Ленинград блокадэр зэрэтырахы­жьыгъагъэм фэгъэхьы­гъагъ ­Лъэпкъ тхылъеджапIэм щызэхащэгъэгъэ лекториеу «Будем помнить подвиг ­Ленинграда» зыфиIорэр.

Iофтхьабзэм хэлэжьагъэх студентхэр, «Адыгэ республикэ гимназием иеджа­кIохэр ыкIи тхылъеджапIэм иIофышIэхэр.
Адыгэ къэралыгъо университетым иIофышIэу, тарихълэжьэу Нэджыкъо Схьатбый Хэгъэгу зэошхом инэкIубгъо анахь нэшхъэйхэм Ленинград блокадэр зэращыщыр, Iоныгъом и 8-м, 1941-м щегъэжьагъэу мэфэ 872-м къалэр хэгъэгум пыбзыкIыгъэу цIыфхэм къины­шхоу ащэчыгъэр, гъаблэм, чъыIэм, узым зэ­лъиштагъэхэми, ини цIыкIуи якъэлэ гупсэ гум зэрэрамынагъэр, щэIагъи, лIыгъи, гугъэ мыухыжьи ТекIоныгъэмкIэ зэряIагъэр къыриIотыкIыгъ.

КIэлэеджакIохэр фильм-слайдым рагъэплъыгъэх ыкIи тхылъ къэгъэлъэгъонэу «Будем помнить подвиг Ленинграда» зыфиIорэм фагъэнэIосагъэх.
Зэхахьэм хэлэжьагъ ыкIи къыщыгущыIагъ тхакIоу, журналистэу Иван Бормотовыр. Ащ Хэгъэгу зэошхом илъэ­хъан Ленинград илIыхъужъныгъэ къыхигъэщы­зэ, Адыгеири мэзихым пыим зэриIыгъы­гъэр, цIыфхэм хьазаб зэращэчыгъэр, ау хыер текIо хабзэти, Ленингради Адыгеири советскэ дзэкIолIхэм шъхьафит зэ­рашIыжьыгъэхэр къыIуагъ. зынахь лъапIэ цIыфлъэпкъымкIэ щымыIэр мамырныгъэр зэрэарыр къэгущыIагъэ пэпчъ кIигъэтхъыгъ.
Дзэукъожь Нуриет.