Лъы атыгъ
![Image description](images_upload?image_name=2025/01/6f25966b-538a-4b4f-801d-b15e57e3fb0d.jpg)
Студентхэм я Мафэ ехъулIэу республикэм иныбжьыкIэхэр шIушIэ Iофтхьабзэм хэлэжьагъэх — лъы зыщахащырэ Адыгэ республикэ станцием нэбгырэ 35-рэ тыгъуасэ екIолIагъ.
«Адыгеим иныбжьыкIэхэр» зыфиIорэ республикэ автоном учреждениемрэ Урысые общественнэ движениеу «Волонтеры Медики» зыфиIорэмрэ Iофтхьабзэм кIэщакIо фэхъугъэх.
ПэшIорыгъэшъэу ахэм ялъ ауплъэкIугъ, врачым гущыIэгъу фэхъугъэх. ЗипсауныгъэкIэ дагъо зимыIэхэр ары шIушIэ Iофтхьабзэм хэлэжьагъэхэр.
Лъы зищыкIагъэхэм IэпыIэгъу афэхъунхэ зэралъэкIыщтыр студентхэм къагурыIоныр, цIыфым ипсауныгъэ къэгъэнэжьыгъэнымкIэ мэхьанэу ащ иIэр зэхашIэныр ары зэхэщакIохэм пшъэрылъ шъхьаIэу зыфагъэуцужьыгъэр.
— Непэрэ Iофтхьабзэм мэхьанэу иIэр зэхасшIэзэ сыкъекIолIагъ. ЫпэкIи лъы стын мурад сиI, — къытиIуагъ Мыекъопэ къэралыгъо технологическэ университетым истудентэу Самсон Хачатрян.
Адыгэ къэралыгъо университетым истуденткэу Дарья Лысенкэм ипсауныгъэ изытеткIэ лъы ытын ылъэкIыщтыгъэп. Джы зэтеуцожьыгъэу Iофтхьабзэм хэлэжьэн амал иIэ зэрэхъугъэр гушIозэ къыIуагъ, ыпэкIи зэрэхэлэжьэщтыр къыхигъэщыгъ.
ДЕЛЭКЪО Анет.