Адыгэ Республикэм и ЛIышъхьэу КъумпIыл Мурат Адыгэ Респуб­ликэм инахьыжъхэм я Совет итхьаматэу ГъукIэлI Нурбый пра­ви­тель­ствэм и Унэ тыгъуасэ зэIукIэгъу щыдыриIагъ.

2024-рэ илъэсым нахьыжъхэм я Совет Iофэу ышIагъэм ыкIи илъэсэу къихьагъэм пшъэ­рылъэу зыфигъэуцужьхэрэм ащ щатегущыIагъэх.
КъумпIыл Мурат игущыIэ къыщыхигъэщыгъ цIыфхэу Советым хахьэхэрэм лъытэныгъэ­рэ шъхьэкIэфэныгъэрэ къызэралэжьыгъэр. Ащ къызэриIуагъэмкIэ, Адыгеим икъыдэгъэ­кIыжьын, исоциальнэ ыкIи икультурнэ щыIэныгъэ яIахьы­шхо ахэм халъхьагъ, непи адэ­гуащэх щыIэныгъэ ыкIи сэнэхьат IофшIагъэу яIэмкIэ.
ГъукIэлI Нурбый къыIотагъ блэкIыгъэ илъэсым Советым ыкIи ащ ипрезидиум мэзищ къэс зэхащэщтыгъэ зэхэсыгъохэм лъэныкъо зэфэшъхьафхэм афэгъэхьыгъэ Iофыгъохэм зэращытегущыIэщтыгъэхэр. Ахэр рес­публикэм иэкономикэ, икультурэ хэхъоныгъэхэм, къэралыгъор шIу алъэгъоу, Iофым дэмышъхьахыхэу ныбжьыкIэхэр пIу­гъэнхэм, унэгъо зэфыщытыкIэ­хэр къызэтегъэнэгъэнхэм, IофышIэхэм якъэгъотын, ешъонымрэ наркоманиемрэ апэшIуе­кIогъэным, зыныбжь имыкъу­гъэхэм бзэджэшIагъэ зэрямыгъэхьэгъэным ыкIи нэмыкIхэм афэгъэхьыгъагъэх.
Советым ипрезидиум зафигъэзагъ Мыекъопэ артиллерийскэ дивизионым идзэкIолIхэу ыкIи иофицерхэу хэушъхьафыкIыгъэ дзэ операцием щыIэхэм. Джащ фэдэу республикэм ина­хьыжъхэр ахэлэжьагъэх еджапIэхэм ащашIыгъэ зэIукIэхэм, кIэлэцIыкIухэмрэ ныбжьыкIэ­хэмрэ аIукIэщтыгъэх, унэгъо шэп­хъэ тэрэзхэм якъэухъумэн, къэралыгъом шIулъэгъуныгъэрэ шъыпкъэныгъэрэ фыряIэным, гушъхьэбаиныгъэ гъэсэныгъэм афэгъэхьыгъэу гущыIэхэр къа­шIыщтыгъэх.

Республикэм и ЛIышъхьэ къы­Iуагъ Советым ипащэхэмрэ ащ хэтхэмрэ чанэу Iоф зэра­шIагъэм пае зэрафэразэр ыкIи яцыхьэ тырагъэлъы хъущтэу къы­хигъэщыгъ къэралыгъо унашъохэр ашIы зыхъукIэ яшIошIхэр къызэрэдыхалъытэщтхэм.
«Республикэм ина­хьыжъхэм я Совет чIыпIэ хэхыгъэ щеу­быты унэшъо гъэнэ­фагъэхэр къызпкъы­рыкIырэ обществэм иинститут. ЩыIэны­гъэмрэ IофшIэнымрэ ахахыгъэ зэгъэуIугъэ шIэныгъэхэу на­хьыжъ­хэм къапкъы­ры­кIыхэрэр тэркIэ уасэ ыкIи мэхьанэ зиIэх. Нахьыбэм шъо нахь тэрэзэу шъолъэгъу гумэкIыгъо зэфэшъхьафхэм яушъхьагъу, къэ­жъу­гъэ­шIэгъэ илъэсхэм яхьатыркIэ ыкIи щы­Iэныгъэр куоу зэри­шъушIыкIыгъэм яшIуа­гъэкIэ упчIэжьэгъу шъуафэхъу. ТэркIэ мэхьанэшхо иI джы­рэ уахътэм хъурэшIэрэм шъузэре­плъырэм ыкIи ар сыди­гъокIи къыдыхэтэ­лъытэ», — къы­Iуагъ КъумпIыл Мурат.
ЗэIукIэгъум икIэух ГъукIэлI Нурбый къыIуагъ илъэсэу къи­хьагъэм Адыгэ Республикэм инахьыжъхэм я Совет хэтхэм анаIэ нахь зэратырагъэтыщтыр республикэм тапэкIэ хэхъоныгъэ зэришIыщтым, быслъымэн ыкIи чыристан динхэр зезы­хьэ­хэрэм язэдэлэжьэныгъэ, зэ­ты­рагъэпсыхьэгъэ общественнэ чIыпIэхэм афэсакъыгъэным, джащ фэдэу литературнэ зэдзэ­кIын Iофым лъэпкъ зэгурыIо­ныгъэм ылъэныкъокIэ чIыпIэу щиубытырэм.
АР-м и ЛIышъхьэ ипресс-къулыкъу