ЗекIонымрэ Адыгеимрэ
Нэбгырэ мини 120-рэ. ИлъэсыкIэ мэфэкIхэм къадыхэлъытэгъэ зыгъэпсэфыгъо мафэхэм Адыгеим зыщызыгъэпсэфыгъэмэ ябагъэ республикэмкIэ пчъэгъэ инхэм анэсыгъ.
БлэкIыгъэ илъэсым егъэпшагъэмэ, мыгъэрэ къэгъэлъэгъонхэр нэбгырэ мин 20-кIэ нахьыб. АР-м и ЛIышъхьэу КъумпIыл Мурат къызэриIуагъэмкIэ, ар зихьатырхэм ащыщ «ЗекIоныр ыкIи хьакIэ пэгъокIыныр» зыфиIорэ лъэпкъ проектэу шъолъырым щагъэцакIэрэр.
— Ащ къыдыхэлъытэгъэ ахъщэр зекIонымкIэ инфраструктурэм изэтегъэпсыхьан пэIутэгъахьэ. ТиIофшIэнкIэ анахьэу тынаIэ зытедгъэтырэр, республикэм илъэс реным зекIохэр къекIолIэнхэр ары. Ащ изэфэхьысыжьи къэлъэгъогъах: зыщыфабэми, зыщычъыIэми Адыгеим къихьэрэ хьакIэхэм япчъагъэ бэдэдэ хъугъэ, — къыIуагъ ЛIышъхьэм.
АР-м зекIонымрэ зыгъэпсэфыпIэ чIыпIэхэмрэкIэ и Комитет къызэритырэмкIэ, лъэпкъ проектым къыдыхэлъытэгъэ ахъщэм иIахь шъолъырым щагъэпсырэ зыгъэпсэфыпIэу «Лэгъонакъэм» иинфраструктурэ игъэпсын пэIуагъэхьагъ. Джащ фэдэу модульнэ хьакIэщи 177-рэ къушъхьэлъэ Адыгеим щагъэуцугъ. Ащ фэшъхьафэу республикэм икъэлэ шъхьаIэ игупчэ зекIоным епхыгъэу изэтегъэпсыхьан щыдэлэжьагъэх. Лъэпкъ паркэу «ДжэгокIо гъэхъунэм» ишIынкIи IофшIэнышхо зэшIохыгъэ хъугъэ. Ащ екIолIэрэ гъогукIэу ашIыгъэр зекIохэм непи агъэфедэ. ЧIыпIэм изэтегъэпсыхьан мыгъи лъагъэкIотэщт. ЗекIоным зегъэушъомбгъугъэнымкIэ ащи гугъэпIэшIухэр республикэм репхых. Мыщ фэдэ хэхъоныгъэшIухэр шIыгъэнхэ фаеу уахътэм къегъэнафэ, сыда пIомэ зекIохэм япчъагъэ гъэ къэс хэхъо. АР-м зекIонымрэ зыгъэпсэфыпIэ чIыпIэхэмрэкIэ и Комитет тызэрэщигъэгъозагъэмкIэ, 2024-м къыкIоцI зекIо мин 550-рэ Адыгеим къеблэгъагъ. Пчъагъэм процент 20 фэдизкIэ хэхъуагъ. Ушэтынхэм къызэрагъэлъэгъуагъэмкIэ, хьакIэхэм япчъэгъэшIу къэзыгъэпсырэр гурыт гъот зиIэ зекIохэр ары.
— КъыздикIыхэрэм ащ фэдизэу зиушъомбгъугъэп. ЗекIохэм янахьыбэр Адыгеим пэгъунэгъу шъолъырхэм ащыщых. Мыбэми, къэралыгъом игупчи къекIых, тпэIудзыгъэ шъолъырхэм ащыщхэри къытфэкIох, — къыддэгощагъ къэбарымкIэ АР-м зекIонымрэ зыгъэпсэфыпIэ чIыпIэхэмрэкIэ и Комитет итхьаматэ игуадзэу Джарымэ Бэлэ.
ЗыгъэпсэфыпIэ амалэу республикэм иIэр зекIохэм агу рехьы. Апэрэ сатырхэм ахэтых хъугъэ-шIэгъэ зэфэшъхьафхэм япхыгъэ зекIоныр, шхыныгъохэр къызэбэкIхэрэр, чанэу зыгъэпсэфыгъэным дэлажьэхэрэр, псы фабэхэр. Непэ Правительствэм Iофэу ышIэрэр зэкIэ ары зытегъэпсыхьагъэр — чIыпIэ кIоцI зекIоным зегъэушъомбгъугъэныр. Ащ пае ищыкIэгъэ мылъкур къэралыгъом къетIупщы. ГущыIэм пае, зекIонымкIэ инфраструктурэм хахъо егъэшIыгъэнымкIэ ахъщэ IэпыIэгъоу сомэ миллиардрэ миллион шъийрэ зыфатIупщыгъэмэ тишъолъыр ахэфагъ. Проект инхэм ягъэцэкIэн мылъкур пэIуагъэхьащт. Ахэм ащыщ Гъозэрыплъэрэ Лэгъо-Накъэрэ зэзыпхыщт гъогум ишIын.
Къушъхьэлъэ Адыгеим имызакъоу, лъэгуахэ Iахьми зекIоным лъэбэкъукIэхэр щешIых. Къуаджэхэр зэрыт районхэри игъорыгъоу IофшIэным хащэх. Анахьэу гугъэпIэшIухэр зэрапхыхэрэр Краснодар пэблэгъэ чIыналъэхэр ары. Мы лъэныкъомкIэ IофшIэнхэр агъэцакIэх. Апэрэ къэгъэлъэгъонхэм мыгъэ яжэх.
Анцокъо Ирин.
Сурэтыр: «АМ-м» ихъарзынэщ.