Адыгэ республикэ клиническэ сымэджэщым ревматологиемкIэ отделениякIэ тыгъуасэ къыщызэIуахыгъ. ТишъолъыркIэ кIышъо ыкIи къупшъхьэ зэрытыпIэ узхэр зиIэ сымаджэхэм зыщяIэзэщтхэ апэрэ отделениеу мыр хъугъэ.

Ащ фэгъэхьыгъэ Iофтхьабзэм хэлэжьагъэх Хь. Шъэумэным ыцIэкIэ щыт ШIушIэ фондым итхьаматэу Шъэумэн Асиет, АР-м иминистрэхэм я Кабинет и Тхьаматэ игуадзэу — АР-м финансхэмкIэ иминистрэу Виктор Орловыр, псауныгъэр къэухъу­мэгъэнымкIэ министрэу Мэрэтыкъо Рустем, респуб­ликэ сымэджэщым иврач ишъхьаIэу Чэужъ Нателлэ.
— РевматологиемкIэ отделение республикэм иIэ хъуным иамал къэзытыгъэр АР-м и ЛIышъхьэу Къум­пIыл Муратрэ ыкIи Шъэумэн Хьазрэт и ШIушIэ фондрэ. Ащ игъэпсын пае шъо­лъыр бюджетым сомэ миллиони 4, фондым – миллион 11 къатIупщыгъ, — къыIуагъ финансхэмкIэ министрэу Виктор Орловым.
АР-м псауныгъэр къэухъумэгъэнымкIэ иминистрэу Мэрэтыкъо Рустем къызэриIуагъэмкIэ, 2025-рэ илъэсым, щылэ мазэм и 1-м ехъулIэу кIышъо ыкIи къупшъхьэ зэрытыпIэ узхэр зиIэ нэбгырэ 1500-рэ Адыгеим щатхыгъ. Ахэм ащыщэу сымэджэ 220-мэ генно-инженернэ Iэзэгъу уцхэр ара­тых.
— РевматологиемкIэ отделениер тищыкIэгъэ дэдэу щытыгъ. Сыда пIомэ а узхэр зиIэ сымаджэхэм япчъагъэ илъэс къэс хахъо, анахьэу ар зыщызэхэтшIагъэр коронавирусым ыуж. 2023-рэ илъэсым ащ фэдэ сымэджэ нэбгыри 126-мэ Iэ­зэгъу уцхэр аIэкIэдгъэхьагъ. Федеральнэ ыкIи шъолъыр бюджетхэм къарыкIыгъэ сомэ миллион 54,5-рэ ащ пэIухьагъ. 2024-рэ илъэсым нэбгырэ 220-мэ аратыгъэ Iэзэгъу уцхэм сомэ миллион 69,7-рэ атефагъ. 2025-рэ илъэсым кIышъо ыкIи къупшъхьэ зэрытыпIэ узхэр зиIэ сымаджэхэм ящыкIэгъэ Iэзэгъу уцхэр аратынхэм сомэ миллион 85-рэ пэIудгъэхьанэу итхъухьагъ, — къыхигъэщыгъ Мэрэтыкъо Рустем.
ОтделениякIэу къызэIуахыгъэм ипащэу Пэрэныкъо Асе къызэриIуагъэмкIэ, мыщ ыпэкIэ гум зыщеIэзэхэрэ отделением кIышъо ыкIи къупшъхьэ зэрытыпIэ узхэр зиIэ сымаджэхэм апае пIэкIори 10 къыхагъэкIы­гъагъ.
— Мы уахътэм ревматологие узхэм чIыпIэ гъэ­нэ­фагъэ аубытыгъ. Ахэм апкъ къикIыкIэ цIыфым ипсауныгъэ, изекIуакIэ лъэшэу зэщэкъох, сэкъатныгъэ яIэ мэхъу. Ащ пае Дунэе программэ аштагъэу шэпхъэшIухэм адиштэрэ IэзакIэхэм адэлажьэх. Ащ чанэу Урысыери зэрэхэлажьэрэм ишIуагъэкIэ, генно-инженернэ Iэзэгъу уцхэр къытIэкIэхьагъэх, тызэряIэзэщтыр икъоу тIэкIэлъ. Анахь шъхьаIэр — кIышъо ыкIи къупшъхьэ зэрытыпIэ узхэр зиIэ сымаджэхэр джы бэрэ чэзыум емыжэхэу сымэджэщым тыщяIэзэн амал щыIэ хъугъэ, — хигъэунэфыкIыгъ А. Пэ­рэныкъом.
Мы отделением чэщи мафи зыщяIэзэнхэ алъэ­кIыщт пIэкIор 20, мэфэ стационар пIэкIори 3 чIэтых. Процедурнэ кабинет хэт, врачи 2-мэ, гурыт медицинэ IофышIи 5-мэ Iоф щашIэщт.
РевматологиемкIэ отделениер зэрэзэтырагъэ­псыхьагъэм осэшIу къыфишIыгъ Шъэумэн Асиет.
— Шъэумэн Хьазрэт ыцIэкIэ щыт ШIушIэ фондыр сыдигъокIи псауныгъэм икъэухъумэн ынаIэ тырегъэ­ты. Мыщ фэдэ отделение сымаджэхэм ящыкIагъэу зыкъызытфагъазэм, тиIэпыIэгъу ядгъэкIыгъ. Къабзэу, гоIоу, сымаджэхэм атегъэпсыхьагъэу, Iэрыфэгъоу отделениер агъэпсыгъ, — къыIуагъ Шъэумэн Асиет.
Сымаджэу чIэлъхэм ащыщэу Сергей Трубниковым гущыIэгъу тыфэхъугъ.
— Узэу сиIэм елъытыгъэу 2022-рэ илъэсым къы­щегъэжьагъэу Пэрэныкъо Асе Бамбэт ыпхъур къы­сэIазэ. Ау сымэджэщым сычIэгъолъхьанэу хъущтыгъэп, чIыпIэр зытефэщтыгъэхэр нахь хьылъэ дэдэхэр ары. Джы отделение щыIэ зэхъум, а амалыр згъотыгъэ, тхьамафэ хъугъэу игъэкIотыгъэу къыщысэIазэх, ишIуагъэ къысэкIыгъ, — еIо Сергей.
Iэшъынэ Сусан.
Сурэтыр: Iэшъынэ Аслъан.