АР-м хэдзынхэмкIэ и Гупчэ ­комиссие тыгъуасэ я 53-рэ зэ­хэсыгъо иIагъ. Ащ Iофыгъуи 6-мэ щатегущыIагъэх, икIыгъэ илъэсым изэфэхьысыжьхэр ыкIи къихьагъэм пшъэрылъэу зыфагъэуцужьыхэрэм щате­гущыIагъэх. Iофтхьабзэр зэрищагъ ащ итхьаматэу Сэмэгу Нурбый.

АР-м хэдзынхэмкIэ и Гупчэ комиссие 2025-рэ илъэсым пшъэрылъэу зыфи­гъэуцужьыхэрэм къатегущыIагъ ащ исек­ретарэу ХьацIэцIэ Фатимэ. Ащ къызэриIуагъэмкIэ, 2026-рэ илъэсым хэ­дзынхэр зэрэрагъэкIокIыщтым епхыгъэ Iоф­тхьабзэхэм язэхэщэн ыуж итыщтых. АР-м и Къэралыгъо Совет — Хасэм идепутатхэр къэкIорэ илъэсым хадзыщтых. Мыгъэ мэкъэтыным изыкI мафэ Iоныгъом и 14-м, зы хэдзын кампание щыIэнэу агъэнафэ. Тэхъутэмыкъое райо­нымкIэ народнэ депутатхэм я Совет идепутат ихэдзын тедзэ щыIэщт. Ар мандатитIу зиIэ хэдзыпIэ коеу N 8-м щыкIощт. Ащ епхыгъэ Iофтхьабзэхэр, ащ нэмыкIэу хэдзынхэм япхыгъэ семинархэр, егъэджэн зэфэшъхьафхэр илъэ­сым къыкIоцI зэхащэщтых.
Хэдзынхэм ахэлажьэхэрэм яправовой культурэ, хэдзын комиссием хэтхэм яшIэныгъэхэм ахэгъэхъогъэным фэшI икIыгъэ илъэсым ашIагъэхэм ыкIи 2025-рэ илъэсым пшъэрылъэу зыфагъэуцу­жьыхэрэм къатегущыIагъ АР-м хэдзынхэмкIэ и Гупчэ комиссие итхьаматэ игуадзэу Елена Майор.
АР-м и Къэралыгъо Совет — Хасэм хэт политическэ партиехэм яIофшIэн къэгъэлъэгъогъэнымкIэ шъолъыр телерадиопрограммэхэм эфир уахътэу щагъэфедагъэм изэфэхьысыжьхэр джащ фэдэу къашIыгъэх. НэмыкI Iофыгъохэми зэхэсыгъом щатегущыIагъэх, пшъэрылъхэр агъэнэфагъэх.
ДЕЛЭКЪО Анет.