Уголовнэ Iоф къафызэIуахыгъ
Урысые Федерацием зыкъыухъумэжьынымкIэ амалэу иIэхэм къакIегъэчыгъэным, иэкономикэ зэщыгъэкъогъэным атегъэпсыхьагъэу Краснодар щыщ бзэджэшIитIоу сотовэ станцием машIо кIэзыдзагъэхэм ягъогупэ Урысыем щынэгъончъэнымкIэ и Федеральнэ къулыкъу
Адыгэ РеспубликэмкIэ и ГъэIорышIапIэ пибзыкIыгъ.
ГъэIорышIапIэм иIофышIэхэм зэрагъэунэфыгъэмкIэ,IэкIыб къэралыгъом илIыкIохэм илъэс 16 ыкIи 19 зыныбжьхэм араIуагъ Iахьзэхэлъ обществэу «ВымпелКом» зыфиIорэм исотовэ станциеу псэупIэу Лъэустэнхьаблэ дэтыр зызэщагъакъокIэ ахъщэ къазэраратыщтыр. 2024-рэ илъэсым ишышъхьэIу бзэджашIэхэм станцием машIо зэрэкIадзагъэмкIэ видео заказчикым IэкIагъэхьагъ ыкIи нэужым ахъщэ къафигъэхьыгъ.
Урысыем щынэгъончъэнымкIэ и Федеральнэ къулыкъу Адыгэ РеспубликэмкIэ и ГъэIорышIапIэ къыIэкIигъэхьэгъэ материалхэр IэубытыпIэ къызыфишIыхэзэ, Урысыем
и Следственнэ комитет Адыгэ РеспубликэмкIэ иследственнэ гъэIорышIапIэ Урысые Федерацием и Уголовнэ кодекс ия 30-рэ статья ия 3-рэ Iахь, ия 281-рэ статья ия 2-рэ Iахь адиштэу уголовнэ Iоф къызэIуихыгъ.
Уголовнэ IофымкIэ мэхьанэ зиIэхэм яугъоин тегъэпсыхьэгъэ следственнэ Iофтхьабзэхэр следовательхэм зэрахьэх. Уголовнэ Iофым изэхэфын джыри макIо. Урысые Федерацием и Уголовнэ кодекс ия 281-рэ статья ия 2-рэ Iахь диштэу бзэджашIэхэм илъэс 20-м нэсэу хьапс атыралъхьан алъэкIыщт.
Урысыем щынэгъончъэнымкIэ и Федеральнэ къулыкъу
Адыгэ РеспубликэмкIэ и ГъэIорышIапIэ ипресс-къулыкъу