«БэгъашIэ ухъуным иIункIыбз: зыныбжь хэкIотагъэхэм ятворческэ амалхэр къызэIуягъэхыгъэныр» зыфиIорэ проектым иаужырэ чэзыу Адыгэ къэралыгъо университетым мы мафэхэм щыкIуагъ.

Мы апшъэрэ еджапIэм ипрограммэу «Приоритет 2030-м» истратегическэ проектэу «Адыгеир — псауныгъэм ичIыпI» зыфиIорэм къыдыхэлъытагъэу ар зэхащэ. Республикэ грантымкIэ гъэрекIо иIоныгъо мазэ къыщегъэжьагъэу проектыр щыIэныгъэм щыпхыращы.
— 2024-рэ илъэсым граждан обществэм хэхъоныгъэ егъэшIыгъэнымкIэ республикэ грантэу агъэ­нэфагъэр мы проектым къыдихыгъ. Ащ къыдыхэлъытагъэу Iофтхьэбзэ зэфэшъхьафхэр зэхэтщагъэх. Адыгеим ис зы­ныбжь хэкIотэгъэ нэбгырэ 80-м ехъу ахэм ахэлэ­жьагъ. Интеллектуальнэ ыкIи творческэ лъэны­къохэр къызэлъызыубытырэ Iофтхьэбзэ зэфэ­шъхьафэу редгъэкIокIы­гъэхэм ащыщ «Что? Где? Когда?» зыфиIорэр. Советскэ фильмхэр, орэдхэр зэрашIэхэрэмкIэ зэнэкъо­къугъэх. ЗэкIэмкIи Iоф­тхьэбзи 8 зэхэтщагъ. Анахь ашIогъэшIэгъоныгъэмэ ащыщ «Батл поколений» зыфиIорэр. Нахьыжъхэми, студентхэми сэнаущыгъэу ахэ­лъыр къагъэлъэгъуагъ. Джы аужырэ чэзыур кIощт, анахь дэгъоу зыкъэзыгъэлъагъохэрэм шIухьафтынхэр яттыщтых. Iофтхьабзэхэр анахь гъэшIэгъон зышIыхэрэр ыкIи имэхьанэ къэзыIэтырэр социальнэ лъэныкъомкIэ Iоф зышIэщт ныбжьыкIэхэр зэрэхэлажьэхэрэр ары, — къыIуагъ Адыгэ къэралыгъо университетым социальнэ IофшIэнымкIэ ыкIи зекIонымкIэ икафедрэ ипащэу Мария Паатовам.
Iофтхьабзэм хэлэжьагъэх МыекъуапэкIэ нахъыжъхэр зыхэт купхэу «Оптимисты», «Метеор» ыкIи «Товарищ» зыфиIохэрэр, Шэуджэн ыкIи Красногвардейскэ районхэм къарыкIыгъэхэу «Активисты» ыкIи «Удача» зыцIэхэр. Джащ фэдэу хэбзэ къулыкъухэм ялIыкIохэр, апшъэрэ еджапIэм икIэлэегъаджэхэр, студентхэр къырагъэблэгъагъэх.

Iофтхьабзэм къыдыхэлъыта­гъэу илъэсныкъом ашIэгъэ IофшIэныр видеотехыгъэмкIэ къагъэлъэ­гъуагъ. Нэужым нахь къахэщыгъэхэр агъэшIуагъэх, къагъэхьазырыгъэ орэдхэр, къашъохэр зыныбжь хэкIотагъэхэми, на­хьыжъхэми къагъэлъэгъуагъэх. Ахэм къакIэлъыкIоу аужырэ зэ­нэкъокъур афызэхащагъ, лъэныкъо зэфэшъхьафхэмкIэ шIэны­гъэу ыкIи сэнаущыгъэу ахэлъыр къагъэлъэгъуагъ.
МыекъуапэкIэ купэу «Метеор» зыфиIорэм хэтхэм аныбжь илъэс 63-м къыщегъэжьагъэу 88-м нэсы. Ахэм къызэрэтаIуагъэмкIэ, мы проектым ягуапэу хэлэжьагъэх, якIэлэгъу агу къагъэкIыжьыгъ, шIэныгъакIэхэр зэрагъэгъотыгъэх, ялэгъухэм нэIуасэ афэхъугъэх. Мыщ фэдэ Iофтхьабзэхэм на­хьыжъхэмкIэ мэхьанэшхо зэряIэр, бэгъашIэ зэришIыхэрэр къаIуагъ.
Шъугу къэдгъэкIыжьын проектыр шъолъырым щыпсэурэ на­хьыжъхэу илъэс 60-м къехъухэрэм япсауныгъэ псыхьэгъэным фэшI зэрэзэхащагъэр. Iофтхьабзэхэм язэхэщэн Адыгэ къэралыгъо университетым социальнэ IофшIэнымкIэ ыкIи зекIонымкIэ икафед­рэ икIэлэегъаджэхэм ямызакъоу, студент-волонтерхэр чанэу хэлэжьагъэх. Республикэм исоциальнэ сферэ ныбжьыкIэхэр пыщагъэ хъунымкIэ ащ ишIуагъэ къэкIощт.
ДЕЛЭКЪО Анет.

Сурэтхэр: Iэшъынэ Аслъан.