Илъэс къэс пенсиехэмрэ социальнэ ахъщэ тынхэмрэ къэралыгъом къеIэтых. 2016-рэ илъэсым къыщыублагъэу страхованиемкIэ пенсие къызэратэу IофшIапIэхэм аIутхэр ащ къыхиубытэщтыгъэхэп.

УФ-м и Президентэу Владимир Путиныр индексациер зынэсхэрэм ахэри ахэгъэхьажьыгъэнхэм кIэщакIо фэхъугъ ыкIи УФ-м и Къэралыгъо Думэ пен­сиехэм афэгъэхьыгъэ хэбзэгъэуцугъэм зэхъокIыныгъэхэр фишIыгъэх. Къэралыгъом ипащэ бэдзэогъум и 8-м унашъом кIэтхагъ. Ащ диштэу УФ-м IофшIэнымкIэ ыкIи социальнэ хэхъоныгъэмкIэ и Министерствэ пенсиехэр къызэралъытэрэ шапхъэхэм зэхъокIыныгъэхэр афи­шIыгъэх.
IофшIапIэм Iут пенсионерхэм япенсиехэр зэхъокIыныгъэ афэмыхъугъэу къафакIощтыгъэхэми, индексацием къы­хиубытагъэхэм къаратыщтыгъагъэр зы­фэдизыр ялицевой счетхэм арылъ. Джы индексацие къашIыщтыр мы уахътэм IофшIапIэм Iутхэм къаратырэ пенсиер арэп, къызфыхахъохэрэм ащыщыгъэхэмэ къафэкIощтыгъагъэр ары. КъэкIорэ мэзэе мазэр ары ащ тетэу къыхэхъуагъэу къатынэу зырагъэжьэщтыр.
IофшIапIэм Iутхэм япенсиехэм къызэрахэхъощтыр щысэхэмкIэ УФ-м и Социальнэ фонд иинтернет нэкIубгъо щызэхэфыгъ. Ащ къызэрэщиIорэмкIэ, непэ, гурытымкIэ лъытагъэу, сомэ мин 17,4-рэ IофшIапIэ Iут пенсионерым ипенсие зэрэхъурэр. Аужырэ илъэ­сищым адрэхэм афэдэу индексацием ­къыхиубытэгъагъэмэ, ар сомэ мин 23,4-рэ зэрэхъущтыгъагъэр. А пчъагъэр ары пенсионерым илицевой счет илъыр.
Ащ къыпкъырыкIхэзэ индексациер къа­лъытэнышъ, сомэ мин 17,4-м къыха­гъэхъощт.
УФ-м и Социальнэ фонд и Къутамэу АР-м щыIэм ипресс-къулыкъу тызэрэщигъэгъозагъэмкIэ, Адыгеим IофшIапIэм Iут пенсионер 20760-рэ щэпсэу. ГурытымкIэ лъытагъэу, ахэм къафакIорэр сомэ мин 15 мэхъу. КъызэрэтIуагъэу, аужырэ илъэсищ индексацием къыхиубытэгъагъэхэмэ сомэ мин 20,2-рэ хъущтыгъагъ. Ащ къыпкъырыкIхэзэ къыхэ­хъощтыр зыфэдизыр къалъытэнышъ, сомэ мин 15-м ар къыхагъэхъощт.
Ащ пае пенсионерхэм лъэIу тхылъ атын е нэмыкIхэр агъэхьазырынхэ ищыкIагъэп. Ау ипенсие зыщызэIукIэрэм икъэбар зэзгъашIэмэ зышIоигъохэм ар зэрытхэгъэ тхылъыр яунэе лицевой счет къырахын алъэкIыщт.
ХЪУТ Нэфсэт.