Адыгабзэм шъурыIазэмэ
АдыгабзэкIэ усэ анахь дэгъоу къеджэрэм икъыхэхын тегъэпсыхьэгъэ шъолъыр зэнэкъокъу Адыгеим щаублагъ.
«Сыбзэ сидунай» зыфиIорэ зэнэкъокъур фондэу «Гухэлъым», республикэ кIэлэцIыкIу тхылъеджапIэм, АР-м культурэмкIэ и Министерствэ зэхащэ, усэм е прозэм анахь дэгъоу къеджэрэ кIэлэцIыкIухэр къыхахыщтых.
Зэнэкъокъур лъэныкъуитфыкIэ рагъэкIокIы:
— зыныбжь илъэси 3-м къыщыублагъэу 5-м нэсыхэрэр;
— зыныбжь илъэси 6-м къыщыублагъэу 10-м нэсыхэрэр;
— зыныбжь илъэс 11-м къыщыублагъэу 14-м нэсыхэрэр;
— адыгабзэр зимыныдэлъфыбзэхэм апае;
— «Видеосюжет» — узыгъэгъозэрэ е сэмэркъэу зыхэлъ видеотехыгъэхэр.
Зэнэкъокъум хэлажьэ зышIоигъохэм къихьащт мазэм и 20-м нэс видеотехыгъэхэр агъэхьынхэ алъэкIыщт мыщ фэдэ электрон адресым: konkurssybze0I@yandex.ru. Ащ адыгабзэкIэ къыщиIотэн фае хэлажьэрэм ежь фэгъэхьыгъэ къэбарыр: зыщы-щыр, зыщыпсэурэ чIыпIэр, ыгу зыфэщагъэу зыпылъыр, къызэджэщт усэр е рассказыр зытхыгъэм ыцIэ къыриIон, ащ къеджэн фае.
Лъэныкъоу «ВидеосюжетымкIэ» хэлажьэхэрэм (зы видеотехыгъэм хэлэжьэн ылъэкIыщт пчъагъэмкIэ гъунапкъэ щыIэп) адыгабзэкIэ узыгъэгъозэрэ е сэмэркъэу зыхэлъ сюжетхэр мыщ фэдэ лъэныкъохэмкIэ къагъэлъэгъошъущтых: адыгэ хабзэр, гущыIэжъхэр, щыIэныгъэм къыхэхыгъэ къэбар щхэнхэр, адыгэ тхакIохэм япроизведениехэм къахэхыгъэ пычыгъохэр. Видеотехыгъэр такъикъи 3-м нахьыбэнэу щытэп. Ащ хэлажьэхэрэм кадрэм итхэу къаIорэр езбырэу зэрагъэшIагъэу щытын фае, кадрэ кIыбым зи къыщаIо хъущтэп, кадрэхэр зэпагъэуцохи хъущтэп.
ТекIоныгъэ къыдэзыхыгъэхэр гъэтхапэм и 14-м, адыгабзэмрэ адыгэ тхыбзэмрэ я Мафэ, АР-м и Театральнэ хэхахьэ щагъэшIощтых. Илъэси 3-м къыщыублагъэу 14-м нэс зыныбжьыхэр ащ хэлэжьэнхэу рагъэблагъэх.