэу сурэт зытырахыгъ.
Анцокъо Ирин.