ПроектыкIэм хэхьагъ
ПсэупIэхэм яобщественнэ чIыпIэхэмрэ фэтэрыбэу зэхэт унэхэм ящагухэмрэ цIыфхэмкIэ Iэрыфэгъу хъунхэм, ягуапэу языгъэпсэфыгъо уахътэ ащагъэкIоным фытегъэпсыхьэгъэнхэм фэгъэхьыгъэ федеральнэ проектэу «Iэрыфэгъу къэлэ щыIакIэ гъэпсыгъэныр» зыфиIорэр 2017-рэ илъэсым
Урысыем ишъолъырхэм ащатIупщыгъ.
Нэужым, 2019-м, УФ-м и Президент кIэщакIо зыфэхъугъэ лъэпкъ проектхэм ащыщэу «ПсэупIэр ыкIи къэлэ щыIакIэр» зыфиIорэм ар хагъэхьагъ. Федеральнэ проектыр Адыгеим зыщырахьыжьэ-
гъэ 2017-рэ илъэсым къыщыублагъэу 2024-м икIэухым нэс пштэмэ, общественнэ чIыпIэу е фэтэрыбэу зэхэт унэхэм ящагухэу 362-рэ республикэм щызэтырагъэпсыхьагъ.
АР-м псэолъэшIынымкIэ, транспортымкIэ, псэупIэ-коммунальнэ ыкIи гъогу хъызмэтымкIэ и Министерствэ къызэритыгъэмкIэ, икIыгъэ илъэсым общественнэ чIыпIи 8 ыкIи щагу 32-рэ агъэкIэжьыгъ. Ахэм пстэумкIи сомэ миллион 505,3-рэ апэIуагъэхьагъ.
Къихьэгъэ 2025-рэ илъэсым федеральнэ проектыр УФ-м и Президент джыри кIэщакIо зыфэхъугъэ лъэпкъ проектыкIэхэм ащыщэу «ЩыIэныгъэм пае инфраструктурэр» зыфиIорэм хэхьагъ. Пшъэрылъэу иIагъэхэр къэнэжьых. Ащ къыдыхэлъытагъэу Мыекъуапэ, Адыгэкъалэ, Джэджэ, Кощхьэблэ, Мыекъопэ, Тэхъутэмыкъое, Теуцожь ыкIи Шэуджэн районхэм япсэупIэхэм ащыщхэм яобщественнэ чIыпIэхэр зэтырагъэпсыхьащтых.
Джащ фэдэу «ПсэупIэр ыкIи къэлэ щыIакIэр» зыфиIорэ лъэпкъ проектым къыдыхэлъытагъэу Урысыем икъэлэ цIыкIухэм яобщественнэ чIыпIэу гъэкIэжьын зищыкIагъэхэм язэнэкъокъу илъэс заулэкIэ узэкIэIэбэжьмэ зэхащэгъагъ. АдыгеимкIэ ащ текIоныгъэр къыщыдахыгъ Мыекъуапэ имэз-парк чIыпIэу «Мэздахэмрэ» Адыгэкъалэ ипроспектэу Лениным ыцIэ зыхьырэм тет паркымрэ. Ахэр игъорыгъоу агъэкIэжьых. Джы мыгъэ «Мэздахэм» ипроект иятIонэрэ, Адыгэкъалэ ипарк ипроект иящэнэрэ едзыгъохэм къадыхэлъытэгъэ IофшIэнхэр ары зэшIуахыщтхэр.
ЦIыфхэм амакъэхэр атызэ общественнэ чIыпIэу агъэкIэжьыщтхэр къызщыхахыгъэ зэнэкъокъуи лъэпкъ проектым къыдыхэлъытагъэу 2024-рэ илъэсым зэхащэгъагъ. РеспубликэмкIэ анахьыбэу макъэхэр зыфатыгъэхэр: Мыекъуапэ игупчэу Лениным ыцIэ зыхьырэр, Инэм псэупIэ коим хэхьэрэ поселкэу Дружнэм иурамэу Рабочэм тет кIэлэцIыкIу джэгупIэр, поселкэу Яблоновскэм иурамэу Кочубей ыцIэ зыхьырэм щыгъэпсыгъэ спорт площадкэр. Ахэм язэтегъэпсыхьан илъэсэу къихьагъэм рагъэжьагъ.
ХЪУТ Нэфсэт.