Top.Mail.Ru

Адыгеим я 16-рэ чIыпIэр ыубытыгъ

Стратегическэ инициати­вэхэмкIэ Агентствэм игенеральнэ директорэу Светлана Чупшевам АСИ-м илъыплъэ­кIо совет изэхэсыгъо Урысыем и Президентэу, советым ипащэу Владимир Пути­ным ыпашъхьэ 2024-рэ илъэсымкIэ шъолъырхэм щыIэкIэ-псэукIэу яIагъэм ирейтинг икIэуххэр къыщызэфихьысыжьыгъэх. Пэрытныгъэр зыIыгъ шъолъыр 20-мэ мы илъэсым шъолъыри 3 къазэрэхэхъуагъэр, я 16-рэ чIыпIэр зыубытыгъэ Адыгэ Респуб­ликэр ахэм зэращыщыр зэхэсыгъом къыщыхагъэщыгъ.

Мэхьанэшхо зиIэ хъугъэ-шIагъэу ар щыт, сыда пIомэ цIыфымрэ унагъомрэ уасэ зэратырэ лъэныкъо­хэр рейтингым къыщыдэлъытагъэх. Ахэр псэупIэм, IофшIэн ягъэгъотыгъэ­ным, медицинэм, щынэгъончъэным, чIы­опсым икъэухъумэн, цIыфхэм амалэу яIэхэм зыкъызэIуягъэхыгъэным япхыгъэ Iофыгъох. ПстэумкIи лъэныкъуи 10-мкIэ къэгъэлъэгъони 140-мэ уасэ афашIы. ЦIыфхэм яуп­чIыхэзэ, статистикэмрэ геоаналитикэмрэ къызфагъэфедэхэзэ, лъэныкъо пэпчъкIэ гъэхъагъэу ашIыгъэхэм уасэ араты.
«Тикомандэ Iофышхо зэрэзэшIуихыгъэр рейтингым къыушыхьатыгъ. Урысые Федерацием и Президентрэ хэгъэгум и Правительствэрэ яIэпыIэгъу хэлъэу республи­кэм социальнэ- экономикэ хэхъоныгъэ зэришIырэ лъэныкъо шъхьаIэхэмкIэ хэпшIыкIэу тылъыкIотэн тлъэкIыгъ.
ГъэрекIо промышленнэ производствэм ииндекс зыкъиIэтыгъ, инвестициехэм къахэхъуагъ, мэкъу-мэщым къыщахьыжьыгъэри нахьыбэ хъугъэ. ЗыгъэпсэфыпIэу «Лэгъонакъэрэ» промышленнэ шъолъырэу «Инэмрэ» яшIын тегъэпсыхьэгъэ проектхэр тэгъэцакIэх. Гъомылапхъэр щынэгъон­чъэнымкIэ Президентым къыгъэуцугъэ пшъэрылъхэр тэгъэцакIэх. Социальнэ инфраструктурэм зетэгъэушъомбгъу, еджапIэхэр, псауныгъэм икъэухъумэн­кIэ, культурэмкIэ псэуалъэхэр тэшIых, гъогухэр тэгъэцэкIэжьых ыкIи кIэхэр тэгъэпсых. Бюджетым ифедэ­хэм, цIыфхэм ахъщэу къаIэкIахьэрэм ахэтэгъахъо. IофшIэн зимыIэхэм япчъагъэ къетэгъэIыхы.
ЦIыфхэм ящыIэкIэ-псэукIэ нахьышIу шIыгъэнымкIэ Президентым пшъэ­рылъэу къыгъэуцугъэм игъэцэкIэнкIэ тапэкIи тфэлъэкIырэр зэкIэ тшIэщт. Федеральнэ гупчэм IэпыIэгъоу къытитырэр мы лъэныкъомкIэ къызфэтэгъэфедэх, АСИ-м зэпхыныгъэ дытиI, IофшIэкIэ анахь дэгъухэу шъолъырхэм къыхахыгъэхэр къызфэтэгъэфедэх. Шъыпкъэ, тишъолъыр исхэм къызэрэддырагъаштэрэми мэхьанэшхо етэты. ЦIыфхэм цыхьэ къызэрэтфашIырэм, гъэпсын Iофхэм ахэр къызэрахэлажьэхэрэм амал къытаты тицыхьэ зытелъыжьэу ыпэкIэ тыплъэнэу!»
ритхагъ КъумпIыл Мурат ителеграм-канал.