Зым ипIалъэ ыухыгъ, нэмыкI атIупщыгъ
ЦIыфхэм ящыIакIэ нахьышIу шIыгъэным фытегъэпсыхьэгъэ лъэпкъ проектэу Урысыем ишъолъырхэм ащыпхыращыгъэхэм, 2024-рэ илъэсым зипIалъэ икIыгъэхэм ащыщ «ПсэупIэр ыкIи къэлэ щыIакIэр» зыфиIорэр. Ащ къыдыхэлъытагъэхэм ягъэцэкIэн пае аштэгъагъ федеральнэ проектэу «Псы къабзэр».
Адыгеир 2019-рэ илъэсым къыщыублагъэу ащ хэлажьэ. ПIалъэхэм адиштэу пшъэрылъхэр зыгъэцэкIэрэ шъолъыр пэрытхэм ащыщ. А уахътэм къыщебгъажьэу 2023-рэ илъэсым нэс пштэмэ, псым епхыгъэу псэолъэ 27-рэ республикэм имуниципальнэ образованиехэм ащашIыгъ е ащагъэцэкIэжьыгъ. Ахэм пстэумкIи сомэ миллион 765-рэ апэIухьагъ. 2024-рэ илъэсэу икIыгъэм псэолъи 6 ашIыгъ. IофшIэнхэм атефэгъэ сомэ миллиони 162-м щыщэу сомэ миллиони 143,3-р федеральнэ бюджетым къыхэхыгъэу шъолъырым къыфатIупщыгъ.
Лъэпкъ проектым ишIуагъэкIэ республикэм ипсэупIэу псымкIэ гумэкIыгъо зиIэгъэ 33-рэ къызэлъаубытыгъ. Ахэм псыр къызчIащыщтхэр кIэу ащатIыгъэх, кубометрэу арыфэрэмкIэ бэкIэ нахь инхэу башнехэр ащагъэуцугъэх, псыр зыгъэкъэбзэщт системэхэр ащагъэпсыгъэх, чIыпIэу къызэлъаубытыхэрэр зэрагъэфагъэх, къашIыхьагъэх, чэщрэ къэнэфынхэу ашIыгъэх, псым икIуапIэхэр зыщызэблахъугъэхэри ахэтых. Республикэм щыпсэоу артезианскэ псы къабзэ зыIэкIахьэрэр нэбгырэ мин 36-м ехъу.
АР-м псэолъэшIынымкIэ, транспортымкIэ, псэупIэ-коммунальнэ ыкIи гъогу хъызмэтымкIэ и Министерствэ къызэрэщаIуагъэмкIэ, «ПсэупIэр ыкIи къэлэ щыIакIэр» зыфиIорэ лъэпкъ проектым ипIалъэ ыухыгъ нахь мышIэми, цIыфхэм шапхъэхэм адиштэрэ псы къабзэ аIэкIэгъэхьэгъэным епхыгъэ IофшIэнхэр лъагъэкIотэщтых. Джы ахэр «ЩыIэныгъэм пае инфраструктурэр» зыфиIорэ лъэпкъ проектыкIэм ипхырыщын пае аштэгъэ федеральнэ проектэу «Коммунальнэ инфраструктурэм исистемэ игъэкIэжьын» зыфиIорэм къыдыхэлъытагъэх.
2030-рэ илъэсым нэс джыри мы лъэныкъом Iоф дашIэнэу пIалъэ яI. IофшIэнхэм ахъщэу апэIухьащтыр агъэнэфэгъах, федеральнэ, республикэ ыкIи чIыпIэ бюджетхэм ар къахэхыгъэщт. 2025-рэ илъэсымкIэ сомэ миллион 218,4-рэ агъэнэфагъ, 2026-м сомэ миллион 234,3-м ехъу, 2027-рэ илъэсым сомэ миллион 285,2-рэ апэIуагъэхьащт.
Мы илъэсым проектым къыдыхэлъытагъэу Шэуджэн районымкIэ Дукмасовскэ псэупIэ коим хэхьэрэ къутырхэу Ореховым, Тихоновым, Пантюховым ыкIи Чикаловым псыкъычIэщыпIэхэр ащагъэпсыщтых. Ащ пстэумкIи сомэ миллион 49-рэ тефэщт.
Джащ фэдэу Дондуковскэ псэупIэ коим псым икIуапIэхэр щашIыщтых, ахэм сомэ миллион 49,7-рэ апэIуагъэхьащт. Къалэу Мыекъуапэ ипсэуалъэхэм ащыщэу зэблахъущтхэм сомэ миллиони 119,7-рэ атефэщт.
Шъугу къэдгъэкIыжьын, лъэныкъо зэфэшъхьафхэмкIэ лъэпкъ проект 12-у апэ пхыращыгъэхэми, джы ахэм къахэхъуагъэхэу е зэблэзыхъугъэхэми УФ-м и Президентэу Владимир Путиныр кIэщакIо афэхъугъ.
ХЪУТ Нэфсэт.
Сурэтхэр: АМ ихъарзынэщ.