1941 — 1945-рэ илъэсхэм щыIэгъэ Хэгъэгу зэошхом ТекIоныгъэр къызщыдахыгъэр илъэс 80 зэрэхъурэм изыфэгъэхьазырынрэ изэхэщэнрэ афэгъэзэгъэ комитетым изэхэсыгъо АР-м и ЛIышъхьэ и Координационнэ гупчэ щыкIуагъ. Адыгеим и ЛIышъхьэу КъумпIыл Мурат Iофтхьабзэр зэрищагъ.

Зэхэсыгъом хэлэжьагъэх АР-м и Къэ­ралыгъо Совет – Хасэм и Тхьаматэу Владимир Нарожнэр, Адыгеим иминистрэхэм я Кабинет и Тхьаматэу КIэрэщэ Анзаур, министрэхэм я Кабинет хэтхэр, къулыкъу зэфэшъхьафхэм, дзэ комиссариатым, Мыекъопэ гарнизоным, ветеран­хэм яреспубликэ Совет, фондэу «Хэгъэ­гум иухъумакIохэр» зыфиIорэм икъутамэ, Адыгэ къэралыгъо университетым, Мые­къопэ къэралыгъо технологическэ университетым, АР-м ибзылъфыгъэхэм я Союз культурэм иучреждениехэм, ныбжьыкIэ объединениехэм, муниципалитетхэм япащэхэр.
Адыгеим и ЛIышъхьэ ишIуфэс гущыIэ къызэрэщыхигъэщыгъэмкIэ, Урысыем и Президентэу Владимир Путиным Хэгъэгум и УхъумакIо и Илъэсэу ыгъэнэфагъэм тихэгъэгукIэ мэхьанэшхо иI – ТекIоныгъэшхом ия 80-рэ илъэсэу ар щыт.
«ТекIоныгъэм ия 80-рэ илъэс ихэгъэ­у­нэфыкIын федеральнэ лъэгапIэм диштэу лъэшэу анаIэ тырагъэты. Ар Урысыем ис цIыфхэм ящыIэныгъэкIэ анахь мэхьанэшхо зиIэ хъугъэ-шIагъэхэм зыкIэ ащыщэу хъун фае», — къыIуагъ КъумпIыл Мурат.
Республикэм и ЛIышъхьэ къызэрэхигъэщыгъэмкIэ, Хэгъэгу зэошхор тикъэралыгъо итарихъ къыхэхъухьэгъэ анахь лъыгъэчъэ ыкIи жъалымыгъэ зыхэлъ заоу щытыгъ, нэбгырэ миллион 27-рэ ащ хэкIодагъ. КъыткIэхъухьэхэрэм мамыр щыIакIэ яIэным пае Адыгеим икIыгъэ нэбгырэ мин 33-м ехъумэ апсэ агъэтIылъыгъ.
Урысыем и Президент анахьэу анаIэ зытыраригъэдзагъэхэм ащыщ тарихъыр зытетым тетэу, чIэукъощагъэ хэмылъэу зыфэдагъэр ашIэнымкIэ Iофтхьабзэхэу зэшIуахыщтхэм мэхьанэшхо зэряIэр. Республикэм и ЛIышъхьэ къызэриIуагъэм­кIэ, ныбжьыкIэхэм дэгъоу къагурыIон фае хъугъэ-шIагъэм мэхьанэу иIэр, тятэхэм, тятэжъ пIашъэхэм ялIэужхэу зэрэщытхэр, ахэм япэсыгъэу зекIонхэ зэрэфаер зэхамышIэ хъущтэп.
«Зэрифэшъуашэм тетэу ТекIоныгъэшхом ия 80-рэ илъэс ихэгъэунэфыкIын зэхэтщэн фае. Республикэм щыпсэурэ ветеран закъуи тынаIэ икъоу тетымыгъэ­тэу къэдгъанэ хъущтэп», — къыIуагъ КъумпIыл Мурат.
Адыгеим и ЛIышъхьэ къызэрэхигъэщыгъэмкIэ, непэ хэушъхьафыкIыгъэ дзэ операцием хэлажьэхэрэм а зэо мэхъа­джэу къызэтынэкIыгъэм хэлэжьагъэхэм ялIыхъужъныгъэ фэдэхэр зэрахьэх. Мы илъэсым къыщегъэжьагъэу республикэм щагъэцакIэу рагъэжьэщт «Адыгеим и ЛIыхъужъхэр» зыфиIорэ программэр.
«ТикIалэхэм непэ зэрахьэрэ блэна­гъэм джыри зэ къеушыхьаты тятэжъ пIашъэхэм япэсыгъэ лIэужэу ахэр зэрэщытхэр. ЗэкIэми тызэкъотын, тызэгъусэу тарихъ шIэжьыр къэтыухъумэн, зытет шъыпкъэм фэдэу къыткIэхъухьэхэрэм ар анэдгъэсы­жьын фае», — къыIуагъ Къум­пIыл Мурат.
МэфэкI Iофтхьабзэхэм языфэгъэхьазырын епхыгъэу къэгущыIагъэх АР-м лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу Шъхьэ­лэхъо Аскэр, бригадэм икомандир игуадзэу Николай Деменок, АР-м культурэмкIэ иминистрэу Аулъэ Юрэ, ныбжьыкIэ IофхэмкIэ Комитетым итхьаматэу Максим Галушкиныр, Мыекъуапэ имэрэу Геннадий Митрофановыр, хэгъэгу кIоцI IофхэмкIэ Министерствэм шэпхъэ гъэнэфагъэхэм якъэухъумэнкIэ иполицие ипащэ игуадзэу Андрей Федосеевыр.
КъызэрэхагъэщыгъэмкIэ, а Iофтхьэбзэшхоу рекIокIыщтым ифедеральнэ план къыдыхэлъытагъэу республикэм щызэшIуахыщтхэ Iофтхьабзэхэри агъэнэфа­гъэх, агъэцакIэхэуи рагъэжьагъ.
ЖъоныгъуакIэм и 8-м республикэм и Филармоние зэIукIэшхомрэ мэфэкI кон­цер­тымрэ щыкIощтых, гупчэ саугъэтым къэгъэгъэ блэрхэр жъоныгъуакIэм и 9-м кIэлъыралъхьащтых. Ащ нэмыкIэу мы мэфэ дэдэм Мыекъопэ гарнизоным идзэ­къулыкъушIэхэр, хэбзэухъумэкIо къулыкъухэм яIофышIэхэм ащыщхэр, юнармейцэхэр урамым къырыкIощтых, дзэ техни­кэм епхыгъэ къэгъэлъэгъонхэри зэхащэщтых.

АР-м культурэмкIэ и Министерствэ 2025-рэ илъэсымкIэ Iофтхьэбзэ 600-м ехъу ыгъэнэфагъ. Ахэр: лIыхъужъныгъэм идесэхэр, спектаклэхэр, къэгъэлъэгъонхэр, еджапIэхэм ащызэхащэщт концертхэр, кIэлэеджакIохэмрэ студентхэмрэ анахь сурэт дэгъоу ыкIи плакатхэу ашIыгъэхэмкIэ язэнэкъокъухэр, музей къэгъэлъэгъонхэр, лъэпкъ Iэмэ-псымэхэм къязыгъэIорэ ныбжьыкIэхэм яфестивальхэр ыкIи нэмыкIхэр.
НыбжьыкIэ политикэм ипхырыщын епхыгъэ Iофтхьэбзэ заулэми Iоф адашIэ. «Блокадный хлеб», «Рисуем Победу», «ТекIоныгъэм и Быракъ», «ТекIоныгъэм ишъхьаныгъупчъэхэр», «Уи ЛIыхъужъхэр», «ШIэжьым ишэф», «Георгиевская лента» зыфиIохэрэр ыкIи нэфэшъхьафхэр. А пстэуми анэмыкIэу тарихъым епхыгъэ сыхьатхэр, кинохэм якъэгъэлъэгъон, Хэгъэгу зэошхом ишIэжь мыкIосэным фытегъэпсыхьэгъэ Iофтхьабзэхэр зэхащэщтых. Дзэ саугъэтхэм ягъэкъэбзэн, ягъэцэкIэжьын епхыгъэ шIыхьафхэу зэхащэщтхэми кIэлэеджакIохэмрэ ныбжьыкIэхэмрэ ахэлэжьэщтых.
ТекIоныгъэшхом июбилей фэгъэхьыгъэ баннерхэр къалэу Мыекъуапэ иэлектрон экранхэм арагъэхьагъэх. Муниципалитетхэм япащэхэм хэушъхьафыкIыгъэ пшъэрылъхэр афашIыгъэх, ахэр зэпхыгъэхэр: цIыф псэупIэхэр Iофтхьэбзэ зэфэшъхьафхэм япхыгъэу агъэкIэрэкIэнхэр, дзэкIолIхэр зыщагъэтIылъыгъэ чIыпIэхэмрэ саугъэтхэмрэ апэIулъ чIыпIэхэр зэтегъэпсыхьэгъэнхэр.
МэфэкI мафэхэм япэгъокIэу хэбзэ къулыкъухэм ялIыкIохэр республикэм иветеранхэм адэжь кIощтых. Юбилей медальхэри ветеранхэм муниципалитетхэм ащафагъэшъошэщтых. Республикэм икъалэхэмрэ ирайонхэмрэ игъэкIотыгъэ хэбзэ Iофтхьабзэхэр зыщызэшIуахыщтхэ чIыпIэхэр зэтырагъэпсыхьащтых. КъэбарлъыгъэIэс амалхэм ыкIи социальнэ хъытыухэм Iофтхьабзэхэм афэгъэхьыгъэ къэбарыр цIыфхэм алъагъэIэсыщт.
АР-м и ЛIышъхьэ ипресс- къулыкъу къытырэ къэбархэмкIэ
Тхьаркъохъо Сафыет.