УФ-м и Президентэу Владимир Путиным иунашъокIэ 2025-р Хэгъэгум иухъумакIо и Илъэсэу Урысыем щагъэнэфагъ.

Адыгэ Республикэм и Сурэт къэгъэлъэгъуапIэ («Фото-мгновение») «Сурэт–нэгъэупIэпIэгъу» зыфиIорэ къэгъэлъэгъоныр щылэ мазэм и 14-м къыщызэIуахыгъ. Хэгъэгу зэошхом ТекIоныгъэр къызыщыдахыгъэр илъэс 80 зэрэхъурэм ар фэгъэхьыгъ. Адыгеим исурэттех 30-мэ яIофшIэгъи 100 ащ хэхьагъ.
Адыгэ Республикэм культурэмкIэ и Министерствэ иотдел ипащэу Шэуджэн Бэлэ Iофтхьабзэр къызэIуихыгъ.

— Хэгъэгу зэошхом къыгъэлъэгъуагъ цIыфхэм акIуачIэ зыкIыныгъэм къызэрэхэкIырэр, советскэ дзэкIолIмэ, цIыф къызэрыкIомэ япсэемыблэжьныгъэ фэдэ дунаим зэрэщымыхъугъэр, зэкъотхэу пыим зэдебэнхэзэ ТекIоныгъэр къызэрэдахыгъэр. Къэгъэлъэгъоным ызыныкъом хэхьэгъэ сурэтхэр заом фэгъэхьыгъэх. Зэо ужым къытфихьыгъэ ошъо къабзэр ятIонэрэ Iахьым къырегъалъэгъукIы. IофшIагъэ пэпчъ екIолIэкIэ хэхыгъэ сурэттехмэ зэрэфыряIэр ахэолъэгъукIы, — къыIуагъ Шэуджэн Бэлэ.
АР-м исурэттеххэм я Союз итхьаматэу Аркадий Кирнос, Сурэт къэгъэлъэгъуапIэм ипащэу Бырсыр Абдулахь, КъокIыпIэм щыпсэурэ лъэпкъхэм яискусствэкIэ Къэралыгъо музеим и Къутамэ ипащэу ШъэуапцIэкъо Аминэт зэхахьэм къыщыгущыIагъэх.
Хэгъэгур къэзыухъумагъэхэм ялIыхъужъныгъэ къизыгъэлъэгъукIырэ IофшIагъэхэм купкI ин яIэу гъэпсыгъэх.
— Хэгъэгу зэошхом илъэхъан тятэжъхэм лIыхъужъныгъэу зэрахьагъэр пстэуми тищысэтехыпI. Лъэхъан хьазабэу Урысыер пыим пэуцужьын фаеу зэхъум, тицIыфхэм акIуачIэ зэхэлъэу Хэгъэгум къоуцуагъэх, мамырныгъэ щыIакIэ тикъэралыгъо илъыным ахэр фэбэнагъ. ТекIоныгъэм и Мафэ къэзыгъэблэгъэгъэ лIыхъужъхэу дунаир зыхъожьыгъэхэм ясурэтхэм тарихъым куоу ухащэ. ХэушъхьафыкIыгъэ дзэ операцием иветеранхэр лIыхъужъныгъэ ищысэхэу зэрыщытхэр сурэтыбэмэ къащыдгъэлъэгъуагъ. А IофшIэнхэр апэрэу къэгъэлъэгъоным хэхьагъэх, — къыIуагъ Аркадий Кирнос.

Сурэтхэу «Заом иаужырэ макъэхэр», «Заом ыуж», «Къуаджэм иветеранхэр», «Ошъо къабзэр», «ЛIыхъужъым исурэт» зыфиIохэрэр блэкIыгъэ ыкIи джырэ лIэшIэгъум инэпэеплъых, ахэр гум екIухэу шIыгъэх. Непэ мафэм мамырныгъэм къыфэджэрэ сурэтхэр дэхэ дэдэх.
— Зы нэгъэупIэпIэгъум сурэт пчъагъэ тепхын плъэкIыщт. СурэтымкIэ цIыфым игумэкI-гупшысэхэр, дунаир зэрилъэгъурэ шIыкIэр къиоIотыкIых. Зы сурэтыр зы нэплъэгъу. ЦIыфым инэплъэгъу къыщыхэбгъэщы пшIоигъор сурэтым гупшысэ шъхьаIэ фэхъун фае. ДзэкIолIым, зэо кIыбым щылажьэрэм, пыим кIуапIэ езымытырэм атепхырэр гъашIэм ишIэжь сурэтэу щыт. КIэпшIыкIыжьын умылъэкIыщт хъугъэ-шIагъэм тепхырэ сурэтыр анахь лъапIэхэм ахэтэлъытэ. Заом къыщытырахыгъэ сурэтхэр ащ фэдэх, ТекIоныгъэм и Мафэ къэзыгъэблэгъагъэхэр, зэо ужыр, щыIэныгъэм ихъугъэ-шIагъэхэр къэзыгъэлъагъохэрэр ащ фэдэх — къыIуагъ зисурэтхэр къэгъэлъэгъоным хэхьэгъэ педагогикэ шIэныгъэхэмкIэ кандидатэу, доцентэу, Мыекъопэ фотоклубэу «Лэгъо-Накъэм» хэтэу Еутых Саидэ.
ШIэжьыр мыкIосэнымкIэ, къыткIэхъухьэхэрэр Хэгъэгум фэшъыпкъэхэу пIугъэнхэмкIэ къэгъэлъэгъоным ишIуагъэ къэкIощт.
Къэгъэлъэгъоныр мэзаем и 1-м нэс зэIухыгъэщт.
Лъэпшъыкъо Фатим.
Сурэтхэр: Iэшъынэ Аслъан.