Мэхъош Руслъан
Сипхъорэлъф кIэлэ хъупхъ

Зы пхъорэлъф цIыкIу сэ сиIэшъ,
Фэдэ кIалэ гъотыгъуай.
Зы шIулъэгъу
ащ къысфишIыгъэшъ,
Зэбгъэпшэщтыр къэшIэгъуай.
Яни, яти, инэнэжъи къаблэкIэу,
ЫIэ цIыкIухэр ыутхыпкIэу,
Ыпэ къифэрэр зэIикъузэ,
ЩхырыIубзэу къысфэчъэ.
Дунай нэфыр сэ сфикъужьрэп.
ГушIом сызэлъиштагъэу зысIэткIэ,
Сэщ нэмыкIы екIужьрэп.
Ащ ышъхьашъо Iэ зыщысфэкIэ,
Садэжь афыIукIыжьырэп.
Ар сэ лъэшэу гуапэ сщэхъу,
Рэзэ шъыпкъэ сэ сыфэхъу.

Пэнэшъу Хьазрэт
Тыгъэнэф
ЫцIэм фэдэр ышъхьэу
СэшIэ Темырлан,
Изытет орэдэу
Тэ шъуфызэхэтлъхьан.
Пытагъэр къыхэщэу
КIэлэцIыкIу лIыблан.
Инэплъэгъу нэгушIоу
УзкIэригъэхьан.
Пстэуми агъэшIагъоу
Ренэу IэпкIэ-лъапкI.
Янэ-ятэхэр щыгушIукIхэу
КIалэр дэхэ закI.
Iахьыли гъунэгъуи
Темырлан фэчэф.
Апсэм рагъэпшагъэу
РаIуагъ: «Тыгъэнэф».