Япшъэрылъхэр агъэцэкIагъэх
![Image description](images_upload?image_name=2025/01/IMG_5634.jpg)
Мыекъопэ районым ипрокурорэу Набэкъо Аскэр 2024-рэ илъэсымкIэ IофшIэныр зыфэдагъэр зыщызэфихьысыжьыгъэ пресс-конференцие къытыгъ.
Пэублэм ащ къыIуагъ хабзэр ыкIи хэбзэ рэхьатныгъэр гъэпытэгъэным анаIэ зэрэтырагъэтыгъэр. УФ-м ыкIи Адыгеим япрокуратурэхэм къафагъэуцугъэ пшъэрылъхэр дэх имыIэу агъэцэкIагъэх.
Лъыплъэным ылъэныкъокIэ цIыфхэм яфитыныгъэхэр ыкIи яшъхьафитыныгъэ къэухъумэгъэным епхыгъэу хэукъоныгъэ 1721-м ехъу къыхагъэщыгъ. Уголовнэ Iоф 16-м щыщэу 14-р зэхафыгъ.
Сомэ миллион 18-м ехъу зытефэгъэ дэо 239-мэ ахэплъагъэх, ахэмкIэ унэшъо 605-рэ ашIыгъ, IэнатIэм Iут нэбгырэ 453-мэ дисциплинарнэ пшъэдэкIыжь арагъэхьыгъ. Прокурорхэр зэрэкIэдэугъэхэм тетэу нэбгыри 130-м ехъумэ административнэ пшъэдэкIыжь атыралъхьагъ.
Джащ фэдэу илъэсым къыкIоцI цIыфхэм япсауныгъэ къэухъумэгъэнымкIэ, ящыкIэгъэ Iэзэгъу уцхэр ыкIи медицинэ IэпыIэгъур аратынхэмкIэ пшъэрылъхэм язэшIохын дэлэжьагъэх.
— 2024-рэ илъэсым зэфэхьысыжьэу фэхъугъэхэмкIэ Мыекъопэ районым икриминогеннэ зытет зыпкъитыныгъэ иIагъ. БлэкIыгъэ илъэсым бзэджэшIэгъэ 702-рэ районым щагъэунэфыгъ, ащ ипроцент 56-р къычIэдгъэщыгъ, — къыIуагъ Набэкъо Аскэр.
Мы мафэхэм ехъулIэу гумэкIыгъоу къэнэжьы районым ичIыпIэхэм пхъэ шIомыкIым игъэхьазырынкIэ (углежоги)раIо, хэбзэнчъэу хъызмэтшIапIэхэм ащыщхэм Iоф зэрашIэрэр. ЧIыопсыр къэухъумэгъэнымкIэ хэбзэгъэуцугъэр зэрагъэцакIэрэм фэгъэхьыгъэу Мыекъопэ район прокуратурэм уплъэкIунхэр ышIыгъэх. ЗэрагъэунэфыгъэмкIэ, пхъэ шIомыкIым игъэхьазырынкIэ унэе предприниматель нэбгырэ 24-мэ районым Iоф щашIэ. Ахэм ащыщэу нэбгырэ 17-мэ мэкъумэщ хъызмэтшIапIэхэр зытет чIыгум яIофшIапIэхэр ащыI. КъызэраIорэмкIэ, пхъэ шIомыкIым игъэхьазырын мэкъумэщ къызщагъэкIырэ чIыгум къегоонэу ары, ар хэбзэгъэуцугъэм диштэрэп. Унэе предпринимательхэм ащыщхэм яIофшIэн къызэтегъэуцогъэн зэрэфаем епхыгъэу район прокурату-
рэм Мыекъопэ район хьыкумым дэо 17 фигъэхьыгъ.
Унэе предпринимательхэм хэбзэнчъэу Iоф зэрашIэрэм къыкIэлъыкIоу сомэ миллион 24-м ехъу зэрарэу арагъэшIыгъ. Прокуратурэм уплъэкIунэу ышIыгъэхэмкIэ УФ-м и Следственнэ коми-
тет иследственнэ ГъэIорышIапIэу АР-м щыIэм уголовнэ Iоф къызэIуихыгъ. Ащ нэмыкIэу административнэ пшъэдэкIыжь 26-рэ атыралъхьагъ. Мы мафэм ехъулIэу дауи 4-р зэхафыгъ, 13-м хэплъэнхэу щылъ.
Ащ нэмыкIэу Мыекъопэ районым илъ чIыгу Iахьхэр хэбзэнчъэу зэрагъэфедэхэрэм фэгъэхьыгъэу район прокуратурэр Iофыгъо пчъагъэмэ ахэплъагъ, ахэмкIэ унэшъо гъэнэфагъэхэр ышIыгъэх.
КIАРЭ Фатим.