Агъэмысагъэх
Адыгэ Республикэм наркотикхэр щыIузыгъэкIыщтыгъэ бзэджэшIэ купым ылъэныкъокIэ къызэIуахыгъэ уголовнэ Iофыр зэхафыгъ.
Адыгеим щыщ Д. Пащенкэр, Краснодар краим щыпсэухэрэ Д. Конобейскэр ыкIи Н. Соколовыр наркотикхэр IуагъэкIын гухэлъ яIэу къаубытыгъэх.
АР-м хэгъэгу кIоцI IофхэмкIэ и Министерствэрэ щынэгъончъэнымкIэ федеральнэ къулыкъум и ГъэIорышIапIэу АР-м щыIэмрэ уплъэкIунхэр ашIызэ къаугъоигъэ материалхэмкIэ уголовнэ Iофыр къызэIуахыгъ ыкIи зэхафыгъ.
КъулыкъушIэхэм зэрагъэунэфыгъэмкIэ, ыпшъэкIэ зигугъу къэтшIыгъэ бзэджашIэхэр зэгъусэхэу синтетикэ зыхэлъ наркотик лъэпкъэу «мефедрон» зыцIэр къыдагъэкIынэу, нэужым гъэбылъыпIэхэм ащагъэтIылъызэ Мыекъуапэ щыIуагъэкIын гухэлъ яIэу Шытхьалэ лабораторие щагъэпсыгъ.
Оперативнэ лъыхъун Iофтхьабзэу къулыкъушIэхэм зэрахьагъэхэм къакIэлъыкIоу килограмм 0,198-рэ хъурэ наркотик зыхэлъ веществоу «мефедроныр», химическэ пкъыгъохэр ыкIи зэхэшIыхьэгъэ литри 180-рэ къаIахыгъ.
Адыгэ Республикэм и Мыекъопэ къэлэ хьыкум иунашъокIэ бзэджэшIэ купыр агъэмысагъ, Н. Соколовым илъэс 11 хьапс, Д. Конобейскэм илъэси 10 ыкIи Д. Пащенкэм илъэси 8 хьапс атыралъхьагъ.
АР-м и Апшъэрэ хьыкум бзэджашIэхэм атыралъхьагъэм дыригъэштагъ, унашъом кIуачIэ иIэ хъугъэ.
ЩынэгъончъэнымкIэ федеральнэ къулыкъум и ГъэIорышIапIэу
АР-м щыIэм ипресс-къулыкъу.