Урысыем ипроектэу «Мэкъумэщ къыдэгъэкIыжьын комп­лексым иIофышIэхэр» зыфиIорэм къыдыхэлъытагъэу Адыге­им къыщызэIуахыгъэ агроклассхэм яегъэджэн зэхащэ.

Мы мафэхэм кIэлэеджакIохэр Мыекъопэ къэралыгъо технологическэ университетым щы­Iагъэх, практическэ егъэджэныр зэрэзэхащэрэр нэрылъэгъу тфэ­хъугъ. «Микрозелень» зыфаIорэм икъэгъэкIын шъэфэу пылъхэр арагъэшIагъэх.
Непэрэ мафэм ехъулIэу агро­классхэр Красногвардейскэ районыр ары зыщызэхащагъэр. Гимназиеу N 1-м ыкIи гурыт еджапIэу N 6-м къащызэIуа­хыгъ. КIэлэеджэкIо 16-мэ биологиер, географиер, чIыопс ыкIи мэкъумэщ хъызмэт зехьаным илъэныкъо зэфэшъхьафхэр игъэ­кIотыгъэу зэрагъашIэх.
— НыбжьыкIэхэр мэкъумэщ хъызмэтым фэщагъэ хъунхэмкIэ агроклассхэм язэхэщэн мэхьа­нэшхо иI. Непэ амалыкIэу щы­Iэхэм яшIуагъэкIэ чIыгулэжьыныр нахь Iэрыфэгъу зэрэхъу­гъэр, техникакIэм амалэу къытыхэрэр кIэлэеджакIохэм ашIэн фае. Къоджэ псэупIэхэм адэс ныбжьыкIэхэм мэкъумэщ сэнэхьатыр къыхягъэхыгъэныр, хьалыгъум икъэгъэкIын нахь шъхьаIэ зэрэщымыIэр къагу­рыдгъэIоныр типшъэрылъ шъхьа­Iэхэм ащыщ. Агроклассхэм язэ­хэщэн Урысыем гъэрекIо щегъэжьагъэу щаублагъ, ащ ыпэкIи кIэлэеджакIохэм Iоф адатшIэщтыгъ. Мэкъумэщ сэнэ­хьатыр зыфэдэр къагурыIоным, ящыIэныгъэ гъогу рапхыным пае Iофтхьэбзэ зэфэшъхьафхэр ренэу зэхэтэщэх, ахэм яшIуагъэ къэкIо, — къыIуагъ Мыекъопэ къэралыгъо технологическэ университетым мэкъумэщ технологиехэмкIэ ифакультет идеканэу, мэкъумэщ шIэныгъэхэмкIэ кандидатэу Шъхьэпэцэ Аслъан.

Илъэсныкъом къыкIоцI мэ­къумэщ хъызмэтым ылъэныкъо­кIэ Iофтхьэбзэ зэфэшъхьафхэр ныбжьыкIэхэм афызэхащэщтых. Егъэджэнхэр тIоу гощыгъэу, теориер пэIудзыгъэ шIыкIэм те­тэу, практическэ IофшIэнхэр апшъэрэ еджапIэм зэрэщызэхащэщтхэр, ащкIэ Iэмэ-псымэ дэгъухэр зэряIэхэр къытиIуагъ мэкъумэщ продукцием икъы­дэгъэкIын итехнологиехэмкIэ кафедрэм ипащэу, мэкъумэщ шIэ­ныгъэхэмкIэ докторэу, доцентэу Мамсыр Нурбый.
ЧIыгулэжьыным, былымхъуным мэхьанэу яIэр, лэжьыгъэ бэгъуагъэ къэпхьыжьыным фэшI анахьэу унаIэ зы­тебгъэтын фэе лъэныкъохэр ныбжьыкIэхэм арагъэшIэщт, зэ­зэгъыныгъэ зыдашIыгъэ хъыз­мэтшIапIэхэм адэжь кIощтых, IофшIэныр зэрэзэхащэрэр нэ­рылъэгъу афэхъущт.
Агроклассым щеджэрэ кIэлэеджа­кIо­хэм зэрагъэшIагъэм къыпкъырыкIыхэзэ проектхэр агъэхьазырыщтых, заушэтыжьыщт. Мыекъопэ къэралыгъо техно­логическэ университетым мэкъумэщ технологиехэмкIэ ифакультет чIэхьанэу къыхэзыхыхэрэм фэгъэкIотэнхэр яIэщтых.
Республикэм имэкъумэщ къыдэгъэ­кIыжьын комплекс Iоф щызышIэщтхэр гъэхьазырыгъэнхэмкIэ мы шIыкIэм ишIуагъэ къэкIощт, ныбжьыкIэу мы лъэ­ны­къом зыфэзгъазэхэрэм япчъагъэ хэ­хъонэу агъэнафэ.
Гимназием къикIыгъэ кIэлэеджакIоу гущыIэгъу тызыфэхъугъэхэм зэкIэми мэкъу-мэщым фэщагъэ зэрэхъугъэхэр, ашIогъэшIэгъоныбэ зэралъэгъурэр къытаIуагъ. Ахэм ащыщыбэхэм унагъохэм хъызмэтшIапIэхэр аIыгъых, цумпэ къагъэкIы.
Мэкъу-мэщым илъэныкъо пстэури зэригъашIэмэ шIоигъоу Амир агро­классым щеджэнэу ыублагъ. Ащ ятэ фирмэ иI, ащ кIырыплъызэ чIыгулэжьыным фэщагъэ хъугъэ, мыщ ищыIэныгъэ гъогу рипхынэу фай. Варварэ пшъэ­шъэжъый нахь мышIэми, агроном сэ-нэ­хьатым ыгукIэ пэблагъ, сэнэхьатэу къы­­хихыгъэмкIэ мы егъэджэнхэм яшIуа­гъэ къызэрэкIощтыр къытиIуагъ.
ДЕЛЭКЪО Анет.