«Щынэгъончъэ ыкIи шэпхъэшIухэм адиштэрэ гъогухэр» зыфиIорэ лъэпкъ проектым къыдыхэлъытагъэу Адыгеим щызэшIуахыщтхэр загъэ­нафэхэкIэ, гъогум изытет зауплъэкIум (инструментальнэ диагностикэр) къыгъэлъэгъуагъэм имызакъоу, цIыфхэм яшIоигъоныгъэхэри къы­далъытэщтыгъэх.

Автомобиль гъогухэм я Гъэ­IорышIапIэу «Адыгеяавтодорым» къызэрэщаIуагъэмкIэ, 2024-рэ илъэсымкIэ планыр зызэхагъэу­цом, республикэм исэу за­къы­фэзгъэзагъэхэм къаIэтыгъэ Iофыгъохэми ахэплъагъэх. Ахэм къапкъырыкIхэзэ, Тэхъутэмы­къое районымкIэ къуаджэу Тэ­хъу­тэмыкъуае икIэу поселкэу Отраднэм кIорэ гъогум иIахь километри 2,1-рэ хъоу агъэкIэ­жьыгъ.
Ащ Iоф дэзышIэгъэ подрядчикым жъы хъугъэ асфальт зэ­хэлъыр шэпхъэшIухэм ади­штэрэ шIыкIэхэр ыгъэфедэзэ зэблихъугъ, гъогу гъунэхэр зэ­ригъэфагъэх, зыщищыкIагъэм тамыгъэхэр щигъэтхъыгъэх. Iоф­шIэнхэм пстэумкIи сомэ миллион 45-рэ апэIухьагъ. ПIа­лъэхэм адиштэу, шапхъэхэр амыукъохэу зэпстэури зэшIохыгъэ зэрэхъугъэр къыкIэлъэIугъа­гъэхэм ярэзэныгъэу къыраIотыкIыхэрэм къаушыхьаты.
2025-рэ илъэсми цIыфхэм ялъэIукIэ Джэджэ районым ит поселкэу Новэм екIурэ гъогур агъэцэкIэжьыщтэу ары «Адыгея­автодорым» къызэрэщаIуагъэр. ПстэумкIи километри 5,7-рэ ар мэхъу.
Шъугу къэдгъэкIыжьын, къи­хьэгъэ илъэсыкIэм «ЩыIэны­гъэм пае инфраструктурэр» зыфиIорэ лъэпкъ проектыр къэралыгъом щатIупщыгъэу, Адыгеим щыпхыращыщт. Ащ къыдыхэлъытагъэу шъолъыр мэхьанэ зиIэ гъогу Iахь 25-рэ республикэм щагъэ­кIэжьыщт. Ар зэкIэмкIи километрэ 70,1-рэ мэхъу.