Хабзэ зэрэхъугъэу, щылэ мазэм и 25-м студентхэм я Дунэе мафэ хагъэунэфыкIы. Мыщ ипэгъокIэу ныбжьыкIэ анахь чанхэм ягугъу тэшIы.

Сыдэ фэдэрэ лъэхъани студентыгъор анахь гум къинэжьэу зэкIэми алъытэ, мы гъогур къэзыкIугъэу гу­къэкIыжь гъэшIэгъон зимыIэ щы­Iэп. Апшъэрэ еджапIэм щагъэкIогъэ уахътэм дакIоу общежитием щыпсэущтыгъэхэр зэрэзэхахьэщтыгъэхэр, зэрэчэфыщтыгъэхэр, адыгэ джэгу­хэр зэрашIыщтыгъэр ащыгъупшэрэп.
Уахътэр лъэкIуатэ, щыIэныгъэр зэхъо­кIы. Непэ общежитием щыпсэурэ ныбжьыкIэхэм ящыIэныгъэ зы­фэдэр зэдгъа­шIэ тшIоигъоу Адыгэ къэралыгъо университетым теолIагъ. Мы апшъэрэ еджа­пIэм общежитии 3 иI. Илъэс пчъа­гъэ хъугъэу ахэм ачIэс студентхэм я Совет зэхащагъэу, ныбжьыкIэхэм Iоф­тхьэбзэ зэфэшъхьафхэр афызэхащэх. Ащ хэт пшъэшъэжъыем гущыIэгъу ты­фэхъугъ ыкIи непэрэ студентэу общежитием щыпсэурэм ищыIэныгъэ къытфиIотагъ. Даур Фатимэ Мамхыгъэ щыщ, Адыгэ къэралыгъо университетым тарихъымкIэ ифакультет иятIонэрэ курс щеджэ. Пшъэшъэ нэутх, чан.
— Гурыт еджапIэр къэуухэу нэмыкI къалэ узыкIокIэ, огумэкIы. Апэрэ тхьамафэм адыгабзэкIэ сызыдэгущыIэн зи сапэ къифа­гъэп, ар сшIогумэкIыгъо дэдагъ. Адыгэхэми урысыбзэкIэ уадэгущыIэн фае, чылэм сызэкIожьым синыдэлъфыбзэ сыгу къыздеIэу зэхэсхыжьыгъ. Сыдэу пшIын, сесэжьыгъ. Гурыт еджапIэм ущеджэрэм фэдэп, студенты­гъор нахь къин. Уянэ-уятэхэр, узэ­сэгъэ щыIакIэр къызэоунэкIы, уныбжь зэрикъугъэр зэхэошIэ. Апэрэ мафэм къыщегъэжьагъэу общежитием сычIэс. Шъыпкъэу пIощтмэ, къин къысщыхъурэп, унэм къыбдисым мэхьанэшхо иI, тызэгурэIо,— еIо пшъэшъэ­жъыем.

Апэрэ курсым гумэкIыгъо зэрэхэтыгъэр дэгъоу ыгу къэкIыжьы. Еджэным нэмыкI зи ылъэгъущтыгъэп, ау апэрэ сессиер зытекIым, нахь рэхьат хъугъэ, общежитием чIэс студентхэм я Совет хэхьагъ. Джащ дэжьым иныбжьыкIэ гъогу нахь гъэшIэгъон хъугъэ, ныбджэгъухэми къахэхъуагъ.
Пшъэшъэжъыем къызэрэтиIуагъэмкIэ, Советым пшъэрылъэу иIэр общежитием щыпсэухэрэм языгъэпсэфыгъо уахътэ гъэшIэгъонэу афызэхэщэгъэныр ары. Купышхоу къаугъоихэзэ кино зэфэ­шъхьафхэр къафагъэлъагъо, джэгукIэхэр, зэнэкъокъухэр афызэхащэх. Апэрэ курсым исхэм апэрэ сессиер зэратыгъэм пае Iофтхьабзэ агъэхьазырыгъагъ, ар еджэныр езыгъэжьэгъэкIэ студентхэм ягуапэ хъугъэ, ашIогъэшIэгъоныгъ ыкIи нахьыжъхэр къазэрэкъоуцощтхэр къагурыIуагъ.
Общежитием чIэсхэм я Совет непэрэ мафэм ипащэр Инна Поповар ары. БэмышIэу ар техьагъэми, шIуагъэ къызыпыкIыщт Iофтхьабзэхэм язэхэщэн ыуж ит. Студент анахь чанхэр игъусэхэу Iоф­тхьэбзэ гъэшIэгъонхэр рагъэкIокIых. Къихьэгъэ илъэсымкIэ пшъэрылъхэр агъэнэфагъэх, зы мэфэкI бламыгъэкIэу хагъэунэфыкIынэу унашъо ашIыгъ. Студентхэм я Мафэ ныбжьыкIэхэм сессиер атэу тефэшъ, янахьыбэр унэм мэкIожьы, ащ къыхэкIыкIэ зи зэхащэрэп, ау телефонкIэ зэфэгушIощтых.
— Сэ апэрэ общежитиеу IэзапIэм ышъхьагъ тетым сычIэс, пшъэшъэжъые нэмыкI ащ щыпсэурэп, рэхьат, тызэгурэ­Iожьы. Ар къатищэу зэтет, зы къатым унэ 25-рэ хэт, нэбгыри 100 тес. ЯтIонэрэ къатым Туркменистан къикIыгъэ студентхэр ары щыпсэухэрэр. ЫпэкIэ мыщ IэкIыб къэралыгъохэм къарыкIыгъэхэр ары ныIэп чIэсыгъэ­хэр, ау ящэнэрэ общежитиеу Мыекъуапэ ирайон цIыкIоу Черемушкэм итым гъэцэкIэжьынхэр зэрэрашIылIэрэм ыпкъ къикIыкIэ урысые гражданствэ зиIэхэри чIэ­сы хъугъэ. Общежитием учIагъэтIысхьаным пае ыпэрапшIэу бюджет мылъкукIэ еджэщтхэм уахэфэн фае. Нэужым къыптефэми, къыптемыфэми къы­уаIо, — еIо Фатимэ.
Общежитием чIэсхэм еджэн амал ямыIэу, зэрэгъэчэфхэу зэхэсхэу бэмэ къашIошIы, ау арэущтэу зэрэщымытыр Фатимэ къыIуагъ. ШъхьэкIэфэныгъэ зэфашIы, еджэрэм пэрыохъу фэхъухэрэп, зыщищыкIагъэми нахьыжъхэр нахьыкIэхэм IэпыIэгъу афэхъух.
— Общежитием ущыпсэуныр гъэ­шIэгъоны, ятIонэрэ унэ тфэхъугъ, — еIо тигущыIэгъу. — ЧIыпIэ зэфэшъхьафхэм та­къырыкIыгъ нахь мышIэми, зы унагъом тыфэд, нахьыжъхэр сыдигъокIи къытхэтых, къытлъэп­лъэх. Общежитие пэпчъ шап­хъэхэр чIэлъых, ахэр уукъо хъущтэп. Сыхьатыр 10 мыхъузэ унэм укъэкIожьын фае.
Фатимэ къызэриIуагъэмкIэ, унэм урыс пшъэшъэжъыитIурэ Узбекистан къикIыгъэ зы пшъэшъэжъыерэ къыдисых. ЗэгурыIоныгъэ азыфагу илъыным фэшI нэбгырэ пэпчъ ышIэщтыр агъэнэфагъ. Ежьыр пщэрыхьаным фэгъэзагъ. Адыгэ шхыныгъохэр ренэу афешIых, щыпсыр, щхыу зэхэлъыр, къояжъэр анахь якIасэу ашхыхэрэм ащыщых. Джащ фэдэу чылэм къырихыжьыщт адыгэ шхынхэм пшъэшъэ­жъыехэр яжэх. Фатимэ илъэпкъ культурэ илэгъухэм арегъашIэ, адыгэбзэ гущыIэхэр къарегъаIох. Еджэныр къаухыгъэу зыщыщым кIожьыгъэхэми, Адыгеир агу икIы­жьыщтэп.
Студентыгъор анахь лъэхъэнэ дэгъухэм зэращыщыр Даур Фатимэ кIэухым къы­Iуагъ. Университетым щызэхащэрэ Iоф­тхьабзэхэм анэмыкIэу, пчыхьэрэ къэлэ паркым макIох, Пушкинскэ картэр къызфагъэфедэзэ Лъэпкъ музеим щэIэх, спектаклэ зэфэшъхьафхэм яплъых, яуахъ­тэ гъэшIэгъонэу, гум къинэжьынэу агъакIо.
ДЕЛЭКЪО Анет.