Сурэттехыным гъунапкъэ иIэп
![Image description](images_upload?image_name=2025/01/DSC_2884-scaled.jpg)
Адыгэ Республикэм и Сурэт къэгъэлъэгъуапIэ Iофтхьэбзэ гъэшIэгъон щыкIуагъ. Адыгеим исурэттеххэм яклуб ипащэу, республикэм культурэмкIэ изаслуженнэ IофышIэу Аркадий Кирнос егъэджэн сыхьат зэхищагъ.
Аркадий Кирнос иIэпэIэсагъэ Адыгеим щызэлъашIэ. ИщыIэныгъэ щыщ лIэшIэгъуныкъо гъунапкъэ имыIэу творчествэм фигъэхьыгъ. СурэтшIынри сурэттехынри зэдэбгъэцэкIэныр IэшIэхэп, ау лъэныкъуитIури къыдэхъу. Ащ иIофшIагъэхэр дахэу, узыIэпащэу гъэпсыгъэх. ЧIыопсым, лIыхъужъхэм, тарихъым, псэушъхьэхэм, цIыфхэм ящыIакIэ, нэмыкIхэм афэгъэхьыгъэ сурэтхэр гъэшIэгъонэу егъэпсых.
— Сурэттехым мы дунаим еплъыкIэу фыриIэм мэхьанэшхо иI. IэпэIасэм сэнэхьатым ишъэфхэр къыIэкIахьэмэ, иIэшIагъэхэр хьалэмэтэу ыгъэпсын, зы нэгъэупIэпIэгъум сурэт пчъагъэ тырихын ылъэкIыщт. СурэтымкIэ цIыфым игумэкI-гупшысэхэр, дунаир зэрилъэгъурэр къыреIотыкIых. Зы сурэтыр зы нэплъэгъу. ЦIыфым инэплъэгъу къыщыхэбгъэщы пшIоигъор сурэтым гупшысэ шъхьаIэ фэхъун фае, — къафиIотагъ Аркадий Кирнос.
«Сурэт–нэгъэупIэпIэгъу» зыфиIорэ къэгъэлъэгъоныр IэпэIасэм иIэубытыпIэу, щысэхэмкIэ егъэджэныр ригъэкIокIыгъ. Хэгъэгу зэошхом ТекIоныгъэр къызыщыдахыгъэр илъэс 80 зэрэхъурэм фэгъэхьыгъэ IофшIагъэхэм къатегущыIагъ. Сурэтхэу «Заом иаужырэ макъэхэр», «Заом ыуж», «Къуаджэм иветеранхэр», «Ошъо къабзэр», «ЛIыхъужъым исурэт» зыфиIохэрэм къатегущыIагъ. Ахэм къащыгъэлъэгъогъэ пкъыгъо цIыкIу пэпчъ ныбжьыкIэхэм адызэхифыгъ.
— ТекIоныгъэм и Мафэ къэзыгъэблэгъэгъэ лIыхъужъхэу дунаир зыхъожьыгъэхэм ясурэтхэм тарихъым куоу ухащэ. ЛIыхъужъ пэпчъ ынэгу зэлъагъэу иIэр сурэттехым къыхигъэщын, лIэужыкIэм ыгу нэсэу иIофшIагъэ ыгъэпсын фае, — къыIуагъ IэпэIасэм.
Урысыем исурэттеххэм я Союз икъутамэу Адыгэ Республикэм щыIэм иклубэу «Лэгъонакъэ» хэтхэр, АР-м искусствэхэмкIэ иколледж истудентхэр, сурэттех ныбжьыкIэхэр ыкIи нэмыкI хьакIэхэр егъэджэн сыхьатым хэлэжьагъэх.
— ШIэжьыр мыкIосэнымкIэ, къыткIэхъухьэхэрэр Хэгъэгум фэшъыпкъэхэу пIугъэнхэмкIэ зишIуагъэ къэкIощт Iофтхьабзэхэр тапэкIи зэхэтщэщт. Хэгъэгу зэошхом илъэхъан къыщегъэжьагъэу непэ къызнэсыгъэм тизэолIхэм лIыхъужъныгъэу зэрахьэрэр ахэм алъыдгъэIэсыщт. НыбжьыкIэхэм ашIогъэшIэгъон хъущт лъэныкъохэр къыдэтлъытэщтых, — хигъэунэфыкIыгъ IэпэIасэм.
— Аркадий Кирнос ныбжьыкIэхэми ынаIэ атет, Iоф адешIэ. Илъэс 25-м къехъугъэу зэнэкъокъоу «Сурэт нэплъэгъу» зыфиIорэр, къэгъэлъэгъонхэр, мастер-классхэр, творческэ зэIукIэхэр зэхещэх. Сурэт техынымкIэ клубэу ыгъэлажьэрэм еджапIэ щызэхищагъэу ныбжьыкIэхэр мы сэнэхьатым фегъасэх, ар нэбгырэ 200-мэ къаухыгъ. Аркадий ригъэджагъэхэм ащыщыбэ IэпэIэсэныгъэшхо зыхэлъ сурэттех-журналист ыкIи сурэтышI хъугъэх, — къыхигъэщыгъ кIэлэегъэджэ шIэныгъэхэмкIэ кандидатэу, доцентэу, Мыекъопэ фотоклубэу «Лэгъонакъэм» хэтэу Еутых Саидэ.
Лъэпшъыкъо Фатим.
Сурэтыр: Iэшъынэ Аслъан.