Унашъом кIуачIэ иIэ хъугъэ
УФ-м транспортымкIэ и Министерствэ иунашъоу кIэлэцIыкIухэр самолеткIэ зэрэзэращэхэрэм фэгъэкIотэнхэр къыдэлъытэгъэнхэм фэгъэхьыгъэм кIуачIэ иIэ хъугъэ.
УФ-м и Президентэу Владимир Путиным «Линие занкIэу» икIыгъэ илъэсым итыгъэгъазэ иIагъэм цIыфэу хэгъэгум исхэм зыкъызэрэфагъэзэгъагъэхэм ащыщыгъ самолет билетхэм ауасэ зэрэлъапIэм къыхэкIыкIэ кIэлэцIыкIухэм зарагъэгъэпсэфынэу нэмыкI шъолъыр кIонхэр унэгъо ныбжьыкIэхэм къин къызэращыхъурэр. Къэралыгъом ипащэ ащ фэдэ Iофыгъо зэрэщыIэм зэрэщыгъуазэр, мы лъэныкъом фэгъэзэгъэ къулыкъухэм япащэхэм зэрадэгущыIагъэр къыхигъэщызэ, ар дэгъэзыжьыгъэ хъущтэу къыIогъагъ.
— КIэлэцIыкIу зэрыс унагъохэм самолет билетхэр къащэфынхэм пае процент 50 фэгъэкIотэн яIэным фэгъэхьыгъэ унашъор щыI, Кодексым итхагъ, — къыкIигъэтхъыгъ Президентым. — Арэу щытми, ошъогумкIэ цIыфхэр зезыщэрэ компаниехэм ежьхэм яфэгъэкIотэн цIыкIоу, къыхэмыщыхэрэр къызаугупшысхэкIэ, процент 50-р дагъэзыжьы. Арышъ, УФ-м и Правительствэрэ компаниехэмрэ мы Iофым зэдытегущыIэнхэшъ, 2025-рэ илъэсым ищылэ мазэ и 14-м шIомыкIэу Iофыгъор дэгъэзыжьыгъэным фэIорышIэрэ унашъор къыдагъэкIын фае.
Президентым къыгъэуцугъэ пшъэрылъыр агъэцакIэзэ унашъоу агъэхьазырыгъэм къызэрэщиIорэмкIэ, Урысые гражданствэ зиIэу, илъэси 2 — 12-м зыныбжь шIомыкIыгъэу, хэгъэгу кIоцI рейсыр зыгъэфедэхэрэр ары ащ къыхиубытэхэрэр.
Илъэси 2-м зыныбжь шIомыкIыгъэ кIэлэцIыкIоу шъхьафэу тIысыпIэ зимыщыкIагъэм хэгъэгу кIоцI рейсым пае билет фащэфын ищыкIагъэп, проценти 100-у фэгъэкIотэн иIэнэу унашъом итхагъ. IэкIыб рейсым пае процент 90-м нахь мымакIэу фэгъэкIотэн иIэнэу къыщеIо.
Илъэси 2-м зыныбжь шIомыкIыгъэ кIэлэцIыкIоу зы пассажирым игъусэр нэбгыритIу е нахьыбэ мэхъумэ, ахэм чIыпIэ гъэнэфагъэхэр яIэнхэ, процент 50 фэгъэкIотэн афашIын фае. «Бизнес-класс» зыфаIорэмкIэ е субсидие къызкIэкIощт маршруткIэ быбыхэрэм мы унашъор анэсырэп.
Илъэс 12-м зыныбжь шIомыкIыгъэр IэкIыбым самолеткIэ зэпыращыным, илъэси 2-м нэмысыгъэр шъхьафэу чIыпIэ иIэу быбыным апае фэгъэкIотэнэу яIэщтыр авиакомпанием ежь ыгъэнэфэн фит.
А зэпстэумэ анэмыкIэу, кIэлэцIыкIоу зыныбжь илъэс 12-м шIомыкIыгъэм нахьыжъэу игъусэр пэIудзыгъэу агъэтIысын фимытхэу УФ-м транспортымкIэ и Министерствэ иунашъо къыщеIо.