Адыгэ Республикэм и Правительствэ иунэ Адыгеим и ЛIышъхьэу КъумпIыл Мурат Республикэу Татарстан и Премьер-министрэ игуадзэу, къэндзалхэм я Дунэе конгресс и Лъэпкъ Совет и Тхьа-
матэу Василь Шайхразиевым зэIукIэгъу щыдыриIагъ.

Iофтхьабзэм хэлэжьагъэх АР-м и ЛIышъхьэрэ иминист­рэхэм я Кабинетрэ я Адми­нистрацие ипащэ игуадзэу Къонэ Заур, Адыгеим культу­рэмкIэ иминистрэу Аулъэ Юрэ, Адыгэ Республикэм лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу Шъхьэлэхъо Аскэр, къэндзалхэм я Дунэе конгресс и Лъэпкъ Совет ипащэхэр, Адыгеим щыпсэурэ къэн­дзалхэм ялIыкIохэр.
ЗэдэгущыIэгъум иублэгъум Василь Шайхразиевым Респуб­ликэу Татарстан ипащэу Рустам Миннихановым ыцIэкIэ шIуфэс гущыIэхэр къыIуагъэх, гуфэбэныгъэ хэлъэу къызэрэпэгъокIыгъэхэм, Адыгеим щыпсэурэ къэндзалхэм ишIуагъэ зэра­ригъэкIырэм апае КъумпIыл Мурат зэрэфэразэр, шъолъыритIумэ азыфагу илъ хъугъэ зэфыщытыкIэ фабэхэр къыхигъэщыгъэх.
«Адыгеим зэрэхэгъэгоу щысэ дэгъу регъэлъэгъу лъэпкъ зэфэшъхьафхэм къахэкIыгъэхэр, дин зэмылIэужыгъохэр зылэжьы­хэ­рэр зы лъэпкъым фэдэу ащ зэрэщызэдэпсэухэрэмкIэ.
Общественностым илIыкIохэм, республикэм щалэжьырэ динхэм япащэхэм, цIыфэу Адыгеим исхэм, хэушъхьафыкIыгъэ дзэ операцием хэлажьэхэрэм, джащ фэдэу къэндзалэу щыпсэухэрэм гущыIэгъу тафэхъугъ. Тыдэ тыкIуагъэми шъхьэихыгъэу, гуфэ­бэныгъэ ахэлъэу къытпэгъокIыгъэх. Анахьэу Адыгеим икультурнэ кIэн, иорэдхэр, икъашъо­хэр тыгу рихьыгъэх. Къэндзал общественнэ организациехэм яшъолъыр зэхэсыгъо мы илъэсым Адыгеим зэрэщыкIуагъэр гуапэ тщыхъугъ, республикэм къыгъэлъэгъогъэ лъэгапIэр зэрэ­щысэ шIагъор, ащ ушъхьадэкIыныр къин зэрэхъущтыр тлъэгъу­гъэ», — къыIуагъ Татарстан и Премьер-министрэ игуадзэ.
Къыблэ ыкIи Темыр-Кавказ федеральнэ шъолъырхэм ямызакъоу, зэрэхэгъэгоу ащыпсэурэ цIыф лъэпкъхэр зэзыпхыхэрэ, мэхьанэшхо зиIэ Iофтхьабзэр щызэхащэнэу Адыгеир къызэрэхахыгъэм пае Василь Шайхразиевым зэрэфэразэр КъумпIыл Мурат къыIуагъ. Республикэм ипащэ къызэрэхигъэщыгъэмкIэ, Хэгъэгу зэошхом текIоныгъэр къызщыдахыгъэм ия 80-рэ ­илъэс зыщыхагъэунэфыкIыщтым ащ фэдэ зэIукIэгъухэм мэхьанэшхо яI. Урысыем и Президентэу Вла­димир Путиным иунашъо тетэу 2025-р Хэгъэгум иухъумакIо и Илъэсэу агъэнэфагъ.
Адыгэ Республикэм и ЛIы­шъхьэ къэндзалхэм Адыгеим иобщественнэ щыIакIэ чIыпIэу щаубытырэр, лъэпкъ зэгурыIоныгъэр гъэпытэгъэнымкIэ мэхьанэу ахэм яIэр къыхигъэ­щыгъ. Адыгеимрэ Татарстанрэ арыс цIыфхэм бэшIагъэу блэгъэныгъэ зэфыщытыкIэу зэдыряIэр бгъуи­тIумкIи федэу зэрэщытыр къы­Iуагъ.
«Минниханов Рустам Нургалий ыкъомрэ сэрырэ IофшIэным епхыгъэ ыкIи блэгъэныгъэ зэфы­щытыкIэ дэгъухэр тазыфагу илъ хъугъэх. ИлъэситIукIэ узэкIэ­Iэ­бэжьмэ Казань сыщыIагъ, индустриальнэ паркхэр зэхэщэгъэн­хэмкIэ Татарстан IофшIэкIэшIоу IэкIэлъ хъугъэм зыщызгъэгъозагъ. Адыгеими джы ащ фэдэ проектитIу щагъэцакIэ. Респуб­ликэу Татарстан исхэм яIоф­шIакIэ тыкIырыплъыгъ. Тэ зы хэгъэгу тызщыпсэурэр, типшъэ­рылъхэри зых. Лъэныкъо зэфэшъхьафхэмкIэ тишъолъыритIумэ язэдэлэжьэныгъэ джыри нахь зиушъомбгъунэу тэгугъэ, Iофы­шIэхэм ягъэхьазырыни, научнэ-­ушэтын IофшIэнри, къыдэгъэ­кIыжьынри, культурэри ахэм къахеубытэх», — къыIуагъ КъумпIыл Мурат.

Республикэу Татарстан илIыкIохэр Адыгеим къызкIэкIуа­гъэхэр Къыблэ ыкIи Темыр-Кавказ федеральнэ шъолъырхэм ащыпсэурэ къэндзал общест­веннэ организациехэм я Шъо­лъыр зэхэсыгъо щызэхэщэгъэным пай. 2024-рэ илъэсымкIэ къэндзалхэм я Дунэе конгресс Iофэу ышIагъэм икIэуххэр ащ щызэфахьысыжьыгъэх, Урысыем ишъолъырхэм мамырныгъэ, зэ­гурыIоныгъэ ыкIи лъэпкъ зэ­фыщытыкIэ тэрэзхэр къащыу­хъу­мэгъэнхэмкIэ пшъэрылъэу щыт­хэм атегущыIагъэх, хэушъхьафыкIыгъэ дзэ операцием хэлажьэхэрэм IэпыIэгъу зэра­фэхъущтхэм иIофыгъохэми къа­щыуцугъэх.
Зэфэсым хэлажьэхэрэр ­Адыгэ Республикэм и Кощ­хьэблэ ыкIи и Шэуджэн районхэм ащыIагъэх, а псэупIэхэу къэндзалхэр нахьыбэу зыщы­псэухэрэм адэсхэм гущыIэгъу афэхъугъэх, Хэгъэгу зэошхом хэкIодагъэхэм ясаугъэтхэм къэ­гъагъэхэр акIаралъхьагъэх.