Адыгэ гущыIэр еухъумэ, Iэрытхыр бзэшъуашэм релъхьэ, тхылъыр дунаишхом хэхьаным дэлажьэ. Аджырэ Мае ищыIэныгъэ гъогу Адыгэ тхылъ тедзапIэм рипхыгъ.

Адыгэ тхылъ тедзапIэр загъэпсыгъэр илъэс 96-рэ хъугъэ. Адыгэ литературэр ылъэ тетыным ар фэлажьэ. Лъэпкъ художественнэ лъэныкъомкIи, жанрэхэмкIи, шъошэ зэфэшъхьафхэмкIи адыгабзэкIэ ыкIи урысыбзэкIэ тхыгъэхэр къыхаутых. ЛIэшIэгъу фэдиз хъугъэу лэжьэрэ тхылъ тедзапIэм къеолIэрэ тхакIохэм темакIэхэр, гупшысакIэхэр, еплъыкIа­кIэхэр къыздахьых. Ахэм Iоф адешIэ тхылъ тедзапIэм илъэс 32-рэ хъугъэу щылэжьэрэ, урысыбзэ литературэм иотдел иредакторэу Аджырэ Мае. Ащ бэмышIэу тын лъапIэу «Адыгэ Рес­публикэм культурэмкIэ изаслуженнэ IофышI» зыфиIорэр къыфагъэшъошагъ. Ар «Адыгэ макъэм» ихьакIэщ къедгъэб­лэгъагъ.
Адыгэ тхылъ тедзапIэм тхэныр езгъэ­жьэгъэкIагъэ, адыгэ тхэкIо пчъагъэмэ яапэрэ тхылъхэр къыщыхаутыгъэх, ахэр литературэм ылъапсэ хъугъэх, нэужым адыгэ дунаим щызэлъашIагъэх. Мыщ Iоф ешIэфэ тхылъ минитфым ехъу къыщыхаутыгъ, ахэр экземпляр миллиониблым шъхьадэкIыгъ. Непэ Адыгэ тхылъ тедза­пIэм адыгабзэкIи урысыбзэкIи тхылъхэр къыщыхаутых. Ахэр нахьыбэрэмкIэ ти­тхакIомэ атхыгъэ романхэр, повестьхэр, усэхэр зыдэтых.
— СицIыкIугъом щыублагъэу тхылъхэр сикIас. Кощхьэблэ гурыт еджапIэм сыщеджэзэ, журналистэу сыхъунэу сыгу исыубытагъ, ащ пае Ростов дэт къэралыгъо университетым филологиемкIэ ифакультет къэсыухыгъ. СыныбжьыкIэ дэдэу район гъэзетхэм стхы­хэрэр къащыхаутыщтыгъ. ЯтIонэрэ курсым сисэу тхылъ тедзапIэм практикэ щысхьыгъ, ащ ыуж садэ-лэжьэнэу къысэджагъэх. Джащ щыублагъэу сигъэшIэ гъогу тхылъ тедзапIэм еспхыгъ, нэмыкI лъагъо горэм сырыкIонэу зыкIи сыгу къихьагъэп. Журналистикэм дакIоу илъэсиплIрэ литературнэ ре­дакторэу седжагъ. Ащ фэгъэхьыгъэуи сидиплом IофшIэн стхыгъэ. Гъогоу къэскIурэр сэркIэ ренэу гъэшIэгъоныгъ. Тхылъым идунай сыхэтэу сэлажьэ, адыгэ гущыIэр зыухъумэрэмэ сащыщэу зысэлъытэжьы, — къеIуатэ Мае.
Сэнэхьат гъэшIэгъоным шIокI имыIэу бзэшIэныгъэр ищыкIагъ.
— Тхылъэу къыдэдгъэкIыщтым Iоф дэсэшIэ, хэутыным фэсэгъэхьазыры. Iэрытхэу авторым къыхьырэр шъошэ тэрэзым ислъхьажьыным сыдэ­лажьэ. Мыщ дэжьым къэIогъэн фае, Iэрытхым иавтори тхылъеджа­кIоми агу рихьэу тхылъыр щытын фае. ТхэкIо нахьыжъэу къытфэнагъэр мэкIэ дэд, ныбжьыкIэу адыгабзэкIэ тхэхэрэр зырызых. Тхэным фэщагъэхэр зэрэмакIэр непэ гумэкIыгъошху. Тиадыгэ литературэ тыфэсакъын, къэтыухъумэн фае, а пшъэ­рылъыр тиамалкIэ тэгъэцакIэ, тауж къикIыхэрэм IофшIэныр лъа­гъэкIотэнэу сэгугъэ, — еIо Мае.
Уахътэм зэхъокIыныгъэхэр, шэп­хъакIэхэр къыздехьых. Джырэ технологиякIэхэр цIыфмэ агъэфедэ, компьютерымкIэ дунэе хъытыум хэхьэх, тхылъ зэмылIэужыгъуабэ ащ рагъуа­тэ. ТхылъыпIэм тетыр непэрэ мафэм ныбжьыкIэхэм ашIогъэшIэгъонэп, мы гумэкIыгъор дэгъэзыжьыгъэным тыпылъын фае. ТитхакIохэм якъэлэмыпэ къычIэкIырэ тхыгъэхэри нахь къэмэкIагъэх. Тхылъ пэпчъ тикультурэ хе­гъахъо, зырегъэушъомбгъу, зырегъэIэты. ЛIэужыкIэхэм ащ уасэу фашIырэр зэрытлъэкIэу къэтIэтын фае. Тины­дэлъфыбзэ икъызэтегъэнэн-ухъумэн хэт­рэ адыгэкIи анахь мэхьанэ зиIэу сэлъытэ, — къеIуатэ Мае.
Къэралыгъо IэпыIэ­гъум ишIуагъэкIэ авторым ыпкIэ ымытэу тхылъ къы­дигъэкIын елъэкIы.
— Тхылъыр шIэныгъэ къэкIопIэ ин ыкIи гущыIэгъу гъэшIэгъон, ар уфэсакъэу зэодзэкIы, уеджэ, узIэпещэ, къы­Iуатэрэр зэкIэ нэм кIэкIы. Ащ идунэе гъэшIэгъон тхылъеджэхэр хэпщэнхэм пае тхы­лъыр аIэкIэбгъэхьан, иIэшIугъэ агурыбгъэIон фае. Ащ пае тхылъ­еджапIэхэм, апшъэрэ гурыт еджапIэхэм та­дэлажьэ. ТхылъыкIэхэм ялъэтегъэуцохэм тахэлажьэ. Тхылъыр тисабый пIугъэ фэдэу, шIэны­гъэм идунаишхо хэтэтIупщыхьэ, — еIо Мае.
ТидэгущыIэгъу къызэриIотагъэмкIэ, имэкIайхэм тхылъыбэ ателъ. Ипшъэшъи­щи, ипхъорэлъфхэми тхылъыр шIу аригъэлъэгъугъ. Тхылъым фэщагъэхэу ыкIи уасэ фашIэу иунагъо исхэр ыпIу­гъэх. Къэ­ралыгъо тын лъапIэу «Адыгэ Респуб­ликэм культурэмкIэ изаслуженнэ IофышI» зыфиIорэр Мае къыфагъэшъошагъ.
— Лъэшэу сырэгушхо цIэ лъапIэр къызэрызлэжьыгъэм. Сизакъоу ар сигъэ­хъагъэп, сызщылэжьэрэ тхылъ тедзапIэм бэкIэ епхыгъ. Лъэпкъым уфэлэжьэныр насыпыгъ, — хигъэунэфыкIыгъ Мае.
Лъэпшъыкъо Фатим.
Сурэтыр: Iэшъынэ Аслъан.