Проектхэу «ЛIыхъужъэу къэхъухэрэп» ыкIи «Хэгъэгум къулыкъу фэсэхьы» зыфиIохэрэм къызэрадыхэлъытагъэу, республикэм ит гурыт еджапIэхэм ащыщхэм лIы­хъужъныгъэм идесэхэр къэралыгъо фондэу «Хэгъэгум иухъумакIохэр» зыфиIорэм ишъолъыр къутамэ ащы­зэ­хищагъэх.

Станицэу Курджипскэм дэт гъэсэныгъэ гупчэу N 2-м хэушъхьафыкIыгъэ дзэ операцием иветеранэу Андрей Васнецовым, АдыгеякIэм игурыт еджапIэу N 29-м Денис Алеевскэм зэIукIэгъухэр ащыряIагъ. ЛIыгъэм ыкIи хэгъэгум ыпашъхьэ пшъэ­дэкIыжьэу щыряIэм ахэр къатегущыIагъэх.
Нахь игъэкIотыгъэу игугъу къэтшIын Мые­къуапэ игурыт еджапIэу N 3-м щыкIогъэ лIыхъужъныгъэм идесэ. ХэушъхьафыкIыгъэ дзэ операцием иветеранэу Эдуард Бараевым я 8 — 9-рэ классхэм арысхэм адыриIэгъэ зэ­Iу­кIэгъур сэмэркъэу нэша­нэр хэлъэу ригъэкIокIын ылъэкIыгъ. УIагъэу къыты­ращагъэм къыхэкIыкIэ ылъапшъэ пахынэу зэрэ­хъугъэр, нэмыкI къины­гъоу зэпичыгъэхэр дзэкъулыкъушIэм къафиIотагъ. Щэ­хэм ащызыухъумэрэ ныбалъэу илъэс 20-кIэ узэ­кIэIэбыжьымэ ашIыгъэу еджэпIэ музеим чIэлъыр зыщилъи аригъэлъэгъугъ. Нэужым ар кIэлэеджакIо­хэми зэрагъэпшэн амал яIагъ.
Эдуард Бараевыр мы гурыт еджапIэм щеджагъ. 2022-рэ илъэсым къыщегъэжьагъэу хэушъхьафыкIыгъэ дзэ операцием тIогъогогъо хэлэжьагъ, тIогъогогъурэ къауIагъ. Аужырэм лагъымэм теуцуи, операцие зэфэшъхьафхэр
ра­шIы­лIагъэх, ылъапшъэ имы­­Iэжьэу къэ­нагъ, ащ пае ыгъэзэжьынэу хъугъэп.
НыбжьыкIэхэм адыри­Iэгъэ зэIукIэгъум Эдуард анахьэу ынаIэ зытыригъэ­тыгъэр патриотизмэм имэхьан.
— Мы гущыIэм къикIырэ закъор къафэсIотэныр арэп сигухэлъыр, тинепэрэ патриотхэр зыфэдэхэр, уи Хэгъэгу шIу зыкIэплъэгъун фаер, ащ ифедэ къэдгъэгъунэнэу зэрэщытыр агурызгъэIоныр сипшъэрылъ. СэркIэ патриотизмэр си Хэгъэгу имызакъоу, си­унагъуи, къыспэблагъэхэри, сызщыщ лъэпкъыри шIу слъэгъунхэр ары. Ар — уицIыфхэр ыкIи уикъэралыгъо уарыгушхоныр. Ахэм афэгъэхьыгъэ зэдэгущыIэгъухэр кIэлэеджа­кIохэм адэпшIыным, яцIыкIугъом къыщегъэжьагъэу а гупшысакIэр алъыбгъэ­Iэсыным мэхьанэ иIэу сэ­лъытэ, — хигъэунэфыкIыгъ Эдуард Бараевым.
ЕджэпIэ музеим ипащэу Людмила Григоренкэм къызэриIуагъэмкIэ, мы гу­рыт еджапIэм пат­риотическэ Iофтхьабзэхэр бэрэ щызэхащэх. Илъэсыр къызихьагъэм къыщегъэ­жьагъэу Хэгъэгу зэошхом ТекIоныгъэр къызщыдахыгъэр илъэс 80 зэрэхъурэм фэгъэхьыгъэ Iофтхьабзэхэри джы рагъэжьагъэх.
Iэшъынэ Сусан.