Мазэр фэгъэхьыгъэщт
![Image description](images_upload?image_name=2025/01/c9418ddd-a6ae-4863-8bdf-3eaa715820af.jpg)
Урысые Федерацием цIыф жъугъэхэм якъэухъумэнкIэ IофшIэнхэм язэхэщэн имазэ мэфэкI шIыкIэм тетэу щылэ мазэм и 23-м Адыгэ Республикэм щырагъэжьагъ.
Ащ епхыгъэ Iофтхьабзэу Урысыем и ДОСААФ икъутамэу Адыгэ Республикэм щыIэм щыкIуагъэм хэлэжьагъэх АР-м иветеранхэм я Совет итхьаматэу, отставкэм щыIэ полковникэу Къоджэ Аслъан, АР-м лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэ игуадзэу Константин Щербаковыр, зыкъэухъумэжьынымкIэ Адыгэ республикэ организацием, ветеранхэм я Совет, дзэ комиссариатхэм ялIыкIохэр, дзэ-патриотическэ клубхэм, лъыхъон отрядхэм ахэтхэр, юнармейцэхэр, кIэлэеджакIохэр.
2025-рэ илъэсым Хэгъэгу зэошхом ТекIоныгъэр къызыщыдахыгъэр илъэс 80, ухъумэнымкIэ организациеу «ОСОАВИАХИМ» зыфиIорэр илъэс 98-рэ зэрэхъухэрэм, Хэгъэгум иухъумакIо и Мафэ, Урысыем ишIэжь ыкIи дзэ щытхъум имафэхэм ар анахьэу афэгъэхьыгъэщт.
Хабзэ зэрэхъугъэу, илъэс къэс рагъэкIокIырэ хэхыгъэ мазэм спорт зэнэкъокъухэр, патриотическэ зэIукIэгъухэр, лIыхъужъныгъэм идесэхэр, концертхэр къыхиубытэщтых. Пшъэрылъ шъхьаIэр — Урысыем и ДОСААФ иIофшIэн зыфэгъэхьыгъэр зэлъягъэшIэгъэныр, ухъумэнымкIэ шъолъыр организацием исатыр хэтхэм хэгъэхъогъэныр, цIыфхэм ядзэ-патриотическэ пIуныгъэм, анахьэу ныбжьыкIэхэм алъэныкъокIэ зыкъегъэIэтыгъэныр.
Урысые Федерацием цIыф жъугъэхэм якъэухъумэнкIэ IофшIэнхэм язэхэщэн имазэ зэраублагъэмкIэ къэзэрэугъоигъэхэм къафэгушIуагъ ДОСААФ-м ишъолъыр къутамэ итхьаматэу, запасым щыс полковникэу Барцо Тимур.
— 2025-р — Хэгъэгум иухъумакIо и Илъэсэу УФ-м и Президент ыгъэнэфагъ. Ащ епхыгъэу Адыгеим и ЛIышъхьэу КъумпIыл Мурат пшъэрылъ гъэнэфагъэхэр къыгъэуцугъэх. Арышъ, ныбжьыкIэхэм патриотическэ гупшысакIэ ахэлъхьэгъэным ыкIи обществэм инеущырэ мафэ ахэм чIыпIэ гъэнэфагъэ щаубытыным, блэкIыгъэм тидзэкIолIхэм лIыхъужъныгъэу зэрахьагъэм ишIэжь къызэтегъэнэгъэным Iофтхьабзэу зэхэтщэщтхэр фэIорышIэщтых. Тятэжъ пIашъэхэм къахэфэгъэ пытагъэр джы къыткIэхъухьэхэрэм яхэгъэгу къаухъумэнымкIэ щысэшIу афэхъуным тынаIэ тедгъэтыщт. ХэушъхьафыкIыгъэ дзэ операциер зэрэкIорэри зыщыдгъэгъупшэрэп. Ар къыдэтлъытэзэ, тиIофшIэн зэхэтщэщт, — хигъэунэфыкIыгъ Барцо Тимур.
Ветеранхэм я Совет итхьаматэу Къоджэ Аслъан къызэриIуагъэмкIэ, пшъэрылъ шъхьаIэу яIофшIэнкIэ яIэщтыр тарихъ хъугъэ-шIагъэхэр, а лъэхъан къинхэм ти Хэгъэгу къэзыухъумэгъэ цIыфхэр тыгу къэдгъэкIыжьынхэр, къыткIэхъухьэрэ лIэужхэм ахэр ядгъэшIэнхэр, яхэгъэгу шIу алъэгъоу, къаухъумэным фэхьазырхэу пIугъэнхэр ары. Тарихъ мэхьанэ зиIэ мэфэкIхэмкIэ мы мазэр зэрэбаир, ахэм япхыгъэ Iофтхьабзэу Адыгеим щызэхащэхэрэм Советымрэ ДОСААФ-мрэ зэготхэу зэрахэлажьэхэрэр къыхигъэщыгъ.
Константин Щербаковым гущыIэр лъигъэкIотагъ. Комитетым итхьаматэу Шъхьэлэхъо Аскэр ыцIэкIэ къэзэрэугъоигъэхэм шIуфэс къарихыгъ. Мэхьанэшхо зиIэ Iофтхьабзэр зэрэрагъэжьагъэр, патриотизмэм кIуачIэу хэлъыр зэрэиныр, ащ тиныбжьыкIэхэр фэгъэсэгъэнхэр пшъэрылъ шъхьаIэу зэрэщытыр хигъэунэфыкIыгъ.
Iофтхьабзэм къыдыхэлъытагъэу, ДОСААФ-м и Гупчэ совет итын лъапIэхэр ыкIи ищытхъу тхылъхэр къэзылэжьыгъэхэм
Т. Барцор афэгушIуагъ, ахэр аритыжьыгъэх. Советскэ Союзым и ЛIыхъужъ щэгъогогъо апэрэу хъугъэ Александр Покрышкиным ыцIэкIэ щыт медалыр афагъэшъошагъ ДОСААФ-м икъутамэу Кощхьэблэ районым щыIэм зэхэщэн, дзэ-патриотическэ лъэныкъомкIэ ыкIи спортымкIэ иIофышIэ шъхьаIэу Вэрэкъо Долэтрэ егъэджэнымкIэ имастерэу Гъащтэ Къэплъанрэ.
Мыщ къыдыхэлъытагъэу щылэ мазэм и 23-м къыщегъэжьагъэу мэзаем и 23-м нэс Iофтхьэбзэ зэфэшъхьафхэр республикэм щыкIощтых.
Iэшъынэ Сусан.