Хэгъэгу зэошхом Текlоныгъэр къызщыдахыгъэр илъэс 80 зэрэхъурэм ихэгъэунэфыкlын епхыгъэу тихэгъэгу ицlыф лъэпкъыбэхэм ягу­шхоныгъэ инэпэеплъэу «Текlоныгъэм и Пхъэшъаб» зыфиlорэ lоф­тхьабзэр республикэм щаублэ.

АР-м мэзхэмкlэ и Гъэlорышlапlэ «Адыгэ макъэм» къызэрэщыраlуагъэмкlэ, мэзаем имэфэ фабэхэм ар рагъэжьэщт.
Сталинград зэошхом псаоу къелыжьыгъэ пхъэшъабэу илъэ­си 100-м ехъу зыныбжьыр Вол­гоград игупчэ къыщэкlы. Ащ игуакlэ мэлылъфэгъум и 25-м, 2015-рэ илъэсым, Хэгъэгу зэошхом Текlоныгъэр къызщыда­хыгъэр илъэс 70-рэ зыщыхъугъэм, Мыекъопэ къэлэ паркым щагъэтIысхьэгъагъ.
«Илъэсипшlэу блэкlыгъэм чъыгым лъэшэу зиштагъ. Метрэ 16 илъэгагъ, чъыгыпкъым ­ишъомбгъуагъэ сантиметрэ 22-рэ мэхъу. Джы ащ къутэмэ гъэ­тlысыжьэу 30 фэдиз хэтхыгъ, ахэм лъапсэ къядгъэтыщт. Псэу­пlэу Краснооктябрьскэм дэт мэзхъызмэтшIапIэм ахэр къыщыдгъэкlыщтых. Нэужым мэз­лэжьыным епхыгъэ еджапlэхэу республикэм итхэм пхъэшъэбэ гъэтlысыжьхэр атедгощэщтых», — къытфиlотагъ АР-м имэз­лэжьхэм яобществэ итхьама­тэу Хьатикъое Мэджыдэ.
«Текlоныгъэм ипхъэшъабэ­хэр» къэралыгъом ишъолъыр зэфэшъхьафхэм — паркхэм, скверхэм, гупчэхэм ащагъэтlыс­хьагъэх ыкlи ахэм адэжь шlэжь зэхахьэхэр, lофтхьэбзэ зэфэшъхьафхэр мыгъэ ащарагъэкlо­кlыщтых. АР-м мэзхэмкlэ и Гъэ­lорышlапlэ ипащэу Былымыхьэ Рэщыдэ къызэриlуагъэмкlэ, агощыщт пхъэшъабэхэм анаlэ атырагъэтыщт, Хэгъэгу зэошхом илъэхъан къэралыгъом ицlыфхэм зэрахьэгъэ лlыхъужъныгъэм исаугъэтэу ахэр хъущтых. «Те­кlоныгъэм и Пхъэшъа­бэ» дэжь Мыекъопэ къэлэ пар­кым мэлылъфэгъум щызэхащэщт шlэжь зэ­хахьэм изэхэщэн Гъэ­lоры­шlапlэр хэлэжьэщт.
Тэу Замир.