ХэушъхьафыкIыгъэ дзэ операцием хэлажьэхэрэм ыкIи ахэм яунагъохэм арысхэм IэпыIэгъу яты­гъэныр АР-м иминистрэхэм я Кабинет изэIукIэу щыIагъэм зыщатегущыIэгъэхэ Iофыгъо шъхьаIэхэм зыкIэ ащыщыгъ. Адыгеим и ЛIы­шъхьэу КъумпIыл Мурат ар зэрищагъ.

Республикэм и ЛIышъхьэ зэIукIэм хэлажьэхэрэм агу къыгъэкIыжьыгъ хэушъхьафыкIыгъэ дзэ операцием ишъо­лъыр щызэорэ дзэкъулыкъушIэхэм ыкIи ахэм яунагъохэм IэпыIэгъу ятыгъэныр анахь лъэныкъо шъхьаIэхэм зэращыщыр.
«Урысыем и Президентэу Владимир Путиным къыгъэуцугъэ пшъэрылъхэм анахь шъхьаIэу ар щыт ыкIи зи Хэгъэгу къэзыу­хъумэрэ, мамырныгъэм фэбэ­нэрэ, тихэгъэгу щыпсэухэрэм щыIэкIэшIу яIэным фэгумэкIырэ дзэкIолI пэпчъ IэпыIэгъу еттыныр типшъэрылъ. Дзэ­кIолIхэм ашIэн фае зэрафэгумэкIыхэрэр, ахэм ягупсэхэм IэпыIэгъу зэрафэхъухэрэр, сыд фэдэ Iофыгъо егъэгумэкIыхэми, язакъоу, IэпыIэгъу тэрэз арамытэу ахэр къызэрамыгъэнэщтхэр. Хэу­шъхьафыкIыгъэ дзэ операциер заублагъэм щегъэжьагъэу ащ хэлажьэхэрэм федеральнэ IэпыIэгъоу аратырэм, ахэм яуна­гъохэм яшIуагъэу арагъэкIырэм нэмыкIэу шъолъыр фэгъэкIотэны­гъэхэри, ахъщэ тынхэри щыIэх. Ащ фэдэ IэпыIэгъум ренэу нахь зызэредгъэушъомбгъу­щтым ыуж тит. Адыгеим щыпсэу­хэрэр зыхэт подразделениехэм, республикэм ит дзэ частьхэм тишIуагъэ ятэгъэкIы», — къы­Iуагъ АР-м и ЛIышъхьэ.
2024-рэ илъэсым Iофэу агъэцэкIагъэм фэгъэхьыгъэу къэгущыIагъ АР-м IофшIэнымрэ социальнэ хэхъоныгъэмрэкIэ иминистрэу Мырзэ Джанбэч. Ащ къызэриIуагъэмкIэ, хэушъхьафыкIыгъэ дзэ операцием хэлажьэхэрэр ыкIи ахэм яунагъохэр социальнэу ухъумэгъэнхэмкIэ Iофтхьабзэу зэшIуахыхэрэм къадыхэ­лъытагъэу а шъолъырым кIорэ цIыфхэм республикэ ыкIи муниципальнэ зэтыгъо ахъщэ (сомэ миллионрэ мин 600-рэ) араты; уIагъэ хъугъэхэм зэтыгъо ахъщэ (сомэ мин 500 фэдиз) аIэкIагъахьэ; хэкIодагъэхэм яунагъохэм сомэ миллион зэтыгъоу араты.
Ащ нэмыкIэу хэушъхьафыкIыгъэ дзэ операцием хэлажьэхэрэм ыкIи ахэм яунагъохэм арысхэм социальнэ газификациекIэ заджэхэрэ программэм къыдыхэлъытагъэу яунэхэм гъэстыныпхъэ шхъуантIэр аращэнымкIэ яшIуагъэ арагъэкIы. Дзэ операцием хэлажьэхэрэм якIэлэцIыкIухэу Адыгэ Республикэм исхэм зэтыгъо сомэ мин 20 аIэкIагъахьэ.
Мы Iофтхьабзэхэр зэшIуахыхэу зырагъэжьэгъэ лъэхъаным къыщыублагъэу (2022-рэ илъэсым къыщегъэжьагъэу непэ нэс) сомэ миллиарди 2,3-м ехъу ахэм апэIуагъэхьагъ.
ХэушъхьафыкIыгъэ дзэ операцием хэлажьэхэрэм якIэлэцIыкIухэм чэзыум емыжэхэу загъэпсэфынымкIэ ыкIи япсауныгъэ агъэпытэнымкIэ фэIо-фашIэхэр къафагъэцэкIэнхэу фитыныгъэ яI. Адыгэ Республикэм псауныгъэм икъэухъу­мэнкIэ и Министерствэ къыфэIорышIэрэ организациехэм чэзыум емыжэхэу са­на­ториехэм къащяIэзэнхэмкIэ тхы­лъэу агъэхьазырыгъэхэм атетэу япсауныгъэ нахь агъэпытэ.

Республикэм имуниципальнэ образование пстэуми гъэсэныгъэм епхыгъэ организациеу яIэхэм дзэ операцием хэлажьэхэрэм якIэлэцIыкIухэу а 1 — 11-рэ классхэм арысхэр ыпкIэ хэмы­лъэу гъогогъуитIо агъашхэх, еджэгъу ужым етIани еджапIэм къычIэнэжьынхэшъ, анаIэ атетэу чIэсынхэм ифитыныгъи яI.
ХэушъхьафыкIыгъэ дзэ операцием хэлажьэхэрэм якIэлэцIыкIухэр ыпкIэ хэмылъэу IыгъыпIэхэм ащаIыгъых, кружок ыкIи секцие зэфэшъхьафхэм яIоф­шIэн хэлажьэх.
Студентхэу очнэу еджэхэрэм, гурыт сэнэхьат гъэсэныгъэ зэзыгъэгъотыхэрэм мафэм зэ ыпкIэ хэмылъэу шхын стыр къараты.
Ащ нэфэшъхьафэу кIэлэцIыкIу 3340-рэ фэдизмэ илъэсыкIэ шIушIэ Iофтхьабзэхэм ахэлэжьагъ ыкIи IэшIу-IушIухэр аратыгъэх.
Нэужым къэгущыIагъ къэралыгъо фондэу «Хэгъэгум иухъумакIохэр» зыфиIорэм ишъолъыр къутамэ ипащэу ПIатIыкъо Аслъан. Ащ къызэриIуагъэмкIэ, 2024-рэ илъэсым нэбгырэ 1417-мэ фондым зыкъыфагъэзагъ, зыгъэгумэкIыхэрэ Iофыгъо 4750-м ехъу къыIэ­кIэхьагъ. Ахэм ащыщэу процент 90-р зэшIохыгъэ хъугъэ, адрэхэм адэлажьэх.
Iофыгъоу зыгъэгумэкIыхэрэр лъэныкъо зэфэшъхьафхэм япхыгъэх: документхэр афагъэпсынхэр, хэушъхьафыкIыгъэ дзэ операцием хэлажьэхэрэм ахъщэу аратыщтыр, уIэшыгъэ зэIуупIэныгъэхэм яветеранэу зэрэщытыр къэзыушыхьатырэ тхылъыр, хэкIодагъэм е сэкъат хэхъухьагъэм иунагъо зэрисыр къэзыгъэнэфэрэ тхылъыр аIэкIэгъэхьэгъэныр, протезхэр афэшIыгъэнхэмкIэ яшIуагъэ арагъэкIыныр, щыIэкIэ-псэукIэм епхыгъэ Iофыгъо зэфэшъхьафхэр зэшIохыгъэнхэр. Социальнэ IофышIэхэу къутамэм щылажьэхэрэм ахэр зэкIэ къыдалъытэхэзэ, Iофыгъоу къаIэтыгъэхэм анаIэ атетэу адэлажьэх.
А пстэуми адакIоу фондым икъутамэ лъэныкъо зэфэшъхьафхэм ынаIэ атырегъэты: социальнэу щыIэныгъэм хэгъо­зэжьынхэм, яшIэныгъэхэм, яIэпэIэсэныгъэ ахэгъэхъогъэным, IофшIапIэ къагъо­тынымкIэ IэпыIэгъу къафэхъунхэм ыкIи нэмыкI лъэныкъохэм.

АР-м и ЛIышъхьэ
ипресс-къулыкъу къытырэ къэбархэмкIэ Тхьаркъохъо Сафыет.