Лъэпкъ проектэу «Культурэм» ди­штэу концерт за­лэу «Налмэсым» игъэкIэжьын ыкIэм зэрэфэкIуагъэм Адыгеим и ЛIышъхьэу КъумпIыл Мурат зыщи­гъэ­гъозагъ.

Ащ игъусагъэх республи­кэм иминистрэхэм я Кабинет и Тхьаматэ игуадзэу Хъоткъо Хъызыр, Мыекъуапэ имэрэу Геннадий Митро­фановыр, къэралыгъо бюджет учреждениеу «Стройзаказчикымрэ» фирмэ-подрядчикымрэ япащэхэр.

НепэкIэ гъэцэкIэжьын Iоф­шIэнхэр аухыгъэх, къэнагъэр клининг IофшIэнхэмрэ концерт залым къыпэIулъ чIыпIэм изэ­тегъэ­псыхьанрэ. Культурэм ипсэуалъэ архитектурэ гъэ­псыкIэу иIагъэр къызэтырагъэнэжьызэ, уахътэм диштэу ар зэтегъэ­псы­хьажьыгъэ­нымкIэ пшъэры­лъэу яIагъэхэр агъэцэкIагъэхэмэ Адыгеим и ЛIышъхьэ зэригъэ­шIагъ. Шъугу къэтэгъэкIыжьы Мые­къопэ мебелышI фаб­ри­кэу «Зэкъошныгъэм» культу­рэмкIэ и Унэ 1957-рэ илъэсым зэрашIыгъагъэр. КIэ­сэн лъагэхэр иIэхэу, классическэ шапхъэм тетэу ар агъэпсыгъагъ. ЗашIыгъэм къыщегъэ­жьагъэу апэрэу гъэцэ­кIэ-
жьын IофшIэн игъэкIотыгъэ­хэр ащ рашIылIагъэх. Уна­шъхьэр, шъхьаныгъупчъэ, пчъэ блыпкъ­хэр зэблахъу­гъэх, ыкIыбкIи, ыкIоцIкIи ар агъэ­дэ­хагъ, инженер коммуни­ка­циякIэхэр, видеокамерэхэр, кондиционерхэр, сигнали­за­цие­хэр ащ ачIагъэуцуагъэх. Джэхашъор мраморкIэ ап­кIагъ. Сценэ Iэмэ-псымэхэр, зал шъхьаIэми, зал цIыкIуми арыт мебелыр зэблахъугъ. ШхапIэми зэхъокIыныгъэшхо фэхъугъ. Ижъырэ остыгъэхэр, джырэ шапхъэхэм адиштэрэ остыгъэхэр ащ щагъэфеда­гъэх. Концерт залым истатус диштэу цIыфхэмкIэ ар гу­IэтыпIэу щытыным зэкIэри фытегъэпсыхьагъ.

Лъэпкъ къашъомкIэ Къэралы­гъо академическэ ансамблэу «Налмэсым» имызакъоу, Адыгэ Республикэм и Концерт зэхахьэ икупхэми зыкъызыщагъэлъэгъо­рэ учреждениер зыфэгъэзэгъэ лъэныкъохэм зягъэушъомбгъугъэным мэхьанэшхо зэриIэр Адыгеим и ЛIышъхьэ къыхигъэ­щыгъ. АР-м и Концерт зэхахьэ ипащэхэм игъо афилъэгъугъ репертуарым джыри дегупшы­сэнхэу, творческэ екIолIэкIакIэхэр къагъотынэу, концерт залыр къызызэIуахыжькIэ джырэ шапхъэхэм адиштэрэ амалхэр агъэфедэнхэу.

«Мы аужырэ лъэхъаным куль­турэм ипсэолъабэ — Пушкиным и Унэ, АР-м и Лъэпкъ музей, АР-м народнэ культурэмкIэ и Гупчэ, АР-м и Сурэт къэгъэ­лъэ­гъуапIэ, искусствэхэмкIэ еджапIэхэр, культурэм икъоджэ унэ­хэр, модельнэ тхылъеджапIэхэр агъэкIэжьыгъэх. Концерт залэу «Налмэсыр» республикэм исценэхэу агъэкIэжьыгъэхэм зэу ащыщ хъущт. ЯмышIыкIэу псэуалъэм хэлъыр тэ къызэ­тед­гъэнэжьыгъ, джырэ технологие­хэм ягъэфедэнкIэ ищыкIэгъэ амалхэр зетхьагъэх. Мэхьанэшхо зиIэр а пстэури цIыфхэм афэлэжьэныр, культурэ чIыпIэхэр зэкIэ тикIэн бай къы­зэтегъэнэжьыгъэным, творчест­вэм зегъэушъомбгъугъэным афэ­IорышIэнхэр ары», — къы­Iуагъ КъумпIыл Мурат.
Концерт залым къыпэIулъ чIыпIэм изэтегъэпсыхьанкIэ, къэгъагъэхэр ащ щыгъэтIысхьэгъэнхэмкIэ, культурэм ипсэуа­лъэхэр ыужкIэ агъэкIэжьхэ зы­­хъукIэ технологиякIэхэу, Iоф­шIэпIакIэу аIэ къырагъэхьагъэхэр къызфагъэфедэнхэу пшъэрылъ заулэ республикэм ипащэ афишIыгъ.
АР-м и ЛIышъхьэ ипресс-къулыкъу
къытырэ къэбархэмкIэ
ЛIышэ Саные