ЧIыпIэ 25-рэ агъэцэкIэжьыщт
Адыгеим лъэпкъ проектыкIэм къыдыхэлъытагъэу шъолъыр мэхьанэ зиIэ гъогу Iахь 25-рэ 2025-рэ илъэсэу къихьагъэм щагъэцэкIэжьыщт.
УФ-м и Президентэу Владимир Путиныр кIэщакIо зыфэхъугъэ лъэпкъ проектыкIэхэм ащыщэу «ЩыIэныгъэм пае инфраструктурэр» зыфиIорэм къыдыхэлъытагъэу автомобиль гъогухэм ягъэцэкIэжьын республикэм щылъагъэкIотэщт. Ар «Щынэгъончъэ ыкIи шэпхъэшIухэм адиштэрэ гъогухэр» зыфиIорэ лъэпкъ проектым ычIыпIэкIэ атIупщыгъ.
Шъугу къэдгъэкIыжьын, ащ къыдыхэлъытагъэу 2024-рэ илъэсым шъолъыр мэхьанэ зиIэ гъогу Iахь 18, ар километрэ 48,8-рэ мэхъу, федеральнэ шапхъэхэм адиштэу агъэкIэжьыгъ. Кощхьэблэ районымкIэ псыхъоу Фэдз телъ лъэмыджыр икIэрыкIэу ашIыжьыгъ, къалэу Мыекъуапэ ыкIи поселкэу Яблоновскэм яурамхэм ягъогу Iахь плIырыплI агъэцэкIэжьыгъ.
«Адыгеяавтодорым» къихьэгъэ илъэсымкIэ гухэлъэу яIэхэм къатегущыIэхэзэ, лъэпкъ проектым игъэцэкIэнкIэ къэгъэлъэгъонэу Адыгеир зынэсыгъэхэм арагъэхъун гухэлъ зэряIэр къыхагъэщыгъ. Мыгъэ шъолъыр мэхьанэ зиIэ гъогу Iахь 25-рэу агъэкIэжьыщтыр зэкIэмкIи километрэ 70-рэ мэхъу. Гъогу IофшIэнхэм уафежьэн плъэкIынэу зыхъукIэ, гъэцэкIэжьынхэр рагъэжьэщтых, Iоныгъом и 1-м нэс пIалъэу яIэр.
Лъэпкъ проектэу «ЩыIэныгъэм пае инфраструктурэр» зыфиIорэм ишIуагъэкIэ гъогухэр шэпхъэшIухэм адиштэхэу, щынэгъончъэ зэрэхъущтхэм имызакъоу, республикэм исхэм ящыIакIи нахьышIу ашIыщт.