АР-м и ЛIышъхьэу КъумпIыл Мурат Хэгъэгу зэошхом ТекIоныгъэр къызыщыдахыгъэр илъэс 80 зэрэхъурэм игъэ­мэфэкIын фэгъэзэгъэ зэхэщэкIо коми­тетым изэхэсыгъо къы­щиIуагъ сэнэхьат ухьазырыныгъэмкIэ шъолъыр программэу «Адыгеим и ЛIыхъужъхэр» зыфиIорэр республикэм щагъэцакIэу зэраублэщтымкIэ. Мэзаем ащ ипхырыщын фежьэщтых. ПрограммэмкIэ гухэлъэу яIэр хэушъхьафыкIыгъэ дзэ операцием иветеранхэу фронтым лIыхъужъныгъэ щызезыхьагъэ­хэр, къэра­лыгъо, муниципальнэ гъэIоры­шIэнымкIэ къулыкъухэр ащ къыхэгъэ­лэжьэгъэнхэр ары.

«УФ-м и Президентэу Владимир Путиным къахилъхьэгъэ ащ фэдэ федеральнэ программэр гъэрекIо щегъэжьагъэу агъэцакIэ. Ащ мэхьанэу иIэм зыкъызэриIэтырэм епхыгъэу къэралыгъом ипащэ пшъэрылъ къыгъэуцугъ шъолъыр­хэри ащ фэдэ проектым игъэцэкIэн фежьэнхэу», — хигъэунэфыкIыгъ КъумпIыл Мурат.
Шъугу къэтэгъэкIыжьы гъэсэныгъэмкIэ федеральнэ программэу «ЛIыхъужъхэм яуахът» зыфиIорэр Урысыем и Президентэу Владимир Путиным пшъэ­рылъ зэрафишIыгъэм тетэу народнэ хъызмэтымкIэ ыкIи къэралыгъо къулыкъухэмкIэ Урысые академием къэралыгъо гъэIорышIэнымкIэ иапшъэрэ еджапIэ зэрэпхырищырэр. Адыгеим иапшъэрэ еджапIэхэм республикэ программэм яIахь хашIыхьащт. Ащ хэлэжьэнхэм пае анкетэхэмрэ тестхэмрэ арыт упчIэхэм джэуап къаратыжьын фае. Фондэу «Хэгъэгум иухъумакIохэр» зыфиIорэм икъу­тамэ федеральнэ программэу «ЛIыхъужъ­хэм яуахът» зыфиIорэм хэлэжьэщтхэм пэIудзыгъэ шIыкIэм тетэу уасэ къязы­тыщт чIыпIэр къыщызэIуахыгъ. Джыдэдэм нэбгырэ 20-мэ тестхэр акIугъахэх.
ХэушъхьафыкIыгъэ дзэ операцием иветеранхэу къыхахы­хэрэр очнэу республи­кэм иапшъэрэ еджапIэхэм ащеджэнхэ алъэ­кIыщт апшъэрэ гъэсэныгъэ яIэу щытмэ. УФ-м и УIэшыгъэ КIуа­чIэхэм къулыкъу ащызыхьыхэрэр шъолъыр программэм ирезерв хагъэхьащтых.
АР-м и ЛIышъхьэ зэрэхигъэунэфыкIы­гъэмкIэ, федеральнэ программэм ехьыщырэу гъэсакIохэм якуп республикэм щызэхащэщт. Хабзэм илIыкIо, игъэцэкIэкIо, имуниципальнэ къулыкъухэм япащэхэр ащ хэхьащтых. Ащ нэмыкIэу Общественнэ-лъыплъэкIо советэу республикэм щызэхащэщтым хэушъхьафыкIыгъэ дзэ операцием иветеранхэм Iоф адишIэщт, мамыр щыIакIэм ахэр хэгъэ­гъозэжьыгъэнхэмкIэ IэпыIэгъу афэхъущт. Обществэм цыхьэрэ лIытэныгъэрэ зыфишIырэ цIыфхэр ары Советым хагъэ­хьащтхэр.
«Хэгъэгум иухъумакIо и Илъэс мы программэр зэрагъэцакIэрэр тидзэ­кIолIхэм IэпыIэгъоу аратырэм изы лъэ­бэкъоу щыт. ЯзекIуакIэкIэ ахэм къагъэлъэгъуагъ хэгъэгуми, япшъэрылъи зэрафэшъыпкъэхэр. Пытагъэу, теубытагъэу ахэм ахэлъыр, ямурад къадэхъунымкIэ афэлъэкIыщтыр зэкIэ зэрашIэрэр, пшъэ­рылъ анахь къинхэри зэрэзэшIуахышъу­хэрэр шIокI имыIэу Адыгеим къыщызфагъэфедэн фае. ДзэкIолIхэм лIыхъужъныгъэу зэрахьэрэм къеушыхьаты тятэжъ пIэшъэ лIыбланэхэм якIэн къэухъумагъэ зэрэхъурэр», — къыIуагъ республикэм ипащэ.
АР-м и ЛIышъхьэ ипресс-къулыкъу къытырэ къэбархэмкIэ
ЛIышэ Саныет.