АР-м IофшIэнымкIэ ыкIи социальнэ хэхъоныгъэмкIэ и Ми­нистерсвтэ къызэритыгъэмкIэ, кIэлэцIыкIу цыхьэшIэгъу теле­фоным иIофшIэн фэгъэхьыгъэ къэбарым изэлъягъэшIэн итхьамафэ 2025-рэ илъэсым щылэ мазэм и 20-м къыще­гъэжьагъэу и 26-м нэс кIощт.

КIэлэцIыкIухэм, Iэтахъохэм ыкIи ахэм янэ-ятэхэм IэпыIэгъу ягъэгъотыгъэнымкIэ мыщ мэхьанэшхо иI.
ЦыхьэшIэгъу телефоным чэщи мафи ыкIи ыпкIэ хэмылъэу зэрэ къэралыгъоу Iоф щешIэ: 8-800-2000-122 ыкIи номер кIэкIэу 124-рэ.
Сыд щыща кIэлэцIыкIу цыхьэшIэгъу телефоныр?
IэпэIэсэныгъэ зыIэкIэлъ психологхэу мы къулыкъум Iутхэр нэбгырэ пэпчъ IэпыIэгъу афэхъунхэм фэхьазырых. Гу­мэкIыгъоу шъуиIэхэмкIэ шъуадэгощэн, ащкIэ ушъыйхэр щыжъугъотынхэ амал щыI ыкIи зыгорэ гущыIэгъу шъушIынэу, къышъодэIунэу, къышъукъоуцонэу шъуфаемэ зафэжъугъаз.
Сыда мэхьанэу иIэр мы телефоныр пшIэным?
ЩыIэныгъэм чIыпIэ зэжъоу узэригъэу­цохэрэр, зэIуупIэныгъэхэр ыкIи гум дэхъыкIырэр зэхэшIэгъэнхэмкIэ, зэшIохыгъэнхэмкIэ мы къулыкъур IэпыIэгъу къы­шъуфэхъущт. УигукIаехэр уизакъоу зэпыпчынхэу щытэп.
Сыдэущтэу ащ Iоф ышIэра?
Шъэфэу: шъуцIэ е нэмыкI шъуикъэбархэр яшъуIонхэ ищыкIагъэп.
Гъэбылъыгъ: шъуизэдэгущыIэгъу специалистымрэ оррэ шъуазыфагу къенэжьы.
IэпэIэсэныгъэ хэлъэу: зисэнэхьат хэшIыкI фызиIэ психологхэм шъуи­гумэкIыгъо хэкIыпIэ къыфагъотыщт.
Хэта зытегъэпсыхьагъэр ­кIэлэцIыкIу цыхьэшIэгъу ­телефоныр?
КIэлэцIыкIухэм, Iэтахъохэм ыкIи ахэм янэ-ятэхэм. Гузэжъогъу чIыпIэ ифагъэ­хэм, IэпыIэгъу зищыкIагъэхэм джэуапхэр агъотыщт.
ШъуинэIуасэхэм, шъуиныбджэгъухэм, шъуиIофшIэгъухэм мы телефоныр зэрэщыIэр къафэшъуIуат. ЗэкIэми тызэгъусэу тызэдеIэжьымэ, тызэгурыIоу тыщыIэщт!
Iэшъынэ Сусан.