Адыгеим и ЛIышъхьэу КъумпIыл Мурат Теуцожь районым ипащэу УдыкIэко Адам зэIукIэгъу дыриIагъ. 2024-рэ илъэсым икIэуххэм ыкIи джырэ Iофыгъохэу муниципалитетым ихэхъоныгъэ епхы­гъэхэм ахэр атегу­щыIагъэх.

Районым ипащэ къызэ­риIуагъэмкIэ, 2024-рэ илъэсым муниципальнэ образованием ибюджет ихахъохэр сомэ миллиардрэ миллиони 123,7-м нэсыгъ, ыпэрэ илъэ­сым елъытыгъэмэ, процент 47,7-кIэ ар нахьыб. ХэбзэIахь ыкIи мыхэбзэIахь ха­хъохэр сомэ миллион 385-м шъхьадэкIыгъ. Бюджетым ихъарджхэр сомэ миллиардрэ миллиони 137,9-м нэсыгъ.
Адыгеим и ЛIышъхьэ ана­хьэу ынаIэ зытыригъэтыгъэр цIыфхэм ялъэIу тхылъхэм яхэплъэн, IофшIэпIэ чIыпIа­кIэхэм язэхэщэн, цIыф псэу­пIэхэр зэтегъэпсыхьэгъэнхэр, кIэлэцIыкIухэмрэ ныбжьыкIэхэмрэ хэхъоныгъэ ашIынымкIэ амалхэр ягъэгъотыгъэнхэр, унэгъо ныбжьыкIэ­хэм ыкIи сабыибэ зэрыс-
хэм адеIэгъэныр, ащ хэхьэх хэушъхьафыкIыгъэ дзэ операцием хэлажьэхэрэм яунагъохэри.
«ЭкономикэмкIэ ыкIи социальнэ лъэныкъомкIэ проектхэр зыфытегъэпсыхьэ­гъэнхэ фаер цIыфхэр зы­гъэгумэкIырэ Iофыгъохэу къаIэтыхэрэм язэшIохын ары. Анахьэу шъунаIэ зытежъу­гъэтыщтхэр унагъохэр, къыткIэхъухьэхэрэм хэхъоныгъэ ягъэшIыгъэныр ары. Ахэм адакIоу чIыпIэхэм яхэбзэ къулыкъухэм гъэпсын Iоф­шIэныр зэкIэми зэдыряIофэу зэрэщытым анаIэ ты­рарагъэдзэн, агъэпсыгъэхэм афэсакъынхэу, анаIэ атырагъэтынэу ашIыныр ары», — къыIуагъ КъумпIыл Мурат.
ЗэIукIэгъум илъэхъан УдыкIэко Адам къыIотагъ районым ипсэупIи 5-мэ бюджетым те­гъэпсыхьэгъэ проектхэр ащыгъэ­цэкIагъэ зэрэхъухэрэм фэгъэ­хьыгъэу. ГущыIэм пае, къуа­джэу Пэнэжьыкъуае идэхьапIэ аркэ щыгъэуцугъэныр, къуаджэхэу Пщыкъуйхьаблэ, Гъобэкъуае, ПчыхьалIыкъуае, къутырэу Казазовым, псэупIэу Чэтыкъо, къуаджэу Къунчыкъохьаблэ об­щественнэ шъолъырхэр, «ТекIоныгъэм ия 80-рэ илъэс» зыфиIорэ паркыр къуаджэу Аскъэ­лае ащызэтегъэпсыхьэгъэнхэр.
Шъолъыр проектэу «Псы къабзэр» зыфиIоу лъэпкъ проектэу «ПсэупIэмрэ къэлэ щы­IакIэмрэ» епхыгъэу щытым къы­дыхэлъытагъэу къэлэ гъэ­псыкIэ зиIэ псэупIэу Лъэустэнхьаблэ псыубытыпIэ щашIы, къуаджэхэу Нэшъукъуаерэ Пэнэжьыкъуаерэ псыубытыпIэ­хэр ащызэтырагъэпсыхьажьых. Энергиер кIэугъоегъэным те­лъытэгъэ шъолъыр программэм икъэкIуапIэхэмкIэ псэупIэхэу Очэпщые, Лъэустэнхьаблэ ыкIи Пэнэжьыкъуае урамхэм якъэгъэнэфын епхыгъэ Iофтхьа­бзэхэр ащызэшIуахыгъэх.

Ащ нэмыкIэу зэIукIэгъум хэлажьэхэрэр районым имэкъу-­мэщ изытет тегущыIагъэх. Лэ­жьэкIупIэхэр гектар мин 30 фэ­диз мэхъух. Бжыхьасэхэм тонн мин 58,6-рэ фэдиз лэжьыгъэу къатыгъ, дагъэ зыхашIыкIыхэрэр тонн мини 6,8-рэ, техническэхэр — тонн мини 4,5-рэ хъугъэх, хэтэрыкIхэр — тонн 833-рэ.
Мэкъу-мэщым тапэкIи къэралыгъо IэпыIэгъу етыгъэным, бизнес цIыкIумрэ гурытымрэ муниципальнэ образованием джыри нахь зыщаушъомбгъуным пае амалхэр ягъэгъоты­гъэнхэм япхыгъэ Iофыгъохэм республи­кэм ипащэ анаIэ ты­раригъэ­дзагъ.
Адыгэ Республикэм
и ЛIышъхьэ ипресс-къулыкъу къытырэ къэбархэмкIэ Тхьаркъохъо Сафыет.