Урысые политическэ партиеу «Единэ Рос­сием» ишъолъыр ыкIи ичIыпIэ приемнэу ­Адыгеим къыщызэIуа­хыгъэхэм хэушъхьафыкIыгъэ дзэ операцием хэлажьэу е ахэм яунагъо щыщэу юридическэ IэпыIэгъу зищыкIагъэхэр зыщырагъэблэгъэгъэ мэфэ зыкI ащызэхащэ­гъагъ.

Iофыгъоу ахэм къарахьылIа­гъэхэм депутатхэмрэ къулыкъу ыкIи организацие зэфэшъ-­
хьаф­хэм ялIыкIохэмрэ ахэплъа­гъэх.
АР-м и Къэралыгъо Совет — Хасэм и Тхьаматэу Владимир Нарожнэр партием икъотэгъу­хэм я Штаб цIыфхэм ащыIукIагъ. Ащ игъусагъэх къэралыгъо Фондэу «Хэгъэгум иухъума­кIохэр» зыфиIорэм ишъолъыр къутамэ ипащэу ПIатIыкъо Ас­лъан, Мыекъуапэ идзэ комиссарэу Алексей Санташовыр, АР-м физкультурэмрэ спортымрэкIэ и Комитет ипащэу Дэгужъые Мурат. ГумэкIыгъо зиIэу къекIолIагъэхэм яIофхэр охътабэ темышIэу зэхэфыгъэнхэм ыкIи тхылъэу ящыкIагъэ хъурэр шапхъэхэм адиштэу зэхэгъэуцогъэным афэшI Урысыем июристхэм я Ассоциацие и Адыгэ шъолъыр къутамэ иIофышIэхэри къыхагъэлэжьагъэх.
Депутатхэм закъыфэзыгъэзагъэхэм янахьыбэр хэушъхьа­фыкIыгъэ дзэ операцием хэла­жьэхэрэмрэ ахэм яунагъохэмрэ афагъэнэфэгъэ къэралыгъо IэпыIэгъум епхыгъ зыгъэгумэ­кIыщтыгъэхэр. ЗэкIэ упчIэхэм яджэуапхэр ахэм агъотыгъэх, зыщищыкIагъэм IэпыIэгъу афэ­хъугъэх.
Владимир Нарожнэм Iофтхьа­бзэр къызэфихьысыжьызэ, дзэ операцием хэлажьэхэрэмрэ ахэм яунагъохэмрэ яфитыныгъэхэр къэухъумэгъэнхэр, Iэпы­Iэгъоу афагъэнэфагъэр къыз­IэкIагъэхьанымкIэ адеIэгъэныр пшъэрылъ шъхьаIэу зэрэщытым къыкIигъэтхъыгъ. Ащ фэдэу лъэныкъо гъэнэфагъэ фэгъэхьыгъэ мэфэ зыкIхэр тапэкIи мазэм зэ тидзэкIолIхэмрэ ахэм ягупсэхэмрэ афызэхащэхэзэ ашIыщт.