ШIэжьыр агъэлъапIэзэ
![Image description](images_upload?image_name=2025/01/DSC_3072.jpg)
Хэгъэгу зэошхом ТекIоныгъэр къызыщыдахыгъэр илъэс 80, Мыекъопэ районыр, Адыгеир шъхьафит зашIыжьыгъэр илъэс 82-рэ зэрэхъухэрэм афэгъэхьыгъэ зэхахьэ станицэу Дахъо тыгъуасэ щыкIуагъ. Адыгеир шъхьафит зашIыжьыгъэ мафэм фэгъэхьыгъэ Iофтхьабзэу «ШIэжьым и Вахтэ» республикэм щаублагъ.
Ащ хэлэжьагъэх къэралыгъо хэбзэ къулыкъухэм, ветеран организациехэм, чIыпIэ зыгъэIорышIэжьыпIэхэм ялIыкIохэр, ныбжьыкIэ движениехэр.
Адыгеим и ЛIышъхьэ ыкIи хэбзэгъэуцухэм ацIэкIэ къэзэрэугъоигъэхэм закъыфигъэзагъ АР-м и Къэралыгъо Совет — Хасэм и Тхьаматэ игуадзэу, Урысыем и ЛIыхъужъэу Цэй Эдуард.
— Ти Хэгъэгу ишъхьафитыныгъэ зыпсэ фэзытыгъэ дзэкIолIхэм ацIэкIэ илъэс къэс зэхащэрэ Iофтхьабзэу «ШIэжьым и Вахтэ» непэ етэгъажьэ. Мыгъэ, Хэгъэгу зэошхор заухыгъэр илъэс 80 зыщыхъурэм, ащ имэхьанэ нахь зыкъеIэты, дзэкIолIхэу, офицерхэу тидунай фашизмэм щызыухъумагъэхэм яшIэжь къызэтедгъэнэным, дгъэлъэпIэным тынаIэ тедгъэтыщт. Урысыем имэхьанэ, тарихъ шIэжьыр чIэзыукъуащэхэрэм тызылъэпкъэу, тызэкъотэу тапэуцужьын фае. Илъэс 80-кIэ узэкIэIэбэжьмэ тятэжъ пIашъэхэу фашизмэм пэуцужьыгъэхэм афэдэу непи тидзэкIолIхэм щытхъу хэлъэу хэушъхьафыкIыгъэ дзэ операцием ядзэ пшъэрылъхэр щагъэцакIэх. Ащ фэдэ кIалэхэр Урысыем еIэфэхэ хэти егъашIи къызэрэттемыкIощтым тицыхьэ телъ. Псаухэу, узынчъэхэу ахэм къагъэзэжьынэу тафэлъаIо. Iофтхьабзэу «ШIэжьым и Вахтэ» патриотическэ хэбзэшIухэр ыкIи гушъхьэбаиныгъэхэр гъэпытэгъэнхэм ятамыгъэу орэхъу! — къыIуагъ Цэй Эдуард.
Нэужым зэхахьэм къыщыгущыIагъэх Мыекъопэ районым иадминистрацие ипащэу Михаил Марьиныр, АР-м лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет ипащэ игуадзэу К. Щербаковыр, АР-м иветеранхэм я Совет итхьаматэу Къуаджэ Аслъан, Урысыем и ДОСААФ икъутамэу Адыгеим щыIэм ипащэу Т. Барцор, нэмыкIхэри. Хэгъэгу зэошхом илъэхъан мэхьанэ зиIэ хъугъэ-шIагъэхэу Мыекъопэ районым щыIагъэхэр пстэуми япсалъэ къыщыхагъэщыгъэх. Адыгеим икъушъхьэлъэ чIыпIэхэр ары шъолъырым ишъхьафитыныгъэ икъыдэхын къызщырагъэжьагъэр. ПсэупIэу Дахъо 1943-рэ илъэсым пыир къыщызэтырагъэуцуи, Мыекъопэ лъэныкъомкIэ хы ШIуцIэ Iушъом Iуагъэхьагъэп. Адыгеим ыубытырэ чIыналъэу илъэсныкъорэ къэдзыхьэгъагъэр Темыр-Кавказ операцием ишIуагъэкIэ шъхьафит хъужьыгъэ.
![](images_upload?image_name=2025/01/DSC_3128-1024x682.jpg)
Хэгъэгу зэошхом илъэхъан Адыгеир шъхьафит ашIыжьыныр зыщырагъэжьэгъэ чIыпIэм щагъэуцугъэ мыжъосыным, нэмыцхэм жъалымыгъэ адызэрахьэзэ нэбгырэ 400 зыщаукIыгъэ чIыпIэм щыт мыжъосыным ыкIи Адыгеир къэзыухъумэгъэ лIыхъужъхэм афагъэпсыгъэ саугъэтым къэгъагъэхэр акIаралъхьагъэх.
Заом хэкIодагъэхэм зы такъикърэ афэшъыгъуагъэх.
Iэшъынэ Сусан.