Краснодар псыIыгъыпIэм епхыгъэ Iофхэм афэгъэхьыгъэ зэхэсыгъо гъунэгъу краеу ар зэпхыгъэм щызэхащэгъагъ.

Ащ хэлэжьагъэх АР-м и Къэралыгъо Совет – Хасэм и Тхьаматэу Владимир Нарожнэр, ащ игуадзэу Цэй Эдуард, зекIонымкIэ, экологиемкIэ ыкIи чIыопсым игъэфедэнкIэ Парламентым и Комитет ипащэу Евгений Саловыр, АР-м мэкъу-мэщымкIэ иминистрэу Къуанэ Анзаур, АР-м тыкъэзыуцухьэрэ дунаим икъэухъумэнкIэ ыкIи чIыопсым икъэкIуапIэхэмкIэ АР-м и ГъэIорышIапIэ ипащэу Сергей Колесниковыр.
Джащ фэдэу зэхэсыгъом Краснодар краим и Хэбзэихъухьэ ЗэIукIэ, министерствэ ыкIи къулыкъу зэфэшъхьафхэм ялIыкIохэр, «Центррегионводхоз» зыфиIорэм икъутамэу Краснодарскэ псыIыгъыпIэм ипащэхэр хэлэжьагъэх.
ПсыIыгъыпIэм гумэкIыгъоу Адыгеим ипсэупIэхэм ащыщхэм къафихьыхэрэм ядэгъэзыжьын, щынэгъончъэу ар гъэфедэгъэным, мызэу, мытIоу Адыгеим ихэбзэихъухьэхэр тегущыIагъэх. ИкIыгъэ 2024-рэ илъэ­сымкIэ аужырэ зэхэсыгъоу Къэралыгъо Советым – Хасэм иIагъэми псыIыгъыпIэм ипащэхэр къырагъэблагъэхи, непэ ащ епхыгъэ Iофыгъоу щыIэхэм, ахэр дэгъэзыжьыгъэ зэрэхъущтхэм, Адыгеимрэ Краснодар краимрэ япсэупIэхэм ошIэ-дэмышIэ Iоф къафимыхьыным, псыхъохэм псыр къадэкIыным фэмыIорышIэным афэшI зэшIохыгъэ хъугъэхэм, шIэгъэн фаехэм зэдатегущыIэгъагъэх. Джащыгъум Iофыгъохэм ядэгъэзыжьын ыуж итынэу шъолъыритIум япарламентариехэр, мы лъэныкъом фэгъэзэгъэ къулыкъухэм ялIыкIохэр зыхэ­хьэрэ IофшIэкIо куп зэхэщэгъэн фаеу зэдаштэгъагъ. Джыри ахэм къафагъэзэжьыгъ. Мы зэIукIэгъум Адыгеим ипарламентариехэр ары кIэщакIо фэхъугъэхэр.
Iофтхьабзэм хэлажьэхэрэм IыгъыпIэм псэу итым къызэрэщыкIагъэм, ащ ычIэ ятIэр бэу зэрэщызэтырихьагъэм, псыуц шIойхэр бэу къызэрэхэкIагъэхэм, псыхъохэм якIуапIэхэр зэлъызыкIугъэ шIоири ащ къы­хэмыхъожьыным пае гъэкъэбзэгъэнхэ фаеу зэрэщытым ягугъу ашIыгъ.
Псыхъоу Пшызэ зэрагъэкъэбзагъэм ишIуагъэ къызэрэкIуагъэр ипащэхэм къаIуагъ. Ащ ишIуагъэкIэ бгъэфедэн плъэкIыщт псэу итыр кубометрэ 2264,4-кIэ нахьыбэ хъугъэ, ятIэу ычIэ щызэхихьэрэм къыщыкIагъ.
Псыхъоу къыхэлъадэхэрэм хэкIэу, пхъэ пыдзафэу псыIыгъыпIэм къырахьэрэр нахь макIэ хъуным фэшI, гъэ къэс гектари 187-м къыщымыкIэу агъэкъабзэзэ, 2030-рэ илъэсым нэс зэкIэри Iуахынэу пшъэрылъ зыфагъэуцужьыгъ.
IыгъыпIэм ипащэхэм къызэраIуагъэмкIэ, псыр зэрытым изытет ауплъэкIуи, нахьыбэу псыуц шIойхэр къыз­хэкIэгъэ чIыпIэхэр агъэунэфыгъэх. Ар IыгъыпIэм иIахьэу Адыгеим и Красногвардейскэ район иселоу Красногвардейскэм дэжь рекIокIырэр ары. 2030-рэ илъэсым нэс ари агъэкъэбзэн гухэлъ яI. Ащ ишIуагъэкIэ псым къы­зэлъиубытырэм щыщэу гектар 797,1-р зэтырагъэуцожьыщт, нэбгырэ мини 10 фэдиз зыдэс псэупIитIум экологием ылъэныкъокIэ яIофхэр нахьышIу хъущтых.
Тидепутатхэм зэхэсыгъом икIэух къызэфахьысыжьзэ, шъолъыритIум ясоциальнэ-экономическэ хэхъоныгъэхэм алъэныкъокIэ укъеплъыгъэми, экологическэ щынэгъончъагъэр, ошIэ-дэмышIэ Iоф псэупIэхэм къызэрафимыхьыщтыр къыдэплъытагъэми, псыIыгъыпIэр щынэгъончъэу гъэфедэгъэным мэхьанэшхо зэриIэр къыхагъэщыгъ.
— Краснодарскэ псыIыгъыпIэр стратегическэ псэуалъ, АдыгеимкIи Пшызэ шъолъырымкIи социальнэ мэхьанэ иIэу щыт. Арышъ, краимкIэ тиIофшIэгъухэр тигъусэхэу етхьыжьагъэр тапэкIи лъыдгъэкIотэщт. КIэщакIо тызфэхъухэрэмкIэ федеральнэ гупчэм зыфэдгъэзэнэуи хъун ылъэ­кIыщт, — къыкIигъэтхъыгъ Владимир Нарожнэм.
Сурэтыр: АР-м и Парламент.